Honolulu - HAWAII

O se tina Samoa i Laie, Hawaii, o lo’o faapea na molia i le fasiotia o sona alo sa vaetamaina, na toe tula’i i luma o le faamasinoga i le aso ananafi ma lana loia.

O Sina Pili, o lo’o molia i le fasioti tagata le fuafuaina, faia o se tulaga na a’afia ai le saogalemu o se fanau iti faapea ma lona le tausi lelei i lenei teineititi, na mafua ai ona maliu.

O lo’o te’ena e Pili ia ona moliaga.

Sa fa’aleoina e lana loia, le susuga ia Myles Breiner le agava’a o Pili mo le tatalaina i tua i lalo o le va’ava’aiga a lona aiga, po o lona to’alua. Ma e le o iai se tulaga e ono a’afia ai le saogalemu o leisi a la fanau e to’atolu sa vaetamaina foi, e ui i le finau mai a loia a le malo, i le nofo popole i le saogalemu, o isi alo a Pili pe afai ae tatalaina o ia i tua.

Ma o le a taumafai ia le itu a le malo, e aumaia ni a latou molimau e molimauina le le talafeagai ona tatalaina i tua o Pili.

O le aso Lua o le vaiaso fou, o le a faapea ona toe fa’aauauina ai lenei mataupu.

Ae i le taimi nei, o lo’o finau foi le aiga o le teineititi na maliu, o Azaeliyah Pili-Ah You, ina ia maua se fa’amasinoga tonu mo ia.

I se ata na fa’aali e le ‘aunty’ a Azaeliyah, sa ia ta’ua ai le iloa atu ai o manu’a i le tino o Azaeliyah, a’o taoto o ia i totonu o lona pusa maliu.

Ua fa’aalia e le aiga a Azaeliyah le manaomia o se faamasinoga tonu mo lenei agaga ua afaina lona ola, a’o ititi o ia.

TALA’AGA O LENEI FA’ALAVELAVE

O le 22 o Tesema 2023, na faapea ona vala’auina ai le vaega lavea’i, ina ua maua atu Azaeliyah Pili-Ah You, i lona aiga i Laie, ua le toe manava, faatasi ai ma manu’a i se vaega tele o lona tino, na aofia ai ma ona foliga, e pei ona molimauina e le loia a le malo.

Sa aveina atu Azaeliyah i le falemai i Kahuku ma fa’amaonia ai, ua maliu o ia.

Na le’i vave maua se fa’ai’uga mai i le vaega e gafa ma le su’esu’eina o tino maliu, i Honolulu, ona sa manaomia sina taimi e toe iloilo ai fa’amaumauga a le falema’i ma le fa’aauauina o a latou su’esu’ega.

Ae i se feiloaiga a leoleo ma vaega fa’asalalau, na fa’alauiloa ai e Lt. Deena Thoemmes mai i le ofisa a leoleo i Honolulu, e faapea, i le mae’a ai o su’esu’ega a le falemai, ua fa’amaonia ai le fa’atamo’eina faafia e le ua molia, ia Azaeliyah mai i le falesa.  Faatasi ai ma le sauaina e le ua molia, ia Azaeliyah, i le va o le 30 minute.

E  le gata i lea,  na fa’alauiloa mai foi e le ofisa a leoleo i Honolulu le fa’amae’aina o su’esu’ega a le falemai ia Iuni 5, 2024 ma ua fa’amaonia ai le maliu o Azaeliyah, mai i sauaga ma o lona maliu ua mafua, ona ua fasiotia o ia e se tagata.