Ads by Google Ads by Google

Lagolago VA fuafuaga a le ali’i kovana

Na taua e nisi o sui o le Asosi o Fitafita Tuai e aofia ai ma le latou peresetene lo latou lagolagoina o se fuafuaga ua fa’alauiloa e le ali’i kovana, e avea ai le Asosi o Fitafita Tuai ma se tasi o Matagaluega a le malo.“O se fuafuaga lelei ma atamai ua fa’alauiloa mai e le ali’i kovana mo fitafita tuai, ma o se fa’aiuga fo’i o le a mafai ai ona tu’u fa’atasia le Asosi o Fitafita Tuai ina ia avea ma tino e tasi,” o le saunoaga lea a le afioga Tauiliili Lauifi, le peresetene filifilia o le Asosi a le VA.E ui na taua e Tauiliili le fa’ateia o ia i lea saunoaga a le ali’i kovana, peita’i o lona finagalo, atonu o se fuafuaga o le a auala mai ai nisi fa’amanuiaga mo le vaega o fitafita tuai.Saunoa Tauiliili, sa tatau i le ali’i kovana ona fa’alauiloa muamua lana fuafuaga lea i luga o le televise a’o fa’afofoga i ai fitafita tuai uma lava, ina ia o latou lagonaina ai le taua o lenei fa’amoemoe.Ae i le taumafai ai o le malo e tu’u fa’atasia vaega eseese o fitafita tuai ina ia avea ma tino e tasi, o se fa’aiuga na saunoa ai Tauiliili, ua saili ai i le loloto le tofa ma le utaga mai le ta’ita’i o le atunu’u.“O le tele lava o taimi e le mafai ona tasi vaega eseese o fitafita tuai, aua e eseese uma lava fo’i o latou lagona ma mafaufauga,” o le saunoaga lea a Tauiliili a’o ia taumafai e fa’amatala le ituaiga fitafita tuai o lo’o i ai.“O a’u o le fitafita tuai mai le vaega a le Navy, ma e tasi lava le igoa e tutusa uma ai matou ma isi fo’i fitafita tuai o le Navy, o i latou o Vetereni, ae o isi la vaega, e faigata fo’i ona gatlulue fa’atasi ona o tulaga i o latou suafa matai ma fa’ailoga o lo’o latou umia, ae ui i lea, afai o le finagalo o le ali’i kovana ia tu’u fa’atasia loa fitafita tuai, o lona uiga o se fa’aiuga taua tele ma aoga mo le lumana’i manuia o le Asosi o fitafita tuai,” o le saunoaga lea a Tauiliili.O le isi tulaga lelei o lenei fa’amoemoe, o le a mafai ai ona maua galuega e galulue ai fitafita tuai i totonu o le matagaluega ma vaega eseese, ma o se auala fo’i e tatala ma fa’asoa atu ai fa’amanuia mo le lumana’i mamuia o le asosi o fitafita tuai.O le tausaga e 2007 na tofia ai le afioga Tauiliili e avea ma peresetene o le VA, ma o lo’o ia tauaveina pea lea tofiga seia o’o mai i le taimi nei.