Ads by Google Ads by Google

10 Au Fa'aiuaso Laumua o le Sega'ula - Manu'a High 2019

O se vaaiga i le laina o tama'ita'i ma ali'i fa'au'u mai le Manu'a High 2019. Ua mae'a fo'i ona fa'aula i latou ma ua fa'afiafiaina tele matua ua mae'a le latou taumafai. [ata: Leua Aiono Frost]

Ta'u, MANUA — E to'a sefulu le ‘au fa’au’u a le A'oga Maualuluga a Manu’a, le laumua o le Segaula, mo lenei tausaga. O i latou ua mae'a lu'ia i le fa'amoemoe "Ua fa'apopo aso ua, ae le tu'ua aso Folau!"

O le fa'au'uga sa fa’atulaga mo le aso Faraile ua te’a, peita'i na toe suia ona o fetu'una'iga tau feoa'iga i le ea, ina ia mafai ona fa'atasi atu sui o le Malo. Ma o lea sa faia ai i le aso Tofi ua te’a.

O tala o fa’auuga o lenei tausaga a le Samoa News o lo’o lagolagoina e le Paramount Builders Inc.

O nisi o i latou sa auai e aofia ai le Lutena Kovana, Lemanu Peleti Mauga, faipule o Amerika Samoa i le Konekeresi, Aumua Amata, Fa'atonu sili o a'oga Dr Ruth Matagi- Tofiga ma le sui Fa'atonu o A'oga Fa'auifono Vaitautolu.

Tama'ita'i na togisilia o le au fa’au’u o le tama'ita'i mai Fitiuta, Melody Ve'e. E tele ni tauvaga a a'oga maualuluga na auai o ia e suia le Manu'a High ae maise fo'i o lona auai lea o se totino o le Close Up. O lana GPA e 3.983 ma lana SAT 1590. O ia fo'i ua filifili e tautua i le US Army. Lautogia fo’i e le Komiti o le Sikolasipi malo e aoga i le Kolisi Tu'ufa'atasi o Amerika Samoa.

Melody Ve'e Fitiuta

Tama'ita'i tulaga lua o Olive Tagaloa mai Fitiuta fo'i.O ia fo'i sa fai ma sui o le Manu'a High i tauvaga a le Matematika, tauvaga Speech Festival ma e lua fo'i tausaga o malaga o ia o se totino o le Close Up. O ia o le sui Peresetene o le NHS, ma o lana sikoa i le SAT 1330, ma lana GPA e 3.972. Ua avea fo'i o ia ma fitafita talavou a le US Army pe a mae'a lona fa'au'uga ae malaga loa i lana BCT, ma ua filifili e avea ma Fitafita Tuite.

Olive Tagaloa

Ina ua tula'i Lemanu mo lana saunoaga fa'apitoa sa ia fa'ailoa, e le faigofie ona tu'ua e i latou aiga ma nu'u ae maise lo latou mitamitaga o le Manu'atele, ae i ai le galuega e tatau lava ona fai, e tatau ona tu'ua le mafutaga, ae saili faiva, ia mautinoa ua i ai se sao e toe taliu mai ma i latou pe a o'o ina mae'a ma tini fa'amoemoega na. O le vala lona lua lea o le fa'aupuga, ua fai ma autu o le aso o le fanau fa'au'u. "Ia fa'apopo aso ua, ae le tu'ua aso folau!"

Sa fa’amanatu e Lemanu upu o se pese malie ma le anoa o ona fa'aupuga, "A sousou le vasa o le olaga nei, ma ua faiaina i le fa'avaivai, mafaufau i mea e te manuia ai! Aua lava ne'i tu'ua le Atua i le folauga, taumafai i le mea e gata ai, e le mafai ona le maua sou 'ai lelei e te toe fo'i mai i lou vaifanua ma oe."

O le fofoga fa'apitoa mo le fa'au'uga sa tuu ia Vaitautolu, o se tasi fa’au’u mai Manu’a High ma e to’a 88 i latou na fa’au’u ai, ma e le'i toe mafaia lava ona ausia le faitauga i vasega uma lava ua fa'au'u mai le Manu'atele e o'o mai i lenei tausaga.

"E le'i faigofie ona matou tautala i le fa'aperetania po'o le Igilisi. Ae matua fa'asa lava ona tautala mai se faia'oga ia i matou i le fa'asamoa, ona o le naunau ia fa'amasani e tautala i le Igilisi. Talofa e ui ina vaivai, fefe e tautala ina ne'i sese ulagia ita ma si ota aiga, ae sa fai lava. Lea ua tula'i atu e tautua le Matagaluega o A'oga, ae sa maua i le mea lea o lo'o o'o atu i fafo, ae matua fefe e tautala atu, na'o le fa'alologo ma le gugu, ae tatalo ona o le vaivai ina ia 'aua nei fo'i fua mai le taumafaiga, fa'afetai i le Atua o fua nei o talosaga, ua iloa ai nanu ma pasi a'oga i fafo.”

"Aua ne'i e fefe e fa'afeto'ai fa'afitauli e o'o mai, fai i ai le loto na e tu'ua ai le malu o lou aiga, ae taumafai se manuia. Aua ne'i e fefe, aua nei e fa'agalo le mafuaga na e alu atu ai e tausaili, ae fa'auma le fa'amoemoe, ma toe fo'i mai i lou nu'u ma lou aiga, fai se 'ai o lou alu ese atu ai. Le uiga tonu lea o le "Fa'apopo le aso ua, ae le tu'ua aso folau."

Suafa o le ‘au fa’au’u: Melody Ve'e; Olive Tagaloa; Aolealealemaloosasa'e Mauga; D'Andre Siimalevai; Aosolotualemaloosasa'e Mauga; Aleli Nua, Faith Autele, Selina Samuelu, Pesaleli Maui; Tumusa Te'i.