SEATTLE, Washington - (Samoa News) - Ua mae’a fa’ailoa mai e le susuga Vladivar Diaz o le Pulega a le Taylor Farms, “Ua to’ai taunuu mai nei le isi 48 o tagata ua mae’a agava’a e faigaluega i le latou lala i Kent, Washington ma ua mae’a mai ai le to’atele o tagata faigaluega o mo’omia tele mo matou sifi o galuega aua le gaosiga o Mea’ai Paleni, i lenei vaitau.” 

Mai lea afiafi na toai taunuu mai ai le aumalaga to’atele lenei, sa matua masi’i atu fo’i le fala masiigata a le ali’i peresetene o le Kamupani David Lawrence ina ia fa’atasia ma le isi vaega uma o le pulega, Vladivar Diaz ma Bernard McFarland e fa’afeiloa’ia i latou i le malae va’alele ma aumaia ai i latou i lo latou ofisa mo le tausiga matagofie ua mea’a tapena, ma soso’o ai ma le fa’asoa atu i latou potu e alaala tumau ai.

Ua le gata i le aufaigaluega ma le pulega a le Taylor Farms ae ua fa’atasi atu foi ma nisi o Asosi agalelei a alo ma fanau a Samoa o lo’o alaala i Washington ina ia latou fesoasoani i le  la’uina mai o le aumalaga ma latou uta mai le Malaeva’alele seia oo i le Ofisa Autu o le Taylor Farms ma le latou faletalimalo e nonofo lelei ai ma faigaluega.

O Asosi ma Fa’alapotopotoga sa auai e aofia ai le Muamua Le Atua Car Club, Dynasty Car Club, Lend a Hand Foundation lea sa latou foa’ia ane ta’avale e la’u ai uta a le aumalaga mai le malaeva’alele i le faletalimalo.

Ua fa’aauaua lava fo’i lenei taumafaiga e fa’auia atu soo se ituaiga o fesoasoani mo le aumalaga fou. Ua mae’a maua siaki totogi muamua a le aumalaga na muamua fa’ato’ai mai, ua sologa lelei fo’i le latou olaga faigaluega, ae mautinoa lava sa i ai nai fa’afitauli tau lagona o le tagata lava ia, sa amata mai le taumafaiga o taumafai nisi e fa’agalogalo pelega iinei, ae o lea ua tepa i latou i le matagofie na o mai e saili. 

Fa’ailoa mai e le tina ia Telesia, “Ua to’afilemu lava le agaga latou, ua va’aia le fua o le lua vaiaso ua te’a atu, ua iloga le eseesega o le tamaoaiga ua maua nai lo le mea sa taumafai i ai i Samoa, ma ua iloga e aoga ona tulituli matagau le faamoemoe na tu’ua ai aiga. O se mea lelei e mafai ona faia, ma e onosa’i fo’i ia maua, ona faigofie lava lea ona faia se isi fa’aiuga i le olaga taumafai iinei pe toe fo’i i aiga, pe a maea le taimi atofa mo lenei konekerate.”

“O lenei ua mae’a lesitalaina le afa o le vaega fou lenei, ae ua fa’asoa atu i latou i sifi ina ia mafai ona amata galulue mautu ai i le vaiaso a sau. Ua iloga e matua lelei lava le aufaigaluega fou mai Samoa i le tulaga o le galuega, vave le pu’e ma e agava’a ua masani i le gaosiga o mea taumafa nei e tuufa’atasia ma fa’apepa e le Taylor Farms iinei. O le mea e tatau ona matua mautu, o le taumafaiga lea ia masani ma le tau, ma ia fa’alavalavaina i latou i la’ei e tausia lelei ai lo latou soifua maloloina,” o se tala lea a Diaz e tusa ai o le aumalaga fou ua to’ai taunuu i le taeao o le aso Tofi na te’a nei.

“O le aufaigaluega foi lea sa aumaia muamua, ua alu ma le atoa le galulue, pei lava ua leva ona faigaluega ma ua ese ai fo’i le vave o le galuega. Peita’i, afai ae toe soso’o mai ma le vaega fou lenei, ua iloga ua amata ona mautu mai le fa’anaunauga na mafua ai ona taumafai e aumaia se aufaigaluega mai Samoa,” o sana toe fa’aopoopo mai lea e tusa o le aufaigaluega ua mautu mai nei.

Ina nua fesiligia i se isi soso’oga mai o le isi aufaigaluega o totoe, ae fa’ailoa mai loa e Diaz, “Ua mautu mai lea vaega tele o le aufaigaluega, ua iloga le malolosi o i latou ua i ai nei, ae ua fa’atulaga se masina e tasi o Oketopa o le a toe taga’i lelei ai i le gaoioi ma le tulaga o le seleni a le Kamupani pe a mai, ae o le va’aiga lautele, e le’i lava le aufaigaluega.”

“O le ala lea ua taofia ai nisi toe tusi talosaga mai i avanoa i Amerika Samoa, ae ua lava le aotelega o isi talosaga ua mae’a umia e i matou, ina ia toe saunia ai se isi aufaigaluega e malaga mai ia Novema, pe afai o le a mae’a va’ai toto’a i le seleni ma le galeuga ua fa’atautaia nei, pe ua talafeagai ma le isi soso’oga o le aumalaga mai.”

O le avanoa ua maua nei e lenei vaega o fanau a le atunuu, o se avanoa lelei, pe afai e malaga mai lava le tagata latou ua mae’a fa’amautu i lona mafaufau e fia ausia e ia se fesoasoani lelei mo lona aiga i Samoa. O lona uiga, afai e te le o manatu ia faia se sao lelei mo lou aiga, sili pe a tuu le avanoa mo se isi e malaga mai ai.

“O le tala moni, ua iloga le aoga o le filifiliga a i matou e aumaia tagata faigaluega mai Amerika Samoa. Ua iloga mai e faigofie ia i latou le galuega, vave ma e le o vaivai gofie i latou i a latou sifi. O le mea e mautinoa e le o lava le matou aufaigaluega, e tauau lava e toe tatala le avanoa mo Novema 2021,” o se tala mautinoa lea a Diaz.

Peita’i i le taimi ua mae’a ai ona tuufa’atasia lenei fa’amatalaga muamua na tuuina mai e Diaz mo lenei fa’asalalauga, ae toe fa’ailoa mai loa i sana talanoa mai i le telefoni, “Ua mae’a le ma’ua talanoaga ma le peresetene o le Kamupani, ua toe manatu ia toe aumaia lava le isi 35 o tagata faigaluega ia Oketopa 14, ma mae’a ai loa ae faia le sailiga poo a mai le poloketi ma toe faia ai se fa’aiuga i le amataga o le tausaga fou.” 

O lona uiga toe tasi le malaga e to’a 35 i latou o mo’omia pea, ona mae’a ai lea o le taumafaiga i lenei tausaga, ae toe taga’i toto’a i ai pe a mae’a le vaitau fiafia o le tausaga  se’ia oo i le 2022.

Ua i ai se fa’afitauli ua va’aia i luga o upega tafailagi o le Itulau o tapena mo le fa’amoemoe e feso’ota’i ai ma aiga i Samoa. Ua iloga mai ua faaaogaina e nisi e tau sailia mai ai le latou alo, ae o lea e le’i to’ai taunuu mai le faigamalaga lea ua fa’ato’a talimalo ai le kamupani”

“Ia to’a mai le tai o finagalo o matua ma aiga, aua le so’ona popole ae le’i to’ai taunuu le aumalaga, ua mae’a tapena mea uma e pei ona fa’apupula atu e faia muamua mo fanau, ona fa’ato’a tuua lea ia i latou le avanoa e talanoa atu ai i aiga, o lea ua to’ai taunuu ma ua amata faigaluega. I lenei aso ma ananafi, sa faia le mea e ao ina faia, fa’amautu latou olaga faigaluega ma faaau’upegaina i latou i mea faigaluega mo faiva, ona fa’ato’a maua lea o se paganoa e talanoa atu ai i aiga ma e pele ia i latou ua tu’ua nei o le fa’amoemoe ua malaga mai ai.”

O le mea ua tupu mai ua sailia le tamaititi ua fa’ato’a sau i Amerika, ae o lea lava e le’i oo mai le malaga. Ua tele ai fevesia’iga ma fa’amatalaga e le talafeagai ua fa’aalu i nei ala o feso’ota’iga. Tau taofiofi mai o lea e fa’ato’a fa’ato’ai mai, faia mea e nonofo lelei ai, ma faigaluega ona mautu lea o ala o feso’ota’iga.

Talosagaina ai aiga, mai le susuga Bernard McFarland, “Alofagia fa’ato’ato’a mai o outou o matua ma aiga e malu ai a outou fanau i le malaga o masi’i mai ai. A oo fo’i ia te outou le manuia, ae le’o fa’afaletulu’ia i upu ma fa’amatalaga. O lo’o manuia mea uma, ma ia alofagia e le Atua la outou tapua’iga. O le tama usita’i lava ia te outou, e usita’i fo’i i fa’atonuga ma aiaiga ua sau ai nei, e le vale fo’i le taui e tatou te tofu maua.”

Ua mae’a fa’atulaga fo’i le aso i afiafi ta’itasi o le a fa’auia ai le tele o tapenaga o fesoasoani mai Asosi ma Kalapu ae maise o fa’alapotopotoga a alo ma fanau a Samoa iinei mo lenei vaega o le aumalaga, ae maise o lo ua le manofo fo’i aiga, ua logotala o latou tagata e aiga i ai o lo’o malaga mai, ua manatu ina ia latou asia mai le aumalaga.