Ads by Google Ads by Google

Lagolago Komesina Faipelega a AS faaiuga Komiti o le Fu’a

Ua fa’aalia e le Komesina o Faipelega a Amerika Samoa, afioga Unasa Leroy Ledoux lona lagolagoina o le fa’aiuga ua mae’a ona faia e le Komiti o Tapenaga o le Fu’a a le malo, mo le Faalapotopotoga o Fusuaga latou te fa’atautaia le ta’amilosaga o faipelega i le va o Samoa ma Amerika Samoa i le taimi o le fu’a.

 

“Afai o lea ua tu’uina atu e le Komiti o le Fu’a le malosi i le Fa’alapotopotoga o fusuaga a Toleafoa Henry Tavake (ASBC) latou te fa’atautaia fusuaga o le fu’a, e tatau la i le Fa’alapotopotoga o Fusuaga o lo o fa’atautaia e Mapu Jamias (ASBF) ona latou aloaia le fa’aiuga lena, ae le tatau ona pisapisao ma taua’imisa fa’apea a o lea e fa’afofoga le atunu’u,” o le saunoaga lea a Unasa i se fa’atalatalanoaga ma le Samoa News ananafi, ina ua fesiligia o ia i sona finagalo e uiga i le mataupu lenei.

 

Saunoa Unasa e fa’apea, ana fa’apea o le Fa’alapotopotoga Fusu a Mapu ma le ASBF lea na muamua tu’u atu i ai e le Komiti o le Fu’a le avanoa latou te fa’atautaia ai fusuaga o le fu’a, na te lagolagoina lava fo’i le fa’aiuga lena.

 

“E le tatau ona toe suia le fa’aiuga ua mae’a ona tu’uina mai e le Komiti o le Fu’a mo le vaega latou te fa’atautaia fusuaga o le fu’a, o se tulaga e le manuia le toe talosaga o se Asosi Fusu e toe sui le fa’aiuga ua mae’a ona taoto,” o le isi lea saunoaga a Unasa.

 

Sa ia taua fo’i e fa’apea, e le avea le tu’u o fusuaga o le fu’a ia Toleafoa ma le ASBC latou te fa’atautaia ma itu e taofia ai fua ta’amilosaga a Mapu ma le ASBF o lo o fuafua e fai mo le vaiaso o le fu’a.

 

“E mafai lava fo’i ona fai fusuaga a le afioga a Mapu ma le ASBF i le vaiaso o le fu’a, e le mafai e se isi ona taofia le tulaga lena, ae mafai lava ona fa’aauau a latou polokalame mo le fa’aleleia o le taleni a fanau, ae pau le itu ia manino, e na o le tasi lava le fusuaga aloaia o le fu’a i le va o le aufusu mai Samoa ma Amerika Samoa nei, e na o le ta’amilosaga lea ua taoto atu ia Toleafoa ma le ASBC latou te fa’atautaia,” o le isi lea saunoaga a Unasa.

 

I le fa’aiuga o le saunoaga a le Unasa, sa ia taua i le leai o se mafua’aga e taofia ai Toleafoa mai lona fa’atautaia o fusuaga i Amerika Samoa, tusa lava po o ia lea e fa’alauiloaina fusuaga faapolofesa.

 

“E leai se afaina i lalo o tulafono tau fusuaga o le fa’atautaia e Toleafoa ma le ASBC o fusuaga i Amerika Samoa, pe afai o latou ia o lo o fa’alauiloaina fusuaga faapolofesa, pau le agaga atoa, ia lelei ma mulimuli i tulafono le fa’atautaiga o ta’aloga i so o se taimi e faia ai, ma ia tausisi i le anavatau o lo o tauave pea, o le atina’e lea o le taleni o tupulaga o le atunu’u,” o le saunoaga fa’ai’u lea a Unasa.

 

O le taeao nei lea ua fa’amoemoe e toe usuia ai le fonotaga a le Komiti o le Fu’a, mo le fa’amautuina o isi fuafuaga mo le fa’amanatuina o le 116 tausaga o le aso fiafia o Tutuila ma Manu’a i le aso Gafua, 18 Aperila 2016.