Ua fa’aalia i se pepa o fa’amatalaga sa tu’uina mai i le Ofisa o le afioga i le tama’ita’i faipule i le Konekeresi, tofa Aumua Amata i le vaiaso nei, le lagolagoina e le tama’ita’i faipule o se tulafono taufa’aofi i luma o le konekeresi a le Iunaite Setete, e toe faia ai ni suiga i le tulafono e taua o le “Magnuson-Steven act” o lo o i ai, ina ia mafai ai ona fa’amalosia atili tulaga o faiga faiva i totonu o le atunu’u.

Saunoa le tofa Aumua Amata e fa’apea, i le avea ai o ia o se tasi o faipule o lo o lalamua i le fa’aulufaleina o lenei tulafono taufa’aofi, o se lagona fiafia ina ua mafai ona latou galulue fa’atasi ma le ta’ita’i komiti ia Don Young, mo le fa’atulagaina o ta’iala mo faiga faiva i le atunu’u.

Sa ia taua fo’i e fa’apea, o lenei tulafono o le a mautinoa ai le tulaga lelei o nofoaga e teu malu ai i’a, aemaise ai o le tulaga lelei o le tamaoaiga mo le aufai faiva, lea o lo o fa’alagolago malosi le malo o Amerika Samoa ia te i latou i tulaga o faiga faiva.

Na taua e Aumua i le pepa o fa’amatalaga e fa’apea, o le tulafono i le Fa’amalosia o Faiga Faiva i le atunu’u, aemaise ai o le isi tulafono i le Fa’atupulaia lea o faiga e lelei ai le puleaina o faiga faiva, o isi ia auala o le a mafai ona fa’amalosia atili ai le tulafono o le ‘Magnuson-Steven act’ lea o lo o fuafua e faia i ai ni suiga, ina ia mautinoa le tulaga paleni o le tulaga o le mana’omia o le i’a aemaise ai o le manaoga i le itu tau tupe a le aufai faiva.

O lenei tulafono, o le a mafai ai fo’i ona faia ni isi o itu e fa’aleleia atili ai tulaga i faiga faiva, e pei o le fesuiaiga i auala pe a vaaia le fa’aitiitia o i’a i ogasami e fagotaina, fa’atulagaina lea o auala e faia ai fagota i totonu o le tausaga, atoa ai ma le tu’uina atu o auala e usitaia ai e le aufai faiva ma isi tulafono mo le puipuiga o le ola fa’alenatura o le sami.

Na taua e le ali’i faipule ia Young lona fiafia tele, ina ua mafai ona latou galulue ma Aumua fa’apea ai ma le faipule ia Bradley Byrne mole unaia o lenei tulafono taufa’aofi taua, e fesoasoani ai i le fa’amautuina o ta’iala lelei mo faiga faiva i totonu o le atunu’u.