SAMOA

I se ripoti mai a le RNZ Pasefika, ua fa’alauiloa mai ai le sologa lelei o tapenapenaga a le malo o Samoa, aua le faamoemoega mo le faaiuga o le masina fou, i le fonotele a fa’auluuluga o malo o le Commonwealth (CHOGM-Commonwealth Heads of Government Meeting), lea o le a faia i Apia.

I sana saunoaga lautele i le aso Lua na se’i mavae atu nei (aso Lulu i Amerika Samoa), sa faalauiloa mai ai e le Tamaitai Palemia a Samoa, le afioga Fiame Naomi Mata’afa, le fa’ailoa mai e malo e 56 lo latou auai mai i lenei fonotaga taua, atoa ai ma nisi o le aiga tupu mai Peretania.

O nisi o mataupu na saunoa iai le Palemia, sa aofia ai nofoaga eseese e faataunu’uina ai vaega o le fono, o nofoaga o le a faamautu ai ulu o malo o le a auai mai faapea ma le polokalama o le fonotaga.

Ae peitai, e le’i talanoaina e le Palemia ia nofoaga po o vaega o le taulaga o le a faasaina mo le mamalu lautele, a’o fa’agasolo le fonotaga.

 O lo’o talitonu le RNZ Pasefika, o nisi o vaega o Apia o le a fa’asa i le mamalu lautele, o le a aofia ai le itu lea e amata mai i le Taumeasina se’ia o’o mai lava i le fale o faamasinoga, i Mulinu’u.

E na’o i latou o le a fa’atagaina e mafai ona o’o atu i lea vaega o le taulaga.

Na fa’aalia mai e se so’oupu a le Ofisa o Leoleo, i le RNZ Pasefika, o le a fa’asalalauina tulaga uma o le fonotaga i luga o upega tafa’ilagi.

O puipuiga (security) uma i le taimi o le fa’agasologa o lenei fonotaga, o le a faapea ona mataituina e le malo o Peretania, Ausetalia ma Niu Sila, e tusa ai ma sa latou maliliega fai faatasi ma le malo o Samoa.

Sa saunoa Mata’afa, e le o se taimi muamua lenei ua talimalo ai le atu Pasefika i lenei fonotaga (CHOGM), ae o le ulua’i taimi lenei ua talimalo ai Samoa.

Na ia saunoa foi i le taua o lenei avanoa ua maua e Samoa, e mafai ai ona auai i le soalaupuleina o le tele o mataupu taua, aua le atina’eina o motu ma atunu’u taitasi.

I taimi tuanai, i so’o se taimi e faataunu’uina ai nei ituaiga fonotaga (CHOGM), e masani ona taofi e leoleo ia tagata o le atunu’u i nofoaga faasaina, ma su’esu’eina i latou.

I le taimi o lo’o faagasolo pea galuega mo le toe faaleleia o le auala lea e sau mai i Tiavi agai atu i Siumu.  O lea galuega na amata mai ia Aperila 2023 ma na iai se faamoemoega e faamae’aina ia Aperila o lenei tausaga, ae peitai ane, o lo’o fa’aauau pea ona tau faamae’a lenei galuega.

Ae ua saunoa mai le Minisita o Femalagaiga, o lenei galuega sa faia ma se faamoemoega ina ia fa’aleleia le alatele i le ogatotonu o le motu o Upolu, ae e le’i iai se faamoemoega e faia mo le CHOGM.

Na fa’ailoa atu e le afioga Olo Fiti i le Samoa Observer e faapea, o lenei galuega o se galuega ua leva ona fuafuaina e le malo ma afai ae faia faatopetope o le a tula’i mai ai ni faafitauli i se taimi o i luma.

O le a fa’aaogaina pea lenei auala mo femalagaiga a sui auai i le CHOGM.

Ma ua ripotia mai foi le malaga mai o le Tupu o Peretania – King Charles – ma o le a ia faamautu i Siumu.