Pago Pago - AMERIKA SAMOA

E tusa ai ma fa’amaumauga o le su’esu’ega o pisinisi o le 2022 a Amerika Samoa (2022 Economic Census of American Samoa) lea sa tatalaina mai i tua e le ofisa o faamaumauga a le Iunaite Setete (US Census Bureau), i le amataga o lenei vaiaso, o lo’o ua fa’aalia ai le iai o se faaopoopoga i pisinisi a le teritori ma isi faitauga o pisinisi i le tele o vaega o le tamaoaiga, pe a faatusatusa atu i le census lea sa faamaumauina i le 2017.

O so’o se pisinisi lava e iai se tagata faigaluega se to’atasi, pe sili foi, o lo’o fa’amalosia i le tulafono le tatau ona tali fesili o le ‘census’.

O lenei su’esu’ega e ta’i lima tausaga ma faataunu’uina ma e fa’ailoa mai ai se ata manino o pisinisi, faatauga ma isi tulaga tau pisinisi i totonu o atunu’u ma malo.

O lo’o ta’ua i ripoti o le ‘Economic Census’ o le 2022 a Amerika Samoa, le faavaeina o ni pisinisi se 593 i totonu o le teritori, i lea tausaga, na aofia ai ma kamupani gaosi apa i’a.

E to’a 8,999 tagata faigaluega na iai ma o le faitau aofa’i o totogi, e $163.9 miliona.

Ae i se su’esu’ega (census) na faia i le lima tausaga muamua atu, i le 2017, sa na o le 511 pisinisi na iai i totonu o Amerika Samoa, ae to’a 7,767 tagata faigaluega ma faitau aofa’i o totogi, e $143.9 milion.

Pe a fa’atusatusa fa’amaumauga nei e lua, ua fa’aalia ai le iai o se siitaga e 82 o pisinisi faaopoopo, ma si’itaga o tupe fa’aalu i totogi, e $20 miliona, i le va o le lima tausaga.

O nei fa’amaumauga sa folasia i luma o vaega fa’asalalau, i se fonotaga na faia i le potu fono a le Ofisa o Fefaatauaiga, lea na auai ai vaega fa’asalalau ma nisi o sui e to’alua mai i le ‘US Census Bureau, o Michael Sprung ma Robert Nusz.

I le amataga o le folasaga a sui mai i le ‘US Census Bureau’ sa fa’amalamalama mai ai e Nusz ia le uiga o le ‘economic census’.  Ma o lenei gaioiga, o se faitauga po o suesuega e faia i pisinisi uma i totonu o le Iunaite Setete, e iai ni a latou tagata faigaluega.  E aofia ai la ma teritori o le Iunaite Setete, lea e pei ona aofia ai Amerika Samoa.  Ma o lenei su’esu’ega, e ta’i lima tausaga ma faia, i tausaga e i’u i le 5 po o le 7.

Sa ta’ua e Nusz, o fa’amaumauga po o fuainumera ia mai i le 2022, na fa’ato’a amata ona tu’ufa’atasia i le amataga o le 2023 ma e alu le tausaga atoa o aoina nei fa’amaumauga po o nei fuainumera, ma nisi taimi faaopoopo e fai ai a latou su’esu’ega, lea ua mafai ona tatalaina mai i tua, a latou faaiuga.

Na saunoa Nusz, o nei su’esu’ega e ao ona faia ma e tatau i pisinisi uma ona taliina fesili e fesiligia ai i latou, ae o fa’amaumauga ma ripoti uma e latou te aoina, e le mafai ona tatalaina atu i le mamalu lautele.  Ma o ripoti ia o lo’o latou tuuina mai i le mamalu lautele pe a mae’a a latou su’esu’ega, ua mae’a ona o latou faamautuina le puipuiga o pisinisi taitasi.

Ma e tusa ai ma a latou fa’amaumauga, o kamupani ia e pito sili ona to’atele a latou tagata faigaluega, o pisinisi gaosi oloa, lea e 2,463 tagata faigaluega o lo’o galulue.  Ona soso’o ai lea ma faleoloa, lea e galulue ai le to’a 1,670.  O le vaega o le Soifua Maloloina ma Tautua Lautele e soso’o ane ai ma ana tagata faigaluega e to’a 1,132.  O pisinisi nei o faletalimalo ma fale’aiga, e to’a 922 ana tagata faigaluega ae mulimuli ai ia kamupani fau fale, e 656.

Ua aofia foi i fa’amaumauga ia tupe maua a kamupani gaosi oloa i le tausaga, e $403.4 miliona, ona soso’o atu ai lea ma faleoloa e $393.5 miliona.  O kamupani si’i atoa e $203 miliona tupe maua, soso’o ai ma kamupani fau fale e $96.9 miliona, soso’o atu ai ma pisinisi tausi Soifua Maloloina ma Auaunaga Lautele e $86.7 miliona.

Pe a fa’atusatusa atu i le ‘economic census’ o le 2017, e 16% le siitaga o pisinisi fou, tupe maua na si’itia i le 33.3%, ae o totogi mo tagata faigaluega, e 14% lona siitaga, ae o tagata faigaluega sa faaopoopoina i le 2.6%.

O lo’o ua ta’ua foi i fa’amaumauga a le Ofisa o le ‘Census Bureau’, e 366 pisinisi o lo’o faamautu i le itu i Sasa’e o Amerika Samoa, lea e amata atu i Nu’uuli se’ia pa’ia le Falelima i Sasa’e, ae mo le Falelima i Sisifo lea e amata atu i Tafuna, e 226 pisinisi o iai.

Sa ta’ua e sui mai i le ofisa a le ‘Census Bureau’ a le malo tele, le tulaga lelei o lenei ripoti aua sa iai se manatu o le a tulaga faaletonu ni fuainumera aoina, i tua mai o le a’afiaga o le koviti.  Ma sa ta’ua foi e Nusz, atonu o le mafua’aga o le siitia o fuainumera o pisinisi, tupe maua, tupe o totogi mo aufaigaluega ma le aofai o tagata faigaluega, o le tele o tupe maua mai i le koviti, po o ua mafua ona o le maualuga o siitaga o tau o oloa.

O le a faapea ona fa’ao’oina atu le ripoti a sui mai i Amerika, i le Faalapotopotoga o Faipisinisi a Amerika Samoa (Chamber of Commerce), ae e la te le’i tu’ua le teritori.