Pago Pago - AMERIKA SAMOA

E tusa ai ma fa’amaumauga a le malo, o lo’o ta’ua ai le fa’afeso’ota’iina e se tina o le Ofisa a Leoleo i Tafuna i le aso 10 o Aukuso, ona o le fasia faamo’amo’a e ni alii o sona alo.  

E pei ona ta’ua i totonu o fa’amaumauga a le malo, e to’afa (4) ni alii na masalomia i lenei fa’alavelave, ma na lokaina uma le to’afa, ae e na o le to’alua ua molia i le tulafono.

O le to’alua ua molia, e aofia ai Ka Kandahar ma Pelesasa Suafoa.

O moliaga a Kandahar, e aofia ai;

Faitauga 1:  Fa’ao’olima i lona tulaga e lua, o se vaega ‘D’ o solitulafono mamafa, e nofosala ai i le le sili atu ma le lima tausaga, i le falepuipui.

Faitauga 2:  Fa’ao’olima i lona tulaga e tolu, o se vaega ‘A’ o solitulafono mama, e mafai ona loka ai i le le sili atu ma le tasi tausaga, po o se sala tupe, e le sili ma le $1,000; po o faasalaga uma e lua.

E $5,000 se vaegatupe faatulagaina na mafai ona tatalaina ai i tua Kandahar, mai i le falepuipui, e faatali ai lona faamasinoga.

Ae o Suafoa, na molia i le Faao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le falepuipui, i le le sili atu ma le tasi tausaga, po o se sala tupe e le silia ma le $1,000; po o faasalaga uma e lua.

E $500 se vaegatupe na faatulagaina, e mafai ona tatalaina ai i tua ia le ua molia, e faatali ai lona faamasinoga.

O lo’o ua ta’ua i totonu o fa’amaumauga a le malo e faapea, e le o mautinoa tonu le taimi na tupu ai lenei faalavelave, lea na fasi fa’amo’amo’a ai e Suafoa, Kandahar ma ni isi alii se to’alua, ia le na a’afia.  O lo’o ta’ua e faapea, sa le gata i le fa’aaogaina e nei alii o latou lima e fasi ai le sa fa’amanu’alia, ae fa’apea foi se nofoa laupapa.

O isi e to’alua na auai i le faatinoga o lenei solitulafono, na aofia ai se alii talavou ma se alii e suafa ia Kaisa.  O lo’o iai se talitonuga na ta kiki ma tatu’i e Kaisa ia le na manu’a, i ona foliga, ae na tatu’i foi e le alii talavou.

E tusa ai ma ata na pu’eina i manu’a o le na a’afia, na fufula ma manu’a ona mata uma e lua faapea ma le fula o lona ulu i le itu taumatau.

O le taeao o le aso Sa, Aukuso 11, 2024, na o’o atu ai le tina o le na a’afia, i le Ofisa a Leoleo i Tafuna e tusa ai ma le sauaina o lona alo i le po o le aso Toonai.

Na muamua ona valaau atu le tina i le ofisa a leoleo, e fai sana ripoti e uiga i lenei faalavelave, ae na faatonuina o ia e le ofisa a leoleo, ina ia malaga atu i le ofisa.

Sa fa’ailoa atu e le tina i leoleo ina ua telefoni iai, o lo’o musu lana tama po o le alii na a’afia, e fai sana tagi.

Ina ua o’o atu le tina ma lona alo i le ofisa a leoleo, sa mafai ona molimauina e leoleo ia manu’a i foliga o le na a’afia ma o latou tapu’eina ai ata o ona manu’a.

E ui ina sa te’ena e le ua a’afia ia se togafitiga mai i le EMS, ae na ia ioe e la te o ma lona tina i le falemai, pe a mae’a ona faila le la ripoti.

Ona o manu’a o le ua a’afia, sa le mafai ai ona faia sana molimau tusitusia. 

Ae sa ia faamatala gutu e faapea, o le po o le aso Toonai, Aukuso 10, 2024, (e na te le manatua le taimi) sa fai ai se latou inuga pia ma nisi o ana uo i le fale a le aumaga, ae o atu ni alii talavou mai le nu’u.

Na ta’ua e le na a’afia, le ui atu o Suafoa i ona tua ma fesiligia o ia (le na a’afia) pe aisea na ia fesiligia ai le uso laititi a Suafoa, pe fia fusu.  Ona tu’i fa’atolu mai lea e Suafoa, o le na a’afia, mai tua.

Ae oso atu Kandahar ma takiki o ia, a’o ta’atia i lalo.  Ma sa faapea foi ona u’uina e Kandahar ia se nofoa la’au sa i totonu o le fale, ma ta ai le na a’afia.  Ma o le taimi muamua na ta ai le na a’afia e Kandahar i le nofoa, sa mafai ona tu’u mai lona lima e tali ai, ae o le ta lona lua, sa tau tonu lava i lona ulu.

Sa ta’ua foi e le na a’afia, e na te le manatuaina po o ai sa fasia o ia ina ua uma ona sasa o ia e Kandahar i le nofoa.  Ona o le taimi lena, ua na o le pau lava le tulaga ua o’o ia te ia, ua na o le ta’oto i luga o le palapala ma mo’omo’o e o’o atu se fesoasoani.

 Na fa’atalanoaina foi e leoleo ia le tuafafine laititi o le na a’afia, a’o iai le tina ma sa fa’amatalaina e le tuafafine le taimi na o’o atu ai lona tuagane i le fale, ua toto uma lona lima, ma le fula o ona foliga ae ufitia uma i le toto.

Sa mauaina e leoleo ia ni ata o i latou na lokaina i lenei faalavelave, mai i le po na tupu ai le faalavelave.

O le taeao o le aso 23 o Aukuso, na agai atu ai leoleo i le nofoaga na tupu ai le faalavelave ma o le taeao lava lea na va’aia ai e leoleo ia Kandahar ma ave faapagotaina ai loa o ia i le ofisa a leoleo i Tafuna.

Sa faapea foi ona agai atu nisi leoleo i le aiga o Suafoa ma lokaina mai ai foi ma Pelesala, faapea foi le alii talavou o lo’o a’afia i lenei mataupu fa’atasi ai ma le alii lona fa lea e le o molia i lenei mataupu.

I le fa’atalanoaga a Suafoa sa ia faamatalaina ai e faapea, ina o faia se ti’eti’ega uila a le alii lea e le o molia i lenei mataupu, sa alu atu le ua a’afia ma lu’i e la te fufusu.  Ae na sola ese ia le alii lona fa ma agai sa’o atu i le mea o nonofo mai ai Suafoa, Kahandar ma alii talavou lea e le’i molia ma ta’u atu ia i latou le mea na tupu.

Sa faamatala e Suafoa, lo latou agai atu loa i le fale a le aumaga lea na iai le ua a’afia, ma fasi ai loa o ia.

O le faamatalaga lava foi lea a Kahandar faatasi ai ma lona fa’amaonia, o lona fa’aaogaina o se nofoa la’au e tu’i ai foliga o le ua a’afia.

Sa fa’atalanoaina foi e leoleo ia le alii talavou i luma o lona tina ma sa ia faamatalaina lona va’aia o Suafoa, o tu’i faatolu ia foliga o le alii na a’afia.  Ma na ia va’aia foi Kahandar o u’uina se nofoa la’au ma ta ai fa’alua, foliga a le na aafia.

Ma na faamatala foi e le alii talavou lea, ina ua mae’a le latou fasiga o le na a’afia, na o latou o ese atu i seisi nofoaga, ma tapu’e ai a latou ata.

Ae i le molimau a le alii lona fa lea o lo’o ta’ua lona suafa, sa ia faamatalaina ai le alu atu o Kaisa ma faamatala atu ia i latou le tulaga lea na fesiligia ai o ia e le ua a’afia.  Ma na faapea loa ona agai uma atu Suafoa, Kandahar, Kasima ma le alii talavou, i le fale a le aumaga lea sa iai le alii ua a’afia.

Na faamatala e lenei alii e faapea, e na te le’i maitauina pe na faafia ona tatu’i e Suafoa, Kandahar, Kaisa ma le alii talavou, ia le ua a’afia, ona o le taimi lea sa o latou talatalanoa ai ma uo a le na a’afia.  Ma na o latou o ese, o lo’o ta’atia le na a’afia i luga o le palapala.