O SE TOEAINA MA LANA TUPUA

I aso lava la ua leva, na iai se tamaloa e igoa ia Aukuso sa fai sana pisinisi e fa’atau ai fagu uaina.  Sa nonofo faatasi Aukuso ma si ona to’alua o Nina ma si a la tama teine e lua tausaga.

Ua o’o i se tasi aso, a’o pisi lava le fafine o Nina i totonu o le umukuka, a’o ta’alo le teineititi i totonu o le fa’ato’aga la’au, sa osofa’ia le fale e se tagata ma ia ave faapagotaina ai le teineititi.

E lima tausaga o fetagisi o tau saili e Aukuso ma Nina si a la tama teine.  Ae paga lea, ua le toe maua o ia.

O se tasi o afiafi a’o savalivali le tamaloa o Aukuso i luga o le auala tele, sa ia tau mai ai i se tamaititi, pe a ma le fitu tausaga, o tagi i autafa o le auala.

“O le a le mea ua tupu?” o le fesili atu lea a Aukuso i le tamaititi.

“Faamolemole lava lau susuga, pe iai sau fasi meaai mo a’u, ua ou fia ‘ai lava,” o le tagi tautalatala lea a le tamaititi.

“Talofa e, ia sau ta o i le matou fale, atonu ua mae’a ona kuka e tina se meaai,” o le faapea atu lea a Aukuso i le tamaititi.

“Ae o fea lou tina?” o le fesili lea a Aukuso.

“Ua lua aso talu ona maliu o ia,” o le tali mai lea a le tamaititi.

“Ae a lou tama?” o le toe fesili atu lea a Aukuso.

“Ou te le iloa lo’u tama.  O le lua o o’u tausaga na ia tu’ua ai i ma’ua ma lo’u tina,” o le toe tali mai lea a le tamaititi.

A’o la savalivali, na a’e sa manatu ia Aukuso e la te vaetamaina le tamaititi e fai ma a la tama.  Ae e tatau ona ia fesili muamua i lona to’alua.  Na matua’i fiafia le loto o Aukuso ina ua ia va’aia le talia lelei e Nina o le tamaititi ma le alofa na fa’aalia e Nina i le tamaititi.

Ua faapea loa ona malilie Aukuso ma Nina e la te vaetamaina le tamaititi o Siaosi ma o se aiga fiafia lenei aiga mo se taimi umi lava, a’o tuputupu a’e ia Siaosi.

Ina ua matua Siaosi ma faamae’aina uma ana aoaoga, sa faapea ona aoaoina iai e Aukuso tulaga o lana pisinisi.  Ae ui i lea, sa le’i fiafia tele Siaosi i le galuega a le tamaloa o Aukuso.  Na mana’o Siaosi i se pisinisi ia tele ai tupe a ona matua.

O le mea lea na tu’uina loa iai e Aukuso se vaega o le ‘oa mai i lana pisinisi ina ia sa’oloto ai Siaosi e saili le galuega e fiafia iai.

Ua alu loa Siaosi i le faatau ni vao ma fa’atauina atu ma na va’aia e Siaosi le tele o le polofiti mai i le faatauga o vao.  O le mea lea na ia toe fa’atau ai nisi vao se tele ma faapea ona toe fa’atauina atu ma sa sili atu sana tupe maua, na mafai ai ona ia fa’atauina se solofanua.

Ma na fa’aapena ona fa’amanuiaina ai le galuega a le alii o Siaosi.

Ae e ui lava i faamanuiaga i totonu o le aiga a le tamaloa o Aukuso ma si ona to’alua o Nina, ae peitai, sa le’i fa’agaloina lava e la’ua ia si a la tama teine lea na gaoia i le lua o ona tausaga.

Ma o le tele o taimi, e va’aia ai lava e Siaosi foliga faanoanoa ia a ona matua, e ui lava i le la taumafaiga ina ia nana o la lagona faanoanoa.

Ua tupu ma ola le pisinisi a Siaosi ma sa ia fausia ai loa se fale tele i luga o se a’ega ma ia tauanauina ai ona matua fai e o atu e latou te nonofo ai i lona fale fou.

Na faapea loa ona faatauina e Aukuso lana pisinisi uaina, ae ua o atu nei ma Nina ma o latou nonofo faatasi ma Siaosi i lona fale fou.

I se tasi o aso Sa, a’o faia le taumafataga o le afiafi a le aiga, sa tu’itu’i mai ai se tagata i le faitoto’a.  Ua alu atu nei Siaosi ma tatala le faitoto’a ma va’aia ai se turisi o tu mai i le faitoto’a ma ia talosagaina se potu e mafai ona malolo ai.

O lenei turisi o se tama matua ma lona lauulu sinasina.

Ua fa’aafe o ia e Siaosi i totonu o le fale ma ta’ita’I atu o ia i luga o le laulau ‘ai lea o le a fai ai le latou mea’ai o le afiafi.

Na fa’aalia le agaga fiafia ma le fa’afetai o le toeaina ona sa umi se mea na malaga mai ai ma ua galala i le fia ‘ai.

I lea afiafi, ina ua tu’umuli uma atu tagata o le aiga ma le toeaina i o latou potu mo malologa o le afiafi, na saofa’i ifo ai le fafine o Nina i luga o le nofoa i totonu o le potu malolo ma sioa aga’i i fafo o le fa’amalama, ma fa’asolo ona mafaufauga i si ana tama teine lea na gaoia i le lua o ona tausaga.

Ua amata ona maligi loimata o le fafine o Nina ma ia faapea ifo, “O le a le mea ua tupu i si a’u tama teine.”

Na te’i Nina ina ua fesili atu se tagata, “Na iai sou alo tamaitai?” ma ia tepa ane i ona autafa, o tu ai le toeaina lea na alu atu i lea afiafi.

Ua tago loa Nina ma faamatala i le toeaina ia si a la tama teine ma le mea na tupu ia te ia i le lua o ona tausaga.

A’o fa’agasolo le faamatalaga a Nina, sa ia va’aia le tago ifo o le toeaina ma toso i fafo sana solosolo ma solo ai lona muaulu e foliga mai ua vevela le fale, ae peitai, e le o lagona e Nina se vevela e na o le ea malulu o lo’o ola i totonu o le fale.

O le fa’ai’uga o le faamatalaga a Nina, sa toe fa’ate’ia ai o ia ina ua pa’u ifo i lalo ia le toeaina e pei ua matapogia. 

Ua valaau atu nei Nina i le tamaloa o Aukuso faapea ma le tama o Siaosi e o mai e si’i le toeaina i luga o le nofoa. 

E fetagofi atu ia Aukuso ma Siaosi e si’i le toeaina i luga o le nofoa, ae pupula mata o le toeaina ma faapea mai ma le leotele “Sesilia”, ona toe moe lea.

O le vaveao o le taeao na soso’o ai, na usupo ai lava Siaosi e ave ana vao e fa’atau.  Na fa’ate’ia o ia ina ua mamao teisi atu lava lana ta’avale toso mai i le latou fale, ae ona va’aia ai le toeaina o tu i le moa o le auala.

Ua faatu e Siaosi ia lana taavale ma oso i fafo ma savali atu i le toeaina.  Ae faapea mai iai le toeaina, “E iai se mea ou te fia ta’uina atu ia te oe, ae ou te le’i mana’o e lagona e ou matua.”

Ua ta’ita’i atu nei e le toeaina ia Siaosi i totonu o se vaega o le togavao i se mea o iai se ana tele lava.  Na fesili atu ia le toeaina ia Siaosi, “O lea ou te iloa le mea o iai le tama teine a le ulugalii lea e ta’u o ou matua.”

Ua oso atu Siaosi ma fesili po o fea o iai ma po o ai sa na aveina le teine.  Ae tali mai le toeaina, “E mafai ona ou ta’uina atu pe afai e te folafola mai o le a e faamagaloina le tagata sa avea le teineititi.”

“O ai? O ai na avea o ia?” o le toe fesili atu lea a Siaosi.

“O a’u.  O a’u na gaoia le tama a ou matua, a’o itiiti o ia.” O le tali mai lea a le toeaina.

[IA MANUIA FUAFUAGA O TOTOE O LENEI VAIASO]