Ads by Google Ads by Google

Finagalo Fono e faamanino malo le mafua’aga faafitauli i le Laufou


[ata: foa'i]
ausage@samoanews.com

Pago Pago, AMERIKA SAMOA

 

Ua talosagaina e afioga i Faipule ma Senatoa o le Fono Faitulafono le afioga i le Kovana ma le Faigamalo a Amerika, ina ia latou faamanino i le Fono le mafuaaga ua faia ai le faaiuga e tatala i lalo le Fale Faatali pasi i luma o le Laufou i Nuuuli, lea ua avea ai nei ma mataupu ua vavao ai le atunu’u.

 

O lenei mataupu na laga e afioga i Faipule ma Senatoa i taimi o folafolaga a maota taitasi i le vaiaso nei.

 

I luma o le Maota o Sui, na tulai ai le Faipule mai le Itumalo o Tualauta ma ia talosagaina se iloiloga ma sui o le faigamalo, aemaise lava i le Faatonusili o le Ofisa o Galuega Lautele a le malo, mo le faamaninoina o le mafua’aga ua tatala ai i lalo le Fale Faatali pasi i luma o le Laufou.

 

Saunoa le afioga i le alii Faipule ia Larry Sanitoa e faapea, e toatele naua le mamalu o le atunuu ua valaau atu i lona Ofisa ma faaali atu finagalo le fiafia e faatatau i lenei mataupu.

 

Na taua e Sanitoa lona le malamalama i le mafua’aga tonu lava ua faia ai le faaiuga e tatala i lalo le Fale Faatali pasi. I lona talitonuga, e le avea le tatalaina i lalo o le Fale Faatali pasi ma auala e foia ai le faafitauli o le poloka o le tiu o ta’avale i lea vaega o le atunuu i le tele o taimi.

 

Sa ia faailoa atili e faapea, i lalo o le Tulafono, o lo o manino mai ai aia tatau o Pisinisi ma tagata taitoatasi. O le tula’i mai ai o le faafitauli e pei ona faia e le malo, ua lagona ai lona faanoanoa tele.

 

Na lagolagoina e ni isi o afioga i Faipule le saunoaga a Sanitoa e aofia ai ma le Fofoga Fetalai o le Maota o Sui, afioga Savali Talavou Ale. 

 

Saunoa Savali e faapea, e leai lava se isi e le o tuu fesili lona mafaufau i le mafua’aga ua faia ai e le malo lenei faaiuga. Sa ia toe faamanatu i le Taitai o le Komiti o Galuega Lautele a le Maota o Sui, le afioga i le alii Faipule ia Loia Gutu, ina ia faatulaga se iloiloga e aami mai ai le Faatonusili ia Faleosina se’i fesiligia i le mataupu i le Fale Faatali pasi, faapea ai ma le isi mataupu e faatatau i le tele o galuega faagasolo a le malo i le taimi nei, ae o loo fia malamalama le Fono poo i ai ni pemita o nei mau galuega atina’e.

 

Na tula’i le afioga i le alii Faipule mai le itumalo o Saole, afioga Kitara Vaiau ma faailoa i luma o le Maota se tasi o tulaga mataga ua maitauina i auala o fesootaiga faaonaponei, lea ua faaaoga e le toatele o tagatanuu e laulauvavale ai i Taitai o le malo, e mafua mai i faaiuga le sa’o ua faia e le malo ae aafia ai tagatanu’u.

 

Saunoa Kitara e faapea, e le afaina i lona mafaufau faafitauli o loo tutupu mai i le malo ma le atunuu, ae o le faaaoga e tagata lautele o fesootaiga faaonaponei e lalafo ai faaupuga mataga ma laulauvavale ai i Taitai o le malo, e le gata e mataga ae ua tuu maualalo ai tu ma agaifanua fa’aaloalo a Samoa.

 

Saunoa atili Kitara e faapea, e tatau ona fesiligia le Loia Sili a le malo i lenei mataupu, ina ia mautinoa e malamalama lelei le atunuu i le mafua’aga o faafitauli faapenei.

 

I le talanoaina ai o le mataupu e faatau i atina’e ma galuega tetele a le malo o loo faagasolo, na talosagaina ai loa e le afioga i le alii Faipule ia Sanitoa le tatau lea ona tuuina mai o se ripoti mai le Ofisa o Galuega Lautele a le malo e faamanino mai ai tulaga o galuega tetele a le malo o lo o faagasolo i le taimi nei.

 

Na faamanino e Sanitoa e faapea, e tusa ai ma se ripoti na tuuina mai i le faigamalo, e tusa ma le $200 miliona le tau o galuega tetele a le malo o lo o faagasolo i le taimi nei, ma ua manaomia ai se ripoti i le tulaga o nei galuega, poo i ai ni pemita e faataga ai le faataunuuina o nei mau galuega, ae faapea ai foi ma le tulaga i alagatupe o loo faatino ai nei galuega, pe na faapefea ona faapaketi e le faigamalo. 

 

Sa ia taua se fesootaiga sa faia ma le Matagaluega o Fefaatauaiga ma Alamanuia a le malo (DOC), lea o lo o taua ai le i ai o ni faaletonu i le tulaga o le talosagaina o pemita mo le tele o nei galuega. O lona popolega e pei ona saunoa Sanitoa, ina nei avea tulaga o pemita ma faafitauli i le taumafai atu o le malo e fausia nei atina’e e tele mo le atunuu.

 

I luma o le Maota o le Senate, na fesiligia ai foi e le afioga i le alii Senatoa ia Satele Galu Satele le mataupu lava foi lea e faatatau i le Fale Faatali pasi i luma o le Laufou, lea ua tatala i lalo e le malo ona o le manatu e foia ai le faafitauli i le poloka soo o le auala i taea ma afiafi i le vaega tonu lava lea o le atunuu.

 

Saunoa Satele e faapea, e le o le Fale Faatali pasi le mafua’aga o le faafitauli e ala ai ona poloka soo le auala i ta’avale. 

 

“O le faafitauli muamua lava, e le lava vaega e paka ai pasi i tafatafa o le alatele i le taimi e piki ai pasese atoa ai ma le taimi e tuu ai pasese. A sau la le isi pasi o loo tu le pasi e tasi e tuu lana pasese, ona tu atu ai lea ma le pasi i luga o le alatele ma avea ai ma auala e poloka atu ai ma le fegasoloa’i o ta’avale,” o le saunoaga lea a Satele.

 

I lona talitonuga, e tatau i le malo ona saili se auala e foia ai le laititi o vaega e paka ai taavale, nai lo le taumafai e faatino isi fuafuaga e aofia ai ma le tatala i lalo o le Fale Faatali pasi, ae emo ane le ata ua aafia uma ai ma tagata lautele. 

 

Saunoa atili Satele e faapea, o le to’atele o le atunuu e leai ni ta’avale ae faalagolago tasi i pasi mo feoaiga. O lea la ua tatala i lalo le Fale Faatali pasi sa malu i ai le atunuu i le la poo le timuga foi, ma ua le iloa ai e tagata poo fea o le a sulu i ai.

 

Na faamatala e Satele se vaaiga faamomoi loto na ia molimauina i le taeao o le aso Gafua na te’a nei, ina ua aga’i mai lana ta’avale ae tau atu lana vaai i se Tina matua lava ma lana tama o loo kolosi mai le auala mai le Laufou ma le faamoemoe e agai atu i le Fale Tifaga i Nuuuli e faatali ai se la pasi e agai atu ai i le itu i Sisifo o le atunuu.

 

“O le taimi lea na matua malosi ai lava timuga, ae ou vaaia ai lenei atalii laititi o taumafai lava e uu le faamalu ina ia mafai ai ona malu si ona Tina mai le malosi o timuga, a o la savavali atu pea agai i le Fale Tifaga ona ua le mafai ona toe faatali ni pasi i luma o le CBT,” o le saunoaga lea a Satele. 

 

Na taua e le afioga i le alii Kovana ia Lolo Moliga i le fonotaga a le Kapeneta na sei mavae atu nei, e silia i le $200 miliona le tau o galuega faagasolo a le malo i le taimi nei. Talu ai le tele o le manaoga i tulaga o avanoa faigaluega, ae maise lava i avanoa faigaluega e moomia ai le tomai faapitoa o tagata mai fafo, o le a mafai ai e le malo ona aumai tagata mai fafo e i ai agavaa e galulue i galuega ua maua i le taimi nei.

 

Na taua atili e Lolo le taoto atu o lenei fuafuaga i le Ofisa o le Loia Sili mo le faamautuina uma o fuafuaga a o le i auina mai tagata mai fafo e galulue i le atunu’u.