AMERIKA

O le aso 5 o Mati, 2025, sa taulimaina ai e le vaega fa’asalalau a le ‘Associated Press’ ia se fa’aaliga lotoifale, e tusa ai ma se fuafuaga a le Matagaluega o Fitafita Tuai, ina ia ave’esea ni galuega se 83,000 i totonu o ofisa feterale, lea o lo’o gafa ma le tausia o le soifua maloloina o le faitau miliona o fitafita tuai.

E le o mautinoa lelei i le taimi nei, le a’afiaga o Fitafita Tuai a le teritori, i lea faaiuga.  O lo’o iai i totonu o Amerika Samoa ia se ofisa autu mo fitafita tuai, e fesoasoani i manaoga ‘ese’ese mo vetereni.  Ma o lo’o iai foi se falemai mo vetereni, o lo’o ua fuafuaina le faaopoopoina o nisi o ana auaunaga, ina ia mafai ai ona fa’ataunu’uina talavai a vetereni i totonu o Amerika Samoa, ae le o toe tau malaga atu i Amerika mo a latou talavai.

O nei ofisa e latou te mataituina ma faatinoina le tele o auaunaga ‘ese’ese mo vetereni, e aofia ai le tausia o soifua maloloina, o nofoaga e faamautu ai, o inisiua mo o latou aiga pe a maliliu, o penisone, o tupe maua mo aoaoga, o fesoasoani i falepuipui ma faamasinoga.  

O le ¼ o tagata faigaluega e 482,000 a le VA, o fitafita tuai uma.

I le masina ua mavae sa faapea ona taofia e le faigamalo a Trump ia tupe fa’aalu a le malo feterale, ma ua avea ma tulaga ua a’afia ai soifuaga o tagata faigaluega  ale malo, ofisa latou te galulue aemaise o tagata e latou te tautuaina.  

Aemaise ai ia vetereni ma o lea a’afiaga e sili atu nai lo le leai o ni galuega.

E tusa ai ma se suesuega a se alii polofesa mai i le iunivesite a Amhert, i le setete o Massachusetts, o Jamie Rowen, sa ia fa’aalia ai le tele o lu’itau o lo’o feagai ma fitafita e tu’ua vaega’au, ma taumafai e toe fa’atulaga o latou olaga.

 Ae o le a avea nei suiga po o le fa’aititia o tupe faasoasoa ma tulaga o le a sili atu ai ona faigata o latou soifuaga.  

Ma e lima ni mafuaaga na tu’uina mai e Rowen.

• Ave’esea o le aufaigaluega feterale.
• Faaitiitia vaegatupe mo tausia o le soifua maloloina a le VA.
• Fa’aitiitia o le aufaigaluega e mataituina ia ‘suicide hotline’
• Leai se tupe fa’aagaga mo su’esu’ega
• O ni isi suiga o lo’o fuafua mo le lumanai

E tusa ai ma tulafono a le malo feterale, o lo’o ma’oti mai ai le tatau ona ave le fa’amuamua o avanoa faigaluega, i vetereni.  Ma o le mafua’aga lea o le 30% o tagata faigaluega feerale, o vetereni, ae o le afa o i latou o tagata o iai ni manaoga faapitoa i le tino.

Ua taumateina foi, mai i le to’a 38,000 tagata faigaluega feterale sa fa’ate’aina mai a latou galuega i le uluai lima vaiaso o le faigamalo a Trump, o le 6,000 o i latou, o vetereni.

Ma ona o le to’atele o tagata faigaluega ua fa’ate’a mai a latou galuega, o lona uiga, ua a’afia ai foi auaunaga mo le tausia o le soifua maloloina o vetereni.  

I le va o Mati 2023 ma Mati 2024, e 400,000 vetereni ua i fa’amaumauga a le VA mo penefiti.  O se si’itaga e 30% nai lo le tausaga i luma atu.  Ma sa faapea foi ona fa’alautele avanoa agava’a mo vetereni, e latou te mauaina ai penefiti mo le tausiga o latou soifua maloloina.  Ae peitai ane, i suiga fou ua iai nei, ua sili atu ona fa’afaigata i le VA ona fa’ao’oina atu la latou auaunaga mo i latou ua fa’ato’a agava’a mo ia penefiti.

Sa ta’ua e Rowen, e tusa ai ma ana su’esu’ega, e ui i le toatele o tagata o Amerika ua a’afia i suiga ua faia e Trump i tala o le tupe faasoasoa, ae peitai, e sili atu ona tele le a’afiaga o i latou na tautua i totonu o vaega’au.