VAEGA 53

E toe fa’atalofa atu i a tatou pa’aga i so’o se tulimanu o le kelopo o lo’o maua mai ai lenei auaunaga.  Aemaise i nai o tatou tama ma tina matutua i Amerika Samoa.

E tatou te tau fai si’i faatasi ia le viiga ma le mua, i lo tatou Tapa’au Sili i le Lagi, ona o Lana pule faasoifua ma Lana tausiga alofa, ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’etaga malu, mo le fa’aauauina o le tatou Fagogo.

**************************************

Ua feosofi ia le tamaitai pese o Repeka ma lana failautusi, o Susana, o le teine o Selema ma lona lima taumatau, le tamaitai o Lula, i totonu o se taavale.  Ae tatagi le telefoni a Selema.

“O fea oe?” o le fesili mai lea a Tomasi i luga o le telefoni.

“O lea ou te i totonu o le taavale,” o le tali atu lea a Selema.  “A’o fea oe?”

“O lea ou te faatalitali i le a’oga e sau seisi e piki a’u,” o le tali mai a le tamaititi o Tomasi.

“O la ua tatala i tua lou tina, na tatala mai i tua analela,” o le faapea atu lea a Selema.

“O lea e leisi seisi ua sau,” o le toe tali mai a Tomasi.

“Ia faatali iina se’i o’u valaau iai,” o le faatonuga lea a Selema.

Ua tago Selema i le o’omi ni numera i luga o lana telefoni.

“O le a?” o le tali mai lea a le tuagane a Lina, le tina a Timoteo.

“O fea Lina?  O la e fiu ia Tomasi e faatali mai i le falea’oga,” o le faapea atu lea a Selema.

“Ua atoa le itula talu ona alu Lina.  Ai o tu i se faleoloa,” o le toe tali mai lea a lona tuagane i luga o le telefoni.

E le’i uma lelei mai le tali a le tuagane a Lina, ae toe faapea mai ma le leo ua tumu i le popole, “So’u alu!”  Ma tapuni mai ma le telefoni.

Ona valaau loa lea o Selema ia Mikaele.  “E iai le mea ua tupu ia Lina,” o le fai atu lea a Selema, ina ua tali mai e Mikaele ia le telefoni.

“O lea na valaau mai Tomasi, e le’i alu atu seisi e piki o ia mai i le aoga, ae lea na fai mai le tuagane a Lina, ua atoa le itula talu ona alu ese mai i le fale, e piki Tomasi,” o le faamatala atu lea e Selema o le mea ua tupu.

“E le mafai, o lea ou te faigaluega.  Alu oe e piki mai,” o le tali mai a Selema.

[E FAIA PEA]