Pago Pago - AMERIKA SAMOA

Ua molia nei se alii 22 tausaga mai Samoa i moliaga o le Fa’atupu Vevesi, Fa’ao’olima ma le Tete’e i leoleo a’o latou taumafai e ave faapagota le ua molia, ona o se faalavelave na tupu ia Oketopa 5, 2024, lea na fufusu ai le ua molia ma seisi alii, ae fa’ai’u mai lona to’asa i se tamaitai ma lona uso laititi faapea ma le atalii a le ua molia, e na o le 6 masina. 

[O le a le lomia e le Lali ia suafa o i latou na a’afia po o ua molia, i lenei faalavelave, aua le puipuiga o fanau iti.]

O le 8 i le taeao o le aso 5 o Oketopa, sa fa’afeso’ota’i ai e se tamaitai ia le Ofisa Leoleo i Fagatogo, mo se fesoasoani ona o se misa a se aiga lata ane.  E taunu’u atu leoleo i le nofoaga na tupu ai le faalavelave, o tu tu mai le alii lea ua molia ma se tamaitai, i luma o le fale.

Na fa’ailoa ifo e le tamaitai i leoleo, o ia lea sa valaau atu i le Ofisa a Leoleo ma faamatalaina i leoleo le mea sa tupu.

Sa ta’ua e le tamaitai, na fufusu le ua molia ma lona tuagane a’o la taumafai ma lona uso laititi e vaovao le la fusuaga.  Ae liliu atu le ua molia i le tu’i lona mata ma fasi lona uso laititi.  Ona tago lea o le ua molia, i le piki i luga lona atalii e ono masina ma po le gutu.

Ina ua fa’ailoa atu e leoleo i le ua molia, o le a aveina o ia i totonu o le ofisa a leoleo mo le su’esu’eina, sa amata ona tete’e mai le ua molia i taumafaiga a leoleo e lokaina mai o ia.

E tusa ai ma faamaumauga a le malo, sa tu i luga le ua molia ma ‘e’e ma palauvale mai i le tamaitai na a’afia ma tamo’e atu agai i le tamaitai.  Ae na mafai ona taofi o ia e leoleo, ma taumafai e loka ona lima, ae atili ai ona mimilo le ua molia.

A’o taumafai leoleo e taofi lima o le na molia, ae taumafai foi le alii e u’una’i ‘ese lima a leoleo ma sa o’o lava ina taumafai le ua molia, e so’a se leoleo i le fa’aaogaina o lona ulu.  Ina ua mafai ona lokaina e leoleo ia lima o le ua molia, sa faapea loa ona aveina atu o ia i le Ofisa a Leoleo i Fagatogo.

Na aofia foi i le faamatalaga a le tamaitai na a’afia, e valaau atu lona uso laititi ma tagi atu ia te ia, ae ua alu ese o ia mai i le fale e agai atu i galuega.  Ma sa fai loa lana faanoi ae toe fo’i mai i le fale, ma ona va’aia le laulauvavale solo o le ua molia ma le malomaloa solo.

Sa ta’ua foi e le tamaitai le taumafai o le ua molia e tu’i leisi ona uso laititi, lea o lo’o ma’itaga ma sa ia (tamaitai) taumafai e valaau leoleo, ae tau’ai atu o ia e le ua molia, i ni ma’a.

Na fa’amatala e le uso laititi a le tamaitai na a’afia e faapea, a’o iai o ia i le galuega, na valaau atu lona uso e toe fo’i mai i le fale, ona o lo’o pisa ia le uo tama (a le uso laititi) ma le tuagane a nei tamaitai.

Ta’ua e le uso laititi, e taunu’u atu o ia i le fale, e le o iai lana uo tama ma sa o la talanoa loa ma lona tuagane ma sa faamatala atu e lona tuagane ia te ia, le tolaulauina mai e le uo tama a le uso laititi, ia mea lelei uma sa ia (le ua molia) faia mo le aiga.

A’o talatalanoa le uso laititi ma lona tuagane, ae taunu’u atu loa le ua molia ma tamo’e atu e fasi le tuagane a le uso laititi.  Sa taumafai le uso laititi e taofiofi mai lana uo tama (le ua molia) a’o le taimi lea o lo’o taofiofi mai e lona uso matua ia le la tuagane.  Ae liliu mai le ua molia i le uso laititi ma tu’i ona foliga ma lona fatafata, ma faatonu le uso laititi e tu’u o ia.

Sa ia palauvale ma lafo ni upu mamafa i le teine matua ma lona tuagane ma faatonu i la’ua e o ese ma le fale.

Na ta’ua e le uso laititi le fiu o lona uso matua e tau fa’aato’afilemu le ua molia, ae ua le mafai ma i’u ai ina ona valaauina ia leoleo.

Sa faamatala e se molimau na fa’atalanoaina e leoleo, lona valaau atu i se tasi o le auuso (tamaitai) ona ua fo’i atu le ua molia i le fale, ae o lo’o fa’asuaava, ma amata ona ta’ei meafale.  Ma na si’i ma foi e le ua molia ia lona atalii e ono masina, ma po lona gutu. 

E tusa ai ma le faamatalaga a le tuagane lea na fufusu ma le ua molia, na ia valaau i lona tuafafine e toe fo’i atu i le fale, ina ua alu atu le ua molia ma amata ona fa’aleaga meafale.

Ua molia nei lenei alii i moliaga e aofia ai;

Faitauga 1:  Faatupu Vevesi i totonu o aiga (sauaga i totonu o le aiga), o se vaega ‘C’ o solitulafono mama, e mafai ona loka ai mo aso e sefululima, po o se sala tupe e i le va o le $150 ma le $300; po o faasalaga uma e lua.

Sa faapea foi ona molia lenei alii i le Fa’ao’olima i lona tulaga e tolu (sauaga i totonu o le aiga) ma le Faia o se gaioiga e a’afia ai le saogalemu o fanau iti.  Ma o nei moliaga uma (Faitauga 2, 3, 5 & 6), o se vaega ‘A’ o solitulafono mama, e mafai ona nofosala ai i le falepuipui mo le tausaga atoa, po o se sala tupe e $1,000; po o faasalaga uma e lua.

O le Faitauga lona 4, o le fa’ao’olima i lona tulaga e tolu (sauaga i totonu o le aiga), o se vaega ‘C’ o solitulafono mama, e mafai ona loka ai se tasi i aso e sefululima, po o se sala tupe e i le va o le $150 ma le $300; po o fa’asalaga uma e lua.

Ma le Faitauga e 7, o lona tete’e i leoleo a’o taumafai e ave faapagotaina o ia, o se vaega ‘A’ o solitulafono mama.  E mafai ona loka ai se tasi i le tausaga atoa, po o se sala tupe e $1,000 po o faasalaga uma e lua.

E $50,000 le vaegatupe sa faatulagaina e mafai ona tatalaina ai le ua moila, e fa’atalitali ai lona faamasinoga.