Pago Pago - AMERIKA SAMOA

O lo’o ta’ua i faamaumauga a le malo le fa’atopetope atu o sui malu o le malo, mai i lo latou ofisa tutotonu i Fagatogo, i se faalavelave na tupu i le afiafi o Aperila 20, 2024, ina ua va’aia le lolofi atu o tagata i le auala i tafatafa o le Malaeoletalu, ona o se faalavelave tau taavale, sa faamanu’ali’a ai se tama matua.

A’o aga’i atu leoleo i luga o a latou pasika, sa valaau mai iai tagata na molimauina le faalavelave, le sola o le taavale sa so’aina le tama matua, aga’i i sisifo.

Na ta’ua e i latou na molimauina le faalavelave sa tupu, o le taavale lea sa a’afia, o se pikiapu lanu pa’epa’e o lo’o iai se ata o se kampani AC.  Sa maua mai e leoleo ia le taavale i le alatele i Gataivai.

O lo’o ua ta’ua i totonu o faamaumauga le malosi o se manogi sa sau mai i le avetaavale, ae peitai, e le o ma’oti i faamaumauga po o le a le ituaiga manogi.  

E le’i faia e leoleo se latou su’esu’ega masani, e faamaonia ai le fa’asuaava o le avetaavale, i Gataivai ona o le tulaga faaletonu o le tala o le tau.  Ae sa mafai ona fa’ataunu’uina ina ua o latou toe fo’i ma le aveta’avale i lo latou ofisa i Fagatogo.

E tusa ai foi ma faamaumauga, sa iai se molimau na mafai ona fa’amaonia le faafoeina e le ua molia o le taavale i lea afiafi, a’o lo’o fa’asuaava.

Sa fa’amaonia foi e le avetaavale i le taimi na fa’atalatalanoaina ai o ia e leoleo, le faia o sana inuga pia i le fale faatali pasi i Fagatogo, lea e i tafatafa o le Malaeoletalu.  O lona tu’ua o le fale faatali pasi, ua alu tele lona ulu i le koneseti sa faia i le ‘Pavilion’, sa ia le iloa atu ai le kolosi e le tama matua o le alatele.

 O le po lava lea na lokaina ai le aveta’avale, ma o ona moliaga e aofia ai;

Faitauga 1:  Faafoeina o se taavale a’o fa’asuaava ma manu’a ai se tagata – o se vaega ‘D’ o solitulafono mamafa, e mafai ona nofosala ai i le falepuipui, i le o’o atu i le lima (5) tausaga, po o se sala tupe e $5,000; po o faasalaga uma e lua.

Faitauga 2:  Aveta’avale le fa’autauta – o se vaega ‘B’ o solitulafono mama, e mafai ona nofosala ai i le falepuipui, i le o’o atu i le ono (6) tausaga, po o se sala tupe e $5,000; po o faasalaga uma e lua.

Faitauga 3:  Sola ese mai i le nofoaga na tupu ai le faalavelave – o se vaega ‘A’ o solitulafono mama, e mafai ona nofosala ai i le falepuipui i le tausaga (1) po o se sala tupe e $1,000; po o faasalaga uma e lua.

Faitauga 4:  A’afia i se faalavelave na manu’a ai se tagata – o se vaega ‘B’ o solitulafono mama, e mafai ona nofosala ai i le o’o atu i le ono (6) masina po o se sala tupe e $500; po o faasalaga uma e lua.

E $5,000 le vaegatupe sa faatulagaina e mafai ona tatalaina ai i tua le ua molia, e fa’atalitali ai lona faamasinoga.