NIU SILA

I se ripoti mai i le vaega fa’asalalau a le ‘Associated Press’ i le aso ananafi, sa ta’ua ai se fa’asea a le Minisita o Vaega’au a Ausetalia, o Richard Marles, e faasaga i le malo o Saina, ona o fa’ata’ita’iga taufa’anana a a latou Fuava’a, lea sa faia i ogasami o Tasman, lea e tafana ai ni a latou fana tetele, aga’i i luga o le ‘ea, a’o feoa’i ni va’alele la’upasese i le va o Ausetalia ma Niu Sila.

Sa lapataia ai e le ofisa Ausetalia, o lo’o mataituina femalagaiga i luga o le ‘ea, ia pailate, ina ia nofouta i ni tulaga e ono a’afia ai a latou femalagaiga, ona o fa’ata’ita’iga a va’a tau a Saina sa fa’ataunu’u i gataifale i sasa’e o Ausetalia.

Na saunoa Marles, na fa’ato’a nofo malamalama taitai o Ausetalia e tusa ai ma fa’ata’ita’iga a Saina i gataifale faavaomalo, i le va o Ausetalia ma Niu Sila, ina ua o’o atu se ripoti mai i ofisa vaalele.

Sa faamanino e Marles i le vaega fa’asalalau a Ausetalia i Perth, e leai se lapataiga na o’o mai, mai i le malo o Saina.

Na ta’ua e Marles, o se fa’asalalauga fa’alauaitele a Saina i luga o le ‘ea, lea na maua e ofisa vaalele, a’o feagai ma femalagaiga i luga a’e o le gataifale o Tasman, na fa’ato’a o latou nofo malamalama ai i le mea o lo’o tupu.

Ae peitai, i se tali mai a le malo o Saina, e tauala mai i le latou so’oupu o Wu Qian, na o latou fa’alauiloa mai ai le leva ona faia o a latou fa’asalalauga e tusa ai ma lo latou usitaia o tulafono fa’avaomalo, e ala i lo latou fa’ailoa atu o a latou fuafuaga, ma e le’i a’afia ai le saogalemu o femalagaiga a vaalele.

Ma i sana faamatalaga tusi i luga o le uepesite a le Minisita o Vaega’au, sa ta’ua ai e Wu Qian le le talafeagai o faamatalaga a le sui mai Ausetalia ma le mea moni.

Sa faapea foi ona taumafai le Minisita i le va i Fafo a Ausetalia, o Penny Wong, e tapa se faamalamalamaga mai i lana soatau i Saina, o Wang Yi, i se la feiloaiga i le aso Toonai, ina ua mae’a se fonotaga a taitai o malo e 20, e tusa ai ma lenei mataupu. 

E tolu ni va’a tau a Saina sa faapea ona taula i ogasami o Tasman, i le itu i sasa’e o Ausetalia, na faapea ona tulimata’i e vaega’au a Ausetalia ma Niu Sila i le vaiaso ua mavae.  O se tulaga na ta’ua e Marles, e seasea ona tupu.

I ni ripoti a vaega fa’asalalau, sa toe suia ala o ni va’alele e tolu na i luga o le ‘ea mo a latou faigamalaga mai Sydney mo ‘a’ai ‘ese’ese e tolu a Niu Sila, i le aso Faraile o le vaiaso ua mavea, na faapea ona toe suia a latou ala malaga ona o fa’ataitaiga a vaa tau a Saina.

Ae e leai se fa’amatalaga na maua mai i nei ofisa vaalele, na aofia ai le Emirates, Qantas ma le Virgin Australia.

E tolu ni vaalele mai Sydney na agai atu i ‘a’ai o Niu Sila i le taeao o le aso Faraile o le vaiaos ua mavae, sa lapataia e Niu Sila ae e le’i faia a latou fa’ata’ita’iga, e pei ona ripotia e vaega fa’asalalau. 

Sa saunoa Marles, e masani lava i Fuava’a a Ausetalia ona tu’uina atu ni a latou lapataiga, i le va o le 12 ma le 24 itula, ae e le’i faia ni a latou fa’ata’ita’iga faapea, ina ia lava ai le taimi e tapenapena ai ofisa vaalele.

Sa ta’ua e se so’oupu a Saina i le aso Faraile, o Guo Jiakun, sa fa’ataunu’uina uma fa’ata’ita’iga a le Fuava’a a Saina i se auala saogalemu ma uia uma ala o tulafono fa’avaomalo.

Ma na saunoa foi le Palemia a Ausetalia, o le Afioga ia Anthony Albanese, e leai se tulaga na ono lamatia ai aseti a Ausetalia po o Niu Sila i nei fa’ataitaiga. 

Ae na ta’ua e le Ofisa a Niu Sila e gafa ma le mataituina o femalagaiga i luga o le ‘ea, sa o latou nofo malamalama i le fautuaga mai i Ausetalia.  Ae e le’i manino mai le latou faaiuga sa faia.

I se saunoaga mai i le alii kapeteni o Steve Cornell, le sui Peresetene o le Asosi o Pailate Faavaomalo ma Ausetalia, lea e avea ma sui o pailate a le ofisa vaalele a le Qantas, sa tatau i le malo o Saina ona fa’ataunu’u a latou fa’ata’ita’iga i seisi vaega o le ogasami tele.

Ae peitai, o lo’o ua taofi Albanese, e le’i solia e Saina se tulafono i a latou fa’ata’ita’iga ia sa faia i ogasami faavaomalo i fafo atu o ogasami fa’asao a Ausetalia.