Ua fa’aalia e ni isi o le itumalo o le Manu’atele lo latou lagolagoina o fuafuaga ua amata fa’agasolo i le taimi nei, i le fa’atuina lea o se isi kamupani va’alele fou na te tautuaina femalagaaiga i le va o Tutuila ma Manu’a.

E ui e le o mautu mai fuafuaga i le taimi nei, peita’i na taua e ni isi o le itumalo i le Samoa News e fa’apea, o taumafaiga uma o lo o taumafai kamupani nei e unaia ma fa’ataunu’uina, “e lagolagoina uma e tagata Manu’a o lo o alala i Tutuila ma Manu’a”.

“Ua pagatia le itumalo i le fa’aletonu o auala o femalagaaiga i luga o le ea, ma ua matou mana’omia se isi fesoasoani televave toe lata mai ina ia mafai ai ona tali manaoga o le itumalo, ma taofia ai lo matou fa’atalitali i malaga a le MV lea e ta’ilua vaiaso ma fa’ataunu’uina”, o le saunoaga lea a Mapu Lene o Manu’a.

Na taua e se tasi o tamali’i o Manu’a e le i finagalo e fa’ailoa lona suafa e fa’apea, o le fa’afitauli o lo o tula’i mai i femalagaaiga i Manu’a, e le o ave uma i ai le faanaunauga o le malo e fa’aleleia, e le o i ai fo’i se fesoasoani a le malo e tuu atu e fa’aleleia ai lea tulaga, ae o lo o tuu tia’i atu lava i taumafaiga a kamupani va’alele o lo o i ai nei, ma o iina lea e atili ai lava ona pagatia le itumalo.

“Na folafola mai lava i le la tausaga o le masina o Aperila faapea o le tausaga nei e amata lele ai le Segaula mo Manu’a, lea ua toe lua masina mae’a le tausaga, a o lenei lava e le o vaaia se Segaula ua lele, afai e le o nei o afea e tupu ai, afai fo’i e le faia e le faigamalo lenei se fesoasoani mo Manu’a, o afea?”, o le saunoaga lea a lea tamali’i o le itumalo.

O se kamupani va’alele fou e taua o le Tusani lea o lo o faia i le taimi nei feutanaiga mo sana tautua mo Manu’a, lea fo’i ua nonofo tatalo le itumalo talosia ae vave mai se aso e mautu ai nei feutanaiga ma amata loa lea auaunaga.

O le mataupu i tulaga tau femalagaaiga i Manu’a i le ea ma le sami, e le o se mataupu e faigofie i finagalo o faipule ma senatoa o Manu’a o lo o latou nofoia nofoa a latou itumalo i totonu o le fono i le taimi nei, ona o le tele o taimi latou te finauina ai le malo ina ia fa’aleleia femalagaaiga i Manu’a, e le gata o le sami ae o le ea fo’i.

E pei ona silafia, e le o toe lelei se va’alele a le Inter Island Airways i Manu’a e pei ona masani ai, ona o lo o i ai se fa’aletonu i le latou va’alele, o le mafua’aga lea na mafua ai ona talosagaina e le kamupani va’alele mai Samoa, le Polenisia se fa’atanaga mai le Vaega e Pulea Femalagaaiga a le Feterale, mo se fa’atanaga e lele ai lana va’alele i Manu’a, lea e pei ona i ai i le taimi nei.

Na taua e le sui o le Inter Island ia Aleki Sene Jr i luma o le maota o sui i se iloiloga sa faia ai i le masina na te’a nei e fa’apea, o lo o i ai le fuafuaga o le aso 17 Novema 2014 e faia ai le asiasiga fa’aiu a le FAA i le tino atoa o le va’alele o le Segaula lea ua lisi atu e le malo i le latou kamupani, ma afua mai ai loa iina ona iloa le aso tonu ma taimi e amata ai loa le tautua a le Segaula mo Manu’a.

Ina ua fesiligia e faipule mai Manu’a le mafua’aga e le i taunuu ai le folafolaga o le masina o Aperila o le tausaga nei e tatau ona amata lele ai le va’alele mo Manu’a, ae na saunoa  le susuga Sene Jr, o ni isi o fa’aletonu i le va’a na mafua ai ona toe tolopo lea fa’amoemoe.

Ae mo le va’alele a le Inter Island, o lo o manaomia se vaega tupe e fa’aleleia ai vaega o le afi o lo o fa’aletonu, ma maua ai se fesoasoani mai le faletupe o Atina’e e pei ona fa’amaonia e Sene Jr i luma o afioga i faipule, lea la ua fuafua e fa’aleleia ai loa vaega o lo o fa’aletonu ina ia mafai ona toe fa’aauau le tautua a le kamupani va’alele mo Manu’a.