Ads by Google Ads by Google

Faasala le ali’i na ia faia uiga mataga lona afafine fai 13 tausaga

ausage@samoanews.com

E 7 tausaga i le Toese i Tafuna lea ua fa’asala ai e le Fa’amasinoga Maualuga se ali’i e 30 tausaga le matua, ona o le fa’alavelave lea ua ta’usala ai o ia i lona faia o uiga mataga faafeusuaiga i lona afafine fai e 13 tausaga le matua.

 

O le vaiaso nei lea na tula’i ai le ua molia (le stepfather) i luma o le Fa’amasinoga Maualuga mo le lauina o lana fa’asalaga. O le ali’i loia fautua lagolago ia Rob McNeill na tula’i mo le ua molia, ae o le tama’ita’i loia sili lagolago ia Laura Garvey na tula’i mo le itu a le malo.

 

Na ulua’i tu’uaia e le malo le stepfather i moliaga mamafa eseese e 27, lea e aofia ai moliaga e 5 o le faiaiga faamalosi ma se tamaitai e talavou i lalo o le tulafono; tasi le moliaga o le faia o amioga faasotoma; 10 moliaga o le tagofia o itutinosa o se tama’ita’i i le tulaga muamua; ma moliaga e 5 o le faiaiga ma se tamaitai e aiga i ai; faapea ai ma moliaga e 6 o le faia o gaioiga e lamatia ai le soifua saogalemu o fanau laiti.

 

Ae i lalo o le maliliega aufaatasi lea na sainia e le malo ma le ua molia, lea fo’i na talia e le Fa’amasinoga i le masina o Tesema 2019, na malie ai stepfather e tali ioe i le moliaga o le faia o uiga mataga faafeusuaiga faasaga i se tama’ita’i talavou; faapea ai ma le moliaga e tasi o le tagofia lea o itutinosa o se tamaitai e talavou i lalo o le tulafono.

 

I le tali ioe ai a le stepfather i moliaga e 2 na ia ta’utino ai e fa’apea, i le va o le masina o Iuni e oo atu ia Setema 2018, na ia faia ai uiga mataga i le tamitai e 13 tausaga le matua na aafia, o le tama teine lea a le fafine o loo la nonofo mo le umi e 4 masina.

 

Ina ua maua le avanoa o le ua molia mai le Fa’amasinoga Maualuga, sa ia faatoese ai loa e tusa ai o lana solitulafono sa faia, ma ia talosagaina ai se faamagaloga mo ia. E lei faatoese le ua molia i le tama’ita’i na aafia i lenei mataupu poo lona Tina fo’i.

 

Na talosaga McNeill i le Fa’amasinoga mo se faasalaga faanofovaavaaia o le ua molia, ina ia mafai ai ona toe fo’i atu o ia i tua e tausi lona to’alua ma lana fanau. Na taua e McNeill e fa’apea, ua mae’a ona la talanoa ma le to’alua a le ua molia, lea na ia faailoa atu ia te ia, le la mana’o ma lana tama teine na aafia i lenei mataupu, ina ia toe fo’i atu le ua molia i lo latou aiga latou te mafuta ma saili sana galuega e tausi ai le aiga.

 

Na tete’e le loia a le malo i le talosaga a McNeill mo se faasalaga faanofovaavaaia. Na finau le loia a le malo ina ia faasala le ua molia i se faasalaga faa falepuipui, e talafeagai ma le solitulafono sa faia. Na taua atili e le loia a le malo e fa’apea, e taua atu le saogalemu o le tama’ita’i na aafia i le manatu o le malo, o le mafua’aga lea o le finau o le malo mo se faasalaga faa falepuipui e umi mo le ua molia.

 

O le mae’a ai ona iliolo e le Fa’amasinoga o mau faamaonia o lenei mataupu, atoa ai ma talosaga a loia, na toe faatepa ai loa e le afioga i le alii Faamasino Sili lagolago ia Fiti Sunia mea sa tutupu na mafua ai ona nofosala Faaleo i le tulafono.

 

O le gaioiga sa faia e le ua molia e pei ona taua e le Fa’amasinoga, ua ia faaleaoga ai le talitonuga sa tuuina atu e le tama’ita’i na aafia ia te ia, e avea ai o ia o lona Tama i totonu o le aiga. O le itu e sili ai ona matuia le solitulafono a le ua molia, ona o le solitulafono sa tupu lava i totonu o le fale o loo nonofo ai le ua molia ma lona to’alua, ma le fanau a lona to’alua e aofia ai le tama’ita’i na aafia.

 

E talitonu le Fa’amasinoga, e le toe malu puipuia le saogalemu o le tama’ita’i na aafia, pe afai ae tatala i tua le ua molia latou te mafuta. E talitonu fo’i le Fa’amasinoga, tusa lava pe ua faatoese le ua molia na te le toe faia lenei solitulafono, o le mea moni lava, o le mea na tupu muamua e toe tupu fo’i. Ae afai ae toe tula’i mai, e sili atu le matuia o mea e tutupu i le taimi lona lua nai lo le taimi muamua.

 

Na taua fo’i e Sunia se tasi o manatu o lo o i le Fa’amasinoga, i le mafua’aga na le mafai ai ona molia le stepfather i lona faia o sauaga i totonu o le aiga. Ana molia i lea ituaiga solitulafono, atonu e mamafa atu le faasalaga e ono faasala ai o ia nai lo le faasalaga lea ua tuuina atu i le taimi nei.

 

Na taua e Sunia e fa’apea, ina ua fesiligia e Leoleo le tama’ita’i na aafia, na faamaonia ai loa e le tama’ita’i lea mea uma lava sa tutupu i le la mafutaga faaleulugalii ma  le stepfather i totonu o le 4 masina.

 

Na taua e le Tina i Leoleo, le faia lea o se latou talanoaga ma le ua molia e uiga i lenei mataupu, ma faatoese ai le ua molia ia te ia ma lana tama e tusa ai o lana gaioiga sa faia, atoa ai ma lana ta’utinoga, na te le toe faia nei uiga mataga.

 

Mo le moliaga o le faia o uiga mataga faafeusuaiga, e 7 tausaga lea ua faasala ai Faaleo i le toese atoa ai ma le salatupe e $2,000.

 

Mo le moliaga o le tagofia o itutinosa o se tamaitai e talavou i lalo o le tulafono, e 5 tausaga lea ua faasala ai Faaleo i le toese atoa aima le salatupe e $2,000.

 

O ia faasalaga e 2 e tuli faatasi, lona uiga, e 7 tausaga i le toese, atoa ai ma le salatupe e $2,000.

 

Ua poloaina e le Fa’amasinoga le malo ina ia saili le sponsor a le ua molia ma faailoa i ai lona tiute i lalo o le tulafono, o lona totogiina lea o le salatupe a le ua molia.

 

O le afioga i le Taitai Faamasino Lagolago ia Mamea Sala Jr atoa ai ma le afioga i le Faamasino Lagolago ia Tunupopo Alalafaga na lagolago i le afioga a Sunia i le iloiloina o le faasalaga a Faaleo i lenei mataupu.