Ua fa’aalia e le to’atele o afioga i ali’i Senatoa lo latou lagolagoina o se pili tau fa’aofi na talosagaina e le ali’i kovana, e fa’avae ai se Ofisa fou i totonu o le Matagaluega o Tupe a le malo ua fa’aigoaina o se Ofisa o Faletupe (OFI).

O lea Ofisa e pei ona taua e sui o le Komiti Fa’afoe o le Pone sa fesiligia e le Komiti o le Paketi a le Senate, latou te mata’ituina gaioiga a le faletupe o le ‘Charter Bank’ lea o lo o taumafai le malo e fa’atula’i, poo talafeagai lana auaunaga i le atunu’u ma tulafono tau tupe a le feterale.

A o le i faia le iloiloga e fa’amalamalama ai le taua o le Ofisa o le ‘OFI’ atoa ai ma le mafua’aga e tatau ai ona fa’atula’i lea Ofisa, sa tele fesili sa fia malamalama i ai ni isi o Senatoa, pe aisea ua finagalo ai le alii kovana e fa’atula’i le faletupe fou ae toe fa’atula’i atu ai fo’i ma le Ofisa o le ‘OFI’.

Na fa’amanino e le Teutupe a le malo ia Ueligitone Tonumaipe’a, o se tasi lea o totino o le Komiti o le Pone sa fesiligia e le komiti i lenei mataupu, talu ai e le puipuia le Faletupe fou lea ua fuafua le malo e fa’avae i tulafono tau inisiua a le feterale (Federal Deposit Insurance Corporation - FDIC), o le mafua’aga lea e taua ai le fa’avae o le Ofisa o le ‘OFI’, e le gata latou te fa’amalosia tulafono a le feterale mo kamupani nonotupe, ae latou te puipuia fo’i tagatanu’u o Amerika Samoa o lo o fa’aaogaina lea auaunaga tau faletupe.

E tofu setete uma ma teritori o le Iunaite Setete ma Ofisa o le ‘OFI’ o lo o i ai, se’i vagana ai lava Amerika Samoa e le o i ai se ofisa fa’apea, e pei ona taua e Tonumaipe’a i luma o le komiti a le Senate.

O le isi mafua’aga taua e ala ai ona naunau le malo e fa’avae le Ofisa o le ‘OFI’ e pei ona saunoa le Teutupe, pau lea o le auala e mafai ai ona tu’u mai le lagolago a le faletupe o le Zions Bank e lagolago le Faletupe fou o le ‘Charter Bank’ o lo o taumafai le malo e fa’atula’i.

O isi vaega o le tulafono fou lea ua fa’aulu e le malo e fa’atula’i ai le Ofisa o le ‘OFI’, e le gata o lo o aofia ai tiute tauave ma le malosiaga o le Ofisa, ae o lo o taua ai fo’i le tofia o le Komesina e fa’auluulu i ai le Ofisa.

O le Komesina e tofia mai e le kovana, ma galue ai mo le umi e fa tausaga, se’i vagana ua aveese vave.

E le mafai e se tagata o lo o ia umia se tofiga i le malo ona avea ma Komesina, po o se tasi o lo o i ai ni ana siea, tupe, po o pone i totonu o le faletupe, ae o se tagata e i ai agava’a faapitoa i auaunaga tau tupe, o se tagata fo’i e i ai sona tomai i le puleaina o tupe feterale, setete po o teritori.

Na taua e le afioga i le ali’i senatoa ia Galea’i M. Tu’ufuli le tatau lea ona avatu le Komesina e tofia e le kovana e vaaia le Ofisa o le OFI, e fa’amaonia mai e le Fono Faitulafono, ina ia fa’amalieina ai tulafono a le malo o lo o i ai, o i latou uma e tofia e le kovana i lalo o tu’utu’uga e tali sa’o aga’i i le kovana ae le o Komiti Fa’afoe, e alaga tatau ona tu’uina atu i le Fono e fa’amaonia mai ai.

Na lagolagoina uma e sui o le komiti le fautuaga a Galea’i, ma pasia ai loa e le komiti a latou suiga mo le tulafono, ina ia tu’uina atu le komesina o le a tofia e fa’amaonia mai e le Fono Faitulafono.