O le fa’aiuga a le afioga i le ali’i fa’amasino o le Fa’amasinoga o Mataupu Tau Pulega, i le mataupu i le va o le malo o Amerika Samoa ma le konekarate fau auala a le Whitehonr Construction Incorporation (WCI), ua lagolagoina ai e le ali’i fa’amasino le fa’afinauga a le WCI sa tuuina atu, i le le sa’o lea o le auala na fa’aleaogaina ai e le malo le konekarate na manumalo ai le WCI, mo le fausiaina o le auala e aga’i i le malae va’alele.

I le faaiuga a le afioga i le ali’i fa’amasino ia Toetagata Albert Mailo sa tuuina mai i le aso 21 Aperila 2014 e fa’atatau i lenei mataupu, sa ia fa’aleaoga ai le faaiuga ina ia faaleaoga le konekarate ona o ni fa’aletonu, ae manatu sa tatau ona fa’aleaoga e le malo le konekarate i se auala e mafai ai ona toe faia ni isi feutanaiga mo le faaauauina o le galuega.

Ina ua iloiloina lenei mataupu i luma o le fa’amasinoga i le aso 3 Aperila, e tasi lava le fesili na aga’i i ai le fa’amasinoga e tali, pe fa’amata o lo o sa’o le malo i le auala na latou fa’aleaogaina ai le konekarate a le WCI mo le fausiaina o le auala i le malae va’alele.

Na taua e le faamasinoga i lana suesuega sa faia e faapea, i lalo o vaega o le konekarate na sainia mo le galuega, na poloaina ai le WCI latou te totogiina se vaega tupe mo le amataina o le galuega, lea fo’i sa usitaia ma faatinoina e le WCI i lo latou talitonuga, o lo o lelei uma le pone sa latou totogiina, e ui e le o le tulaga lea sa i ai.

E talitonu le faamasinoga, e le o le WCI po o le malo o Amerika Samoa o lo o fa’aletonu i le mataupu lenei, ae o se mea sese sa faatamala i ai itu uma e lua.

Fai mai le faamasinoga, sa faatinoina e le WCI le galuega ina ua tuuina atu i ai le konekarate, sa molimau fo’i le Faatonusili o le Matagaluega o Galuega Lautele a le malo i le taimi o le iloiloga, ma ia taua le leai o se faafitauli i le faatinoina e le WCI o le galuega.

I le mae’a ai ona iloilo e le alii faamasino o mau faamaonia uma o lenei mataupu, na tuuina mai ai loa le faaiuga ua atagia mai ai le manumalo mo le WCI.

I se pepa o faamatalaga na tuuina mai i le WCI e tusa ai o lenei mataupu sa taua ai e Lorah Whitehorn le faafetaia e le WCI o le faaiuga a le faamasinoga, ma ua sauni fo’i le WCI e faaauau lana tautua mo Amerika Samoa, e ala i le tauofo lea i ni isi o galuega mo le lumana’i.

O le tama’ita’i loia ia Sharron Rancourt na tula’i mo le WCI i le lagolagosua a le ali’i loia ia Toetasi Tuiteleleapaga.