Upolu - SAMOA

Ua fa’amaonia nei e le Faamasinoga Maualuga, e ala i sana fa’ai’uga sa lauina i le amataga o le vaiaso, ia le le usitaia e le afioga Maulolo Tavita Amosa ma nisi mai i le afioaga o Afega, i Upolu, Samoa, o se fa’ai’uga a le faamasinoga, i se fa’alavelave o lo’o fa’aauau pea ona tula’i mai i le va o lo latou afioaga ma le afioaga o Leauva’a.

E pei ona sa fa’alauiloa mai e le afioga i le Faamasino Sili ia Satiu Simativa Perese, i le aso Gafua na se’i mavae atu, ua le usitaia e Maulolo faapea ma se alii faipisinisi e suafa ia Ututaaloga Charlie Uila faapea Fata Roketi ma Fata Vaafai Tolutasi, ia se faaiuga na tut’uina mai e le faamasinoga i le aso 11 o Oketopa 2024.

Ua faia le faaiuga fou a le faamasinoga, ina ua fa’aulu e le afioaga o Leauva’a sa latou tagi e faasaga ia Afega ma le le savavali e tusa ai ma le faaiuga o le latou mataupu, i luma o le faamasinoga i le masina o Oketopa.

Na ta’ua e le alii faamasino ona o se saunoaga a Maulolo e faapea, o le a fa’aauau pea ona fa’atula’i ‘ese e Afega ia tagata po o aiga o Leauvaa, e avea ma fa’amaoniga, ua fa’aleaogaina ai se finauga a i latou ua molia, e le o latou ua mafua ai ona fa’aauau pea ona faia uiga taufaamata’u ma le fa’aleagaina o mea totino a tagata.

O le saunoaga a Maulolo e pei ona sa fa’aaogaina e le faamasinoga, o se vaega o sona fa’atalaoaga e le TV1.

Sa saunoa le afioga i le Faamasino Sili, le fa’aalia mai i saunoaga a le ua molia, le itiiti o so latou amanaiaina po o le fa’aalolalo i faaiuga mai i le faamasinoga.  Ma e foliga mai i tulaga uma o lo’o fa’aauau pea ona tutupu mai, le le amanaiaina o le faaiuga a le faamsinoga.

Sa le’i valaauina ni molimau a Maulolo ma i latou na molia faatasi i latou, i le vaiaso ua mavae.

Na saunoa foi le afioga Perese, ua talitonu le faamasinoga i le feagai o tagata o Leauva’a ma faiga fa’asolitulafono  ma o le a fa’aauau pea ona feagai i latou ma nei mau faafitauli, ona o se fuafuaga ina ia tutuli ‘ese i latou mai i fanua e pei ona finau ai.

Sa faamamafaina e Perese ia le pule o lo’o umia e le Faamasinoga Maualuga e faia ai faaiuga e o gatasi ma aiaiga o tulafono maualuga a Samoa, po o le Faavae.

Sa ia saunoa foi e faapea, afai e le fiafia se itu e tusa ai ma se faaiuga, e iai ala e ao ona mulimulita’i ai - e ia i latou le aia tatau e apili ai so’o se faaiuga, i le Faamasinoga Apili.

Ma o le faaiuga mai i le Faamasinoga Maualuga, o le tulafono lea, e tusa pe e te ioe iai, pe leai, e tatau pea ona usita’ia.  Ma o se tulaga ua le amanaia e i latou ua molia.

Ua faatonuina foi e le afioga i le Faamasino Sili ia le fa’ao’oina atu o kopi o lenei faaiuga i le Kkomesina o Leoleo ma ua fautuaina ai le Komesina o Leoleo e tagataga’i i le tulafono o le 1960, pe ua solia se tulafono i le taimi sa fa’apa pa ina ai la’au malolosi.

E le gata i lea, ua ia fautuaina foi le fa’ao’oina atu o seisi kopi o lenei faaiuga, i le Fofoga Fetalai o le Maota Fono, e fa’ailoa iai le ta’usalaina o le alii Faipule i le le usita’ia o fa’aiuga a le faamasinoga.