Pago Pago - AMERIKA SAMOA

I le fa’aauauina ai o le fetufaa’iga a sui tauva mo le tofi Kovana ma le Lutena Kovana, i fesili sa aoina mai e le Asosi o Loia a Amerika Samoa, na faapea ona maua ai le avanoa e le afioga i le Kovana Lemanu P. S. Mauga ma lana soatau, le tofa ia Laapui Talauega E. Ale, faapea ma sui tauva ia Vaitautolu Talia Faafetai ma Maefau Dr. Mary Taufetee, aemaise o le afioga ia Pulaalii Nikolao Pula, e fa’asoa mai ai ni manatu, faapea ma ni fuafuaga fa’atulagaina, pe afai ae filifilia i latou e avea ma Kovana ma Lutena Kovana, i le palota lautele ia Novema 5.

(Sa le’i auai l e afioga ia Pulu Ae Ae Jr., i lenei felafolafoa’iga, ona sa malaga atu o ia i atunu’u i fafo i le aso na fa’ataunuuina ai lenei fuafuafga.  O le afioga Pulu o lo’o  tausinio mo le tofi Lutena Kovana, faatasi ma Pulu lea o lo’o tausinio mo le tofi Kovana.)

o le fesili sa tu’uina atu ia te i latou, po o le a sa latou fuafuaga mo le fa’aleleia atili o polokalama po o auaunaga mo le tausia o le soifua maloloina, i totonu o le teritori.

I le fa’asoa mai a Vaitautolu, na ia saunoa ai i le tele o ripoti ua salalau e tusa ai ma le falemai a le LBJ, faapea ma auaunaga mo le aveina atu o gasegase i atunu’u i fafo, e pei o le Medicaid.  Ma ua nofo malamalama uma tagata o le atunu’u, i nei mataupu.

Na faamamafa e Vaitautolu le tatau ona amata le fa’aleleia o nei auaunaga, i totonu o le Matagaluega o le Soifua Maloloina, lea o lo’o gafa ma polokalama mo le puipuia o soifua maloloina, ae gafa le LBJ ma le togafitia o gasegase.

Sa faapea ona finau mai Vaitautolu, e tatau ona galulue so’otau’au nei matagaluega e lua, aua le faaleleia po o le si’itia o auaunaga aua le soifua maloloina o le mamalu lautele.

I le tali mai a le afioga i le Kovana ia Lemanu, sa ia muamua ona faasino i le falemai a le LBJ, lea ua silia ma le 60 tausaga, ma o le umi po o le tuai foi lena o ‘equipment’ faafoma’i o lo’o fa’aaogaina ai i totonu.

Ma na saunoa Lemanu, le fausia e le faigamalo o iai nei, o ni fale fou faapea ma le faatauina o ni masini fou, e fa’aleleia atili ai lenei auaunaga.

Sa ta’ua e Lemanu le faapena foi ma falemai tua, i totonu o Tutuila ma Manu’a.

Na ia fa’asoa mai e tusa ai ma se falemai fou o lo’o tau fa’atu nei i totonu o Tafuna, lea o le a fa’apito ‘augafa lana tautua i auaunaga e le o maua i le LBJ, aemaise lava auaunaga mo tagata matutua, lea o lo’o faimalaga i atunu’u i fafo mo a latou talavai.

I le fa’asoa mai a le afioga Pulaalii Nikolao Pula, sa ia ta’ua ai e faapea, o le fausiaina o se falemai fou, o le a tele se tupe o le a fa’aaluina ai, i le va o le $300 miliona ma le $900 miliona.

Ma sa ia ta’ua foi le faia e le faalapotopotoga o Inisinia a le Ami ia se suesuega i le 2019, ma folasia ni isi auala eseese, ua mafai ona o la tilotilo iai ma Pulu.  Ma mai i nei faaiuga eseese mai i le ‘Army Corps of Engineers’, ua o la filifilia ai le fuafuaga ‘c’, lea e faapea, e fausia se falemai fou, i le mea o iai nei ia le falemai tuai i Faga’alu.

Sa ta’ua e Pula e faapea, e ui ina e lelei le fuafuaga mo se falemai fou i Tafuna, ae peitai, o le a manaomia le tele o tupe.  Ma sa ia fa’aalia le ‘au o lona manatu i le saunoaga a Vaitautolu, e tatau i le Ofisa o le Soifua Maloloina ona fa’atulagaina ia ni auaunaga e aveina atu i tua o nu’u ma afioaga, e pei ona sa faia i tausaga ua tuanai.

O leisi fesili na fesiligia ai sui tauva, o le fesili i le vaega po o le tiute a le malo, i le atina’eina o fuafuaga e tali atu ai i suiga o le tau.  

O lo’o fia malamalama le atunu’u, po o a ni tulafono o le a pasia ma fa’amalosia, pe afai e filifilia nei sui tauva, e avea ma taitai o le lumanai, e fa’aitiitia ai a’afiaga e mafua mai i suiga i tala o le tau, faapea ma le puipuiga o le atunu’u mai i faalavelave fa’alenatura.

O le tofa ia La’apui na muamua tali i lenei fesili ma sa ia fa’aleoina le faavaeina e le la faigamalo o se Ofisa e mataituina ia le galulue faatasi o ofisa ma matagaluega eseese a le malo, aua le tali atu po o le fofoina o faafitauli, e mafua mai ona o suiga i tulaga o le tau.

O le afioga i le Lutena Kovana lea o lo’o fa’auluulu ai nei lenei komiti ma sa ia ta’ua e faapea, e leai se masalosaloga, o le a iai ni suiga i tulaga o le tau.  Ae ua tele ni tulaga ua mafai ona o latou ausia, e mafai ona tali atu pe fa’aitiitia ai foi, le a’afia o le atunu’u, i nei suiga, e aofia ai le pasiaina o ni tulafono fou e fa’asa ai ni isi o oloa e ono a’afia ai le siosiomaga.

Ma ua faapea foi ona o latou faia ni galuega e faamalosia ai auala ma taligalu, e puipuia ai le atunu’u, i taimi o faalavelave faalenatura. 

E le gata i lea, sa ta’ua e La’apui, le galulue faatasi o le EPA ma le DMWR ina ia fa’amatu’u mai ni fesoasoani tau tupe mai i le malo feterale, aua auaunaga i taimi o faalavelave fa’afuase’i, e ono a’afia ai tulaga o taumafa i totonu o le teritori.

I le tali mai a le afioga Pula, sa ia ta’ua ai e faapea, o le galulolo i le 2009, na avea ma mafuaaga autu o le galulue faatasi a le malo ina ia mafai ona iai ni fuafuaga fa’ata’atia i totonu o ofisa ma matagaluega tutoatasi a le malo, e fesoasoani ai i le mamalu lautele, i fa’alavelave tula’i mai i le lumanai.

E ui i le galuega faatino a le malo, ae na saunoa Pula, o lo’o tele se fesoasoani e mafai ona maua mai i le malo feterale, e pei o le FEMA lea ua silafia e le toatele, faatasi ai ma le tele ma le anoanoa’i o nisi alagamanuia e mafai ona a’apa atu iai le malo, i taimi o fa’alavelave faafuasei.

Sa saunoa Pula, o le a o latou galulue vavalalata ma ofisa a le ‘Federal Region 9’, i Kalefonia, e maua mai ai se fesoasoani mo le teritori.

I le fa’asoa mai a Maefau Dr. Mary Taufete’e, sa ia talanoa mai ai i le tele o vaega o le atunu’u ua faaleagaina ai le siosiomaga.  Sa ia finau mai e faapea, e tatau ona to to ina la’au ina ia mafai ai ona fa’ateleina le vaomatua.