Ads by Google Ads by Google

Lagolago to’atele fuafuaga e taofi lafoga totogi 2%

E to’atele ni isi o tagata faigaluega i totonu o le atunu’u ua fa’aalia lo latou laglagoina o se fuafuaga a le ali’i kovana ma le faigamalo, ina ia taofi le lafoga o totogi e 2% lea o lo o tipi mai totogi ae tu’u atu e fesoasoani ai i le falema’i o le LBJ i Fagaalu.

 

O ni isi sa latou fa’aalia lagona fa’asea i le fai fai umi o lenei lafoga ae ua leva na tatau ona aapa le malo e fesoasoani i le falema’i, peita’i o ni isi sa latou fa’aalia lagona fiafia ina ua maua se avanoa e fa’asoa ai sa latou fesoasoani mo le falema’i

 

Na taua e le susuga a Lafoga Utumapu, o se ali’i ua 15 tausaga o galue i se tasi o matagaluega a le malo e fa’apea, o le fuafuaga a le kovana e taofi le lafoga o totogi, o se fuafuaga poto ma le alofa.

 

“Ou te fa’afetai i le kovana ia ua a’e se tofa e fa’amuta le lafoga lenei, e ui lava ua fai ma avega i le to’atele o tagata faigaluega e aofia ai ma a’u, ae ou te faafetai i lenei avanoa ua mafai ai ona tu’u atu sa’u sao mo le fa’aleleia o le falema’i e tasi a si o tatou atunu’u, ae i lo’u talitonuga, ua tatau ona fa’amuta le lafoga”, o le saunoaga lea a Utumapu na lagolago e le tina o Margret Lavea o Fagatogo.

 

Na taua e Margret e fa’apea, e tasi lava le mafua’aga na ala ai ona pasia e le Fono Faitulafono le pili e fa’avae ai le lafoga o totogi e 2%, e totogi ai le aitalafu e $3 miliona sa aumai i le Ofisa o Taui o Fa’alavelave Fa’afuase’i, ae tu’u atu e fesoasoani ai i le falema’i i Fagaalu.

 

“O le mea moni lava ia, sa tatau lava ona taofi le tipiina o le lafoga e 2% i le taimi na mae’a ai ona totogi le aitalafu, ae ua avea le fa’aauau pea o le lafoga ma itu ua pagatia ai ni isi o aiga e vaivai le tupe maua toe ta’ito’atasi tagata faigaluega i totonu o aiga”, o le saunoaga lea a le faletua o Margret.

 

“O le tiute o le malo o le saili o tupe e fa’atupe ai le falema’i ma isi manaoga e tula’i mai i le atunuu, e le o se matafaioi lena a tagata faigaluega e i ai ma a’u nei, peita’i o le mea lea ua i ai, e le gata e tipi le lafoga i le malo, tipi atu ai ma le lafoga mo le falema’i, a o lea fo’i e fai le tautua i le malo ma le atunu’u i le tele o mea e aofia ai le tautuaina o ekalesia, mea fai a le nu’u, ae ese ai fo’i le tausiga o fanau aoga ma le tausiga o aiga”, o le saunoaga lea a Margret.

 

Na taua e Margret e fa’apea, e tumu o ia i le alofa i tagata gasegase o lo o mana’omia le auina atu i fafo mo togafitiga, lea fo’i o lo o fesoasoani i ai le isi vaega o le lafoga e 2% o lo o tipi mai totogi, ae i lona talitonuga, ua tatau i le malo ona tula’i mai e fa’atino lana fatu aiga, o le fesoasoani lea i le fa’atupeina o togafitiga ma le tausiga o le soifua maloloina o tagata.

 

E to’alua isi tagata faigaluega sinia a le malo e le i finagalo e fa’ailoa o la suafa, sa la fa’aalia lo la lagolagoina o le fuafuaga a le kovana e fa’amuta le lafoga o totogi e 2%.

 

Na taua e le isi o i laua nei e fa’apea, e le talafeagai le lafoga lenei mo le to’atele o tagata faigaluega i le atunu’u, ona e le o tagata faigaluega uma i le teritori o lo o tipi a latou lafoga e 2%, e pei ona moomia e le tulafono.

 

“E i ai lava isi auala e mafai e le ona saili mai ai se tupe mo le falema’i, e pei o le fa’alafoga o oloa mai fafo ina ia agava’a uma ai tagata e fa’atau, ae maua ai le tupe mo le falema’i, nai lo le tipi o le lafoga o totogi ae pagatia ai tagata lima vaivai”, o le saunoaga lea a se tasi o ofisa sinia a le malo.

 

Na taua e le alii kovana ia Lolo Matalasi Moliga i le ripoti a le malo lea ua tauaao e le Fono Faitulafono, o le a saili e le malo se isi alaga tupe e fesoasoani ai i le tautua a le falema’i, ae o le a fa’aulu e le faigamalo se pili e fa’amuta ai le lafoga o totogi e 2% o lo o tipi mai totogi o tagata faigaluega mo le falema’i.