O LE I’A MA LE MEAALOFA

Na iai se alii e valu tausaga e igoa ia Iosefa.  O lona tama o se alii faifaiva.  I se tasi o vaveao, sa tapena ai se faiva a le tama o Iosefa.  Sa faatopetope lava ona tapenapena le faiva a le tama a Iosefa, ina ne’i vave ona malamalama le aso.

Ae e le’i alu ese lona tama, sa ia faapea ifo ia Iosefa, “O le aso, o le a ou pu’eina mai ai sau I’a ma aumai sau meaalofa, pe a ou toe fo’i mai.”

Oka, ua leiloa le mea ua o’o ai le fiafia tele o Iosefa i le tala a lona tama.  O le i’a ma sana meaalofa, lea o le a toe fo’i mai ma si ona tama.

Ua aga’i atu nei le tamaloa o Fili i le matafaga ae ona toe fa’alogo mai lava i le valaau atu a si ona atalii o Iosefa, “O le a la’u meaalofa lena o le a sau ma oe?”

“E te va’ai lava iai pe a ou toe fo’i mai!” o le valaau mai lea a le tamaloa o Fili i lona atalii.  “Ae faatali faalelei atu.”

E taunu’u atu le tamaloa o Fili i le mea e masani ona fagota ai, ua leva ona iai nisi alii faifaiva o lo’o tapenapena mai a latou kili, o a latou va’a.  Ma ua fa’alogologo i le agi mai o le savili.

Ua faapea foi ona punou ma le tamaloa o Fili e sauniuni ana mea fagota ma amata loa ona alo atu lana va’a i gatai.

Ae o le taimi lea i le alii o Iosefa, ua le manofo lelei i le latou fale.  E fai lava ana feau ae fai lava ma tilotilo aga’i i luga o le lagi ma mafaufau “O se i’a ma se meaalofa”.  “Mata o le a la’u meaalofa o le a aumai e Papa mai i le sami?” O manatunatuga ia a Iosefa.

O le taimi lea o lo’o tatoso mai ai neti fagota a le tamaloa o Fili ma isi alii faifaiva.  Ma na maua mai ai se latou malie, o ni fugafuga ma le tele o nisi figota ma i’a o le sami.

Ua amata ona a’asa le vevela o le la ma ua iloa foi e Fili ma isi tamaloloa ua tatau ona toe fo’i ifo i le pa’u matu.  Ma ua faapena foi ona toe tapena a latou a’upega ma amata ona toe aga’i mai i le matafaga.

Na iloa mamao mai lava e le alii o Iosefa le savali atu a si ona tama ma lana faiva o le aso.  Ua togi i lalo e Iosefa ana mea ta’alo sa ta’alo ai, ae tamo’e mai ma le atoa e fa’afetaui lona tama.

“Papa! Papa! na se sau ma la’u meaalofa?  O le a la’u meaalofa?” o le valavala’au atu lea a Iosefa ma tamo’e atu e fa’afetaui lona tama.

Ua ata leotele le tamaloa o Fili ma ia faapea, “Onosa’i se’i o ta o’o i le fale.”

“Savali mai i’I o lena ua toeititi pa’u I’a o le faiva!” o le valaau mai lea o le tina a Iosefa ma ata.

Ua le manofo lelei le alii o Iosefa ae ua sivasiva solo.

“Ia Iosefa, o ananei sa o matou maua ai se malie tele lava,” o le tala lea a le tamaloa o Fili i lona atalii.  “O lau i’a lena ua ou sau ma a’u. Ae mo lau meaalofa…”

Na a’apa ifo le tamaloa o Fili i totonu o lana ato ma ia se’i mai i fafo, se nifo o le malie ma ia tu’uina atu loa ia Iosefa.

[IA MANUIA TOE FUAFUAGA O LENEI VAIASO]