Vaega e 31

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le soso’oga  o le tatou Fagogo, “O LE AU USO NA LEILOLOA”,  i lona vaega e 31.

********************************************

I le u’una’iga a Lave, na savali tu ai Sosefina i se tamaititi sa nofonofo mai i leisi itu o le vaitafe ma matamata mai ia la’ua.

“O ai lou igoa?” o le fesili atu lea a Sosefina ina ua latalata atu i le tamaititi.

“O a’u o Eti,” o le tali mai lea a le tamaititi.

“E iai se mea e mafai ona ou faia mo oe, Eti?” o le toe fesili atu lea a Sosefina, i le tamaititi.

“E mafai ona ta sisiva?” o le tali lea a le tamaititi, na matua’i fa’ate’ia tele ai Sosefina.

Ua ‘ata leotele ia le teine o Sosefina ma ia faapea atu i le tamaititi, “Talosia e le fasi ai a’u e lau teine, pe a ta sisiva.”

E le’i umi ona sisiva ia le teine o Sosefina ma le tamaititi, ae po po atu e Lave ia le tau’au a le tamaititi ma ia faapea, “E mafai lava ona ou siva ma lau teine?”

Ua ata le tamaititi ma ia fa’ama’amulu lima a Sosefina ma tamo’e ‘ese atu.

Ina ua mae’a le siva a Sosefina ma Lave, na amata loa ona savali Sosefina, agai i le latou fale.  A’o mulimuli atu ia le alii o Lave.

O lena po, sa taoto ifo le tamaitai o Sosefina e moe, ma lona loto fiafia.

Ae o le taeao na soso’o ai, na ia toe manatua ai, e pei o se vai malulu na sasa’a i luga o lona ulu, ia le fa’ai’uga o le u’uina e lona uso masaga, o Selesitila, o le ua a le Perenise.  Lea ua lu’i ai e le Perenise ia Selesitila, i se la tauga pelu, i le lua aso e soso’o ai.

[E FAIA PEA]