“O LE SAU’AI MANA’O LASI”

I aso a la ua leva, a’o feoa’i Sau’ai i luga o le foga’ele’ele, sa iai se Sau’ai, e igoa ia Peteru, sa iai sana togala’au matagofie lava.

O le vao e fa’ata’amilo i le fale ma le togala’au a le Sau’ai lenei o Peteru, e pei o se ‘ie mamoe i le tago, ae o fugalaau o lona togala’au, e le gata ina fuga mai ai ni fugala’au pito sili ona matagofie, ae faapea le manogi lelei.

O se toga la’au e fiafia ai manulele, e tutu ai ma pepese.

I se tasi aso, na alu malaga ai ia le Sau’ai o Peteru, i se nu’u tuaoi.  Sa fais sina umi o alu ia Peteru.  Ina ua iloa e tamaiti o se a’oga, i le nu’u tuaoi, ua leva ona alu ‘ese ia Peteru mai lona fale, sa faapea loa ona fai ma latou, ia le tu’ua o a’oga, ma o mai i le ta’a’alo i le togalaau a le alii Sau’ai.

Ua o’o i seisi aso, ua toe fo’i mai le Sau’ai o Peteru, i lona fale ma ina ua ia va’aia ia tamaiti a’oga o ta’a’alo ma nofonofo i lalo o ana la’au, ua ita le Sau’ai.

Na ‘e’e leotele atu i taimi, e o ese ma lona togala’au.

Sa tamomo’e ese ia tamaiti mai i le togala’au ona o le fefefe tele.

O le taeao na soso’o ai, sa fau ai loa e le ali’i Sau’ai o Peteru, ia se pa, e faata’amilo i lona fale ma lana togala’au, ma tu’u ai ma se fa’atonuga, Ua Fa’asa ni tamaiti ona toe o atu i totonu o lona togala’au.

Ua va’aia e manu felelei le le toe manaia o le togala’au, ona ua le toe faalogoina ia leo fiafia a tamaiti sa ta’a’alo ai.  O le mea lea, ua le toe ofaga mai manulele i le faatoaga a le Sau’ai o Peteru.  Ina ua le toe iai ni manu felelei, e pepese ma felelei solo i luga o fugalaau, ua amata ona le toe fuga mai la’au, e pei ua fa’anoanoa tele ia la’au.

A’o nofonofo le alii Sau’ai o Peteru ma ia tilotilo atu i lona togala’au, sa ia va’aia ai le le toe iai o se agaga fiafia, i totonu o lona togala’au.  Ua amata ona pe pe ana la’au.

Na lagona e Peteru lona salamo, ona ua na mate’ia le mafua’aga e ola lauusiusi ai ana la’au ma fuga mai ai ni fugala’au matagofie, ona o manu felelei ma leo fiafia o tamaiti.

O lea na ia tago ai loa, ua toe tatala i lalo lana pa ma vala’au atu i tamaiti, e o mai e ta’a’alo i lana togalaau.

Ina ua toe lagona le tagi o manulele i totonu o lona togalaau ma leo fiafia o tamaiti sa ta’a’alo ai, na amata ona toe fuga mai la’au o le togalaau ma avea ma se nofoaga fiafia.

[IA MANUIA FUAFUAGA UMA O TOTOE I LE FAAIUGA O LENEI VAIASO]