Ua pasia e le Komiti Soofaatasi o le Paketi a le Fono Faitulafono i le taeao ananafi, le paketi a le malo sa tu’uina atu mo le tausaga tupe fou 2015, ma ua sauni nei maota ta’itasi mo le palotaina o le pili taufaaofi i lona faitauga fa’alua, i le mae’a ai lea o se iloiloga umi sa faia i le taeao ananafi e tusa ai o le paketi a le malo.

E lata i le lua itula o fetufaa’i finagalo o le komiti soofaatasi, pe talia le fautuaga i le faia lea o se suiga i le paketi a le malo, ina ia aveese le $106 miliona mo tupe lotoifale lea o lo o valoia e le malo e tatau ona maua i le tausaga tupe fou ae tuu i ai le $100,000, pe lagolagoina pea le tulaga o lo o i ai le paketi.

Na amata felafolafoaiga a le komiti i se tulaga filemu ma lelei, peita’i e fa’ai’u ane ua amata ona si’i si’i le tai i finagalo o ni isi o sui o le komiti, ona o le naunau lava mo se tulaga lelei i le paketi a le malo.

O le afioga i le alii faipule ia Larry Sanitoa na ia fesiligia taitai o le komiti soofaatasi, pe ua i ai se la suiga ua faataoto mo le paketi, ina ia fuafua atu i ai finagalo o afioga i senatoa ma faipule, ae na saunoa le afioga Laolagi Fonoti Savali Vaeao e fa’apea, talu ai o ripoti mai le Teutupe faapea ai ma le Ofisa o le Paketi a le malo i tulaga o tupe maua faalotoifale a le malo i tausaga tupe ua mavae, ua manatu ai le komiti e sui tupe faalotoifale o lo o valoia e le malo e tatau ona maua mo le tausaga tupe fou, mai le $106 miliona i le $100,000, peita’i o lea finagalo sa tete’e i ai ni isi o sui o le komiti.

Na faamanino atili e Laolagi e fa’apea, e tusa ai o le ripoti mai le Ofisa o le Paketi a le malo, o lo o latou valoia ai le aofaiga e $95 miliona e maua pe a mae’a le tausaga tupe lenei, ae o le ripoti a le Teutupe a le malo, o lo o valoia ai le mafai ona ao e le malo o le $99 miliona.

“O le fautuaga la a taitai komiti, e sili pe a faaitiitia tupe ao faalotoifale a le malo i le $100,000, ina ia talafeagai ma numera o lo o aumai e le teutupe, ae afai e toe lelei mulimuli ane tulaga o tupe maua, e mafai ona toe aumai i le fono se paketi faaopoopo e toe fesoasoani ai i galuega fa’atino a le malo”, o le saunoaga lea a Laolagi na lagolagoina e Magalei Logovi’i ma le peresetene o le Senate ia Gaoteote Palaie Tofau.

Saunoa Magalei e fa’apea, o le taua o le faaaoga o numera o lo o aumai e le teutupe, afai ae tulai mai se faaletonu i le paketi a le malo, e le mafai ona tuuaia le fono aua o le fautuaga mai le teutupe lea ua alu ai le paketi.

Ae na saunoa le fofoga fetalai ia Savali Talavou Ale e fa’apea, e le tatau ona toe faia se suiga i le paketi a le malo, ina nei aafia atu ai ma isi polokalame taua o lo o fuafua le malo e faatino i le tausaga tupe fou.

O ni isi o faipule sa latou talosagaina se avanoa e toe valaau ai le teutupe se’i toe o o atu e fesiligia e faatatau i tupe ao a le malo, peita’i i le fa’aiuga na manumalo ai le faaaoga pea o le tino atoa o le paketi a le malo sa ulufale mai ai.