Ads by Google Ads by Google

Fa’atonuina su’eina o tusi ma pepa fa’amaumau a le malo


[ata: foa'i]

Pago Pago, AMERIKA SAMOA

 

I se tusitusiga a le afioga i le kovana sili, Lemanu Peleti S. Mauga, ia Oketopa 8, 2021, sa ia fa’ailoa ai i lana kapineta le fa’atonuina o le Ofisa Su’etusi a le malo - Territorial Audit Office - mo le su’eina o tusi i le tulaga o pepa fa’amaumauga ma tupe a le malo o Amerika Samoa. 

 

E le’i fa’ailoa e le kovana, le mafuaaga o le sueina o tusi, ae sa ia fa’ailoa i lana kapineta e fa’apea, o lo’o fa’atonuina mai i lalo o le tulafono e mafai lea e le fa’atonu o lea ofisa ona su’e tusi a le malo. 

 

Ua fa’atonuina foi e le kovana lana kapineta ina ia lagolagoina ma sapaia lenei su’egatusi, ina ia mafai ona fesoasoani i auala e fa’aleleia ai le tulaga tau tupe a le faigamalo.

 

Ua le gata i lea taua foi e le kovana, le maualuga ia i laua me le lutena kovana, Talauega Eleasalo Ale, le manino lelei o mataupu uma i totonu o le malo, ma ia fa’amalosia ai le lagolagoina e vaega esese o le malo le suegatusi. 

 

E le’i iloa tonu le taimi e amata ai le galuega o le Ofisa Su’e Tusi, ae o lo’o vaaia lea ofisa i le taimi nei e le fa’atonu le tumau ia Tofa Sualauvi H. Su’a talu mai le amataga o lenei tausaga. 

 

I se vaega o le tupe fa’aopoopo o le Tausaga tupe 2022 - lea ua amatalia - o lo’o fa’atulaga i le $150,000 e fesoasoani i lea ofisa aua a latou galuega ma le fa’afaigaluegaia o tagata i agava’a i le suetusi.