Pago Pago - AMERIKA SAMOA

E tusa ai ma fa’amaumauga a le malo, o le vaveao o le aso 3 o Aukuso, na taunu’u ai se valaau i le ofisa a leoleo i Fagatogo, mai i le vaega a le ER i le falema’i a le LBJ, e tusa ai ma se alii na aumai mai Aua, ua manu’a i se faalavelave.

Ina ua taunu’u leoleo i le falemai, sa va’aia se alii o lo’o moe, ae ua manu’a lona mata taumatau.  Sa faamatalaina e le uso o le alii na manu’a, lea sa aumaia le ua manu’a i le falemai, e na te le o mautinoa po o le a le mea na tupu, ae o le tala sa faamatalaina atu ia te ia, o se alii e suafa ia Stye Sione, sa na ia tu’i ina le mata o lona uso.

Sa faamatala e le uso a le alii na manu’a, sa alu atu se tasi o uo a lona uso i le latou fale ma fai atu ia te ia (uso) e sau e ave le alii ua manu’a i le falemai.  Ma o lea na ia fa’atopetope atu ai ma auina mai lona uso i le falemai.

O le taeao na soso’o ai, sa mafai ona toe agai atu ai leoleo i le falemai ma fa’atalanoaina le alii na manu’a.

Ma e tusa ai ma lana faamatalaga, sa fai se latou inuga pia i se fale a sana uo, ma ta’a’alo piliaki.  Ma ina ua lamalama fa’ai’u le latou tafaoga, sa ia fai atu ai ia Sione ma lona uso, e o loa i le fale.  Na tu’ua e le auuso le nofoaga sa fai ai le evaga i lea afiafi.

Ae e le’i umi, ae toe va’aia le toe fo’i atu o le au uso (Sione) ae na fa’ate’ia le na manu’a, ina ua tu’i o ia e Stye.

O le aso na soso’o ai, na agai atu ai loa leoleo e su’e mai ia alii ia na eva faatasi ma le ua manu’a faapea ma Stye.  Sa faapea foi ona agai atu leoleo i le fale sa fai ai le evaga a le aualii lea.

E le’i maua atu le uo e ana le fale na fai ai le evaga, ae na maua atu le tina a le uo e ana le fale ma sa faamatala e le tina i leoleo, o se alii e latou te tuaoi lea na inu ma ta’a’alo piliaki ma le ua manu’a.

Sa faapea loa agai atu leoleo i le fale o le tuaoi ma talanoa ma le uo (molimau) lea na inu ma ta’a’alo piliaki ma le ua molia faapea ma le ua manu’a.   Ma sa faamatala e le molimau, e moni na iai le fa’alavelave na tupu i lea afiafi, ae e na te le o mautinoa po o ai na amataina le fusuaga.  

Ae na pau le tulaga sa ia manatua, o le pa’u i lalo o le ua manu’a ae toso ese atu e le uso a Stye ia Stye.  Ma na ia (molimau) tamo’e atu ma taumafai e tu’u’ese’ese ia Stye ma le alii ua manu’a.

Sa faapea ona tu’uina atu e le molimau i leoleo, ia se lisi o suafa o i latou uma na o latou eva i lea po ma sa agai atu loa leoleo e fa’afeso’ota’i ia tagata i luga o le lisi.

Na faamatala foi e le uo, na ia tu’ua le fale na fai ai le tafaoga, ae e le’i tupu le faalavelave.  Ae na fa’ato’a ia nofo malamalama i le mea na tupu, ina ua talanoa ai tamaitai o le nu’u.  Sa fesiligia e leoleo ia le uo pe na iai se mea na tupu i le va o le ua manu’a ma le ua molia, sa tali le uo, e leai.

Sa agai atu loa leoleo e taumafai e saili ia Stye ma lona uso, ae peitai, e le’i maua la’ua.

O le taeao o le aso 6 o Aukuso, na toe agai atu ai leoleo i le fale o le aiga Sione ma sa faamatalaina ifo iai e le tina a Stye, e le i moe atu ia Stye i le fale ae ua alu lona uso e faigaluega.  Sa fa’ailoa atu e le uso matua a Stye, o le a ia su’eina le ua molia ona valaau atu lea o le ofisa a leoleo.

O le 11:30 i lea lava taeao, na maua ai e leoleo le valaau mai i le tina a Stye, o le la ua taunu’u atu lona alo i le fale.

Na toe agai atu ai loa leoleo i le fale a le ua molia ma fa’atalanoaina ai o ia.  Sa faamatala e le ua molia, lo la onana ma le ua manu’a.  Ma sa ia taumafai e aumai lona uso i le fale, ae peitai, sa fa’aauau ona lu’i o ia e le ua manu’a, e fufusu.  Ma o lona to’atama’i, sa ia tu’i ina ai loa le ua mnu’a, i se apa pia e le’i tatalaina.

Sa ta’ua e le ua molia, le tamo’e atu o lona uso ma vaovao le la misa ma ave loa o ia i le fale.

O le aso 9 o Aukuso, na o’o atu ai le tina o le alii na manu’a, i le ofisa a leoleo i Fagatogo ma le kopi o lona ripoti mai i le falema’i. 

Ua molia nei Stye Sione i le moliaga e tasi o le Fa’ao’olima i lona tulaga e tolu - o se vaega ‘A’ o solitulafono mama, e mafai ona nofosala ai i le falepuipui, i le le sili atu ma le tausaga, po o se sala tupe e $1,000; po o faasalaga uma e lua.