Ads by Google Ads by Google

Loka i le faaoolima i lana uo tamaitai ae maua ai fualaau faasaina


[ata: foa'i]
ausage@samoanews.com

Pago Pago, AMERIKA SAMOA

 

O le ali’i lea na pu’e faapagota e Leoleo i le masina na te’a nei, e mafua mai i le fa’alavelave lea na tuuaia ai o ia i lona fasi faamo’amo’aina lea o lana uo tamaitai i le tausaga na te’a nei, ua molia nei o ia i le umia o fualaau fa’asaina, ina ua maua e Leoleo fualaau fa’asaina ia te ia i le taimi na pu’e faapagota ai o ia.

 

E ui e le o manino mai i le taimi nei le mafua’aga na tuai ai ona molia e le malo le susuga a Faamanu Ualesi ona o le fa’alavelave na tula’i mai i le tausaga na te’a nei, peita’i o le itu mautinoa, o lea ua taofia nei o ia i totonu o le Toese i Tafuna i le taimi nei a o faagasolo ai taualumaga o lana mataupu.

 

O loo taua e le malo i le latou tagi e faapea, o le taeao o le aso 11 o Iulai 2019 na talosagaina ai e se Tina se fesoasoani mai le Ofisa o Leoleo i Tafuna, i se ali’i na taumafai e ave faamalosi lana uo tamaitai i totonu o se ta’avale ma ia faaoolima i ai. Na taua atili e lea Tina i Leoleo, e le i faatagaina e le latou aiga le ali’i lenei e alu atu i le latou fanua, ae na ia ulufale faamalosi atu lava i totonu o le lotoa ma faatino ai lenei solitulafono.

 

O le ali’i ua molia e 45 tausaga le matua, ae o le tamaitai na aafia e 31 tausaga lona matua, ma ua lata i le 5 tausaga o le la mafutaga faaleuo, e pei ona taua i faamaumauga a le Fa’amasinoga.

 

Na maua le avanoa e fesiligia ai e Leoleo le tamaitai na aafia i lenei mataupu atoa ai ma molimau sa i ai i le taimi o le fa’alavelave, i le mafua’aga na tula’i mai ai le faalavelave e pei ona tu’uaia ai Ualesi.

 

Na taua e le tamaitai na aafia e faapea, talu mai le 5 tausaga o le la mafutaga ma Ualesi, e le o se taimi muamua lenei ua fasi ai e le ua molia o ia. O nisi taimi e matua tigaina ai lava i le fasiga o ia, e le mafai fo’i ona toe fealua’i ona o manu’a e aafia ai ona foliga, peita’i, e le mana’o lava e faailoa i se tasi faafitauli i lo la va ona o lona alofa naunau ina ia mautu ma lelei le la mafutaga.

 

O le 2 tausaga talu ai na tuua ai loa e le tamaitai na aafia ia le fale sa la nonofo ai ma Ualesi ae nofo i le fale a lona aunty i Iliili, ona ua le lava i le fasi soo o ia. O le faaiuga o le vaiaso lea na sosoo ma le aso Gafua na tula’i mai ai le fa’alavelave, na moe ai le tamaitai na aafia i le fale o lana uo tamaitai, ma sa latou mafuta faatasi ai fo’i ma isi ana uo tamaita’i e to’atolu.

 

Ina ua malama le taeao o le aso Gafua, na toe momoli ai loa le tamaitai na aafia i le latou fale i Iliili. A o aga’i atu le tamaitai na aafia i totonu o le lotoa o le fanua e aga’i atu i le fale, ae faalogo ua valaau atu se tagata i lona igoa. Na faigofie ona ia lagona, o le leo lea o Ualesi.

 

Na ia faliu i tua ma ia iloa atu ai Ualesi o loo tu mai i le faitoto’a o le pa, o loo valaau atu ia te ia e alu atu. Na vaaia e le tamaitai na aafia foliga ita o Ualesi, ae ona o lona manatu e tausi le filemu, na mafua ai ona savali i le vaega o loo tu mai ai Ualesi.

 

Na ita Ualesi ma fesili atu ia te ia poo fea sa i ai i le weekend, ae na tali atu i ai, na eva i le fale o lana uo teine i Tafuna. E le i talitonu Ualesi i lana tali. Na tago atu Ualesi ma toso mai lona uso atoa ai ma lona aveese o lana telefoni mai lona lima. 

 

Na sosoo lava gaioiga ia a Ualesi ma lona tago atu loa ua toso le tamaitai na aafia aga’i i le vaega sa tu mai ai lana pikiapu i le isi itu o le auala. Na ee le tamaitai na aafia ma fai atu ia Ualesi e tu’u o ia ae sa faaauau pea ona toso e Ualesi lana uo tamaitai, tatala le faitoto’a o le ta’avale ae una’i ai o ia i totonu ma fa’aauau ai pea ona ia faaoolima ia te ia e ala i lona ta tu’i ona foliga ma titina lona ua.

 

Na iloa mai e tausoga e to’alua a le tamaitai na aafia le faalavelave ua tupu, ma la tamomo’e mai ai loa e fesoasoani, peita’i na faigata ona la fesoasoani ona ua loka e Ualesi le faitoto’a o le ta’avale. 

 

Na tu’i e le tausoga a le tamaitai na aafia le faitoto’a o le ta’avale ma tae’a ai le ti’oata, ma mafai ai loa ona la tatala le faitoto’a ae taumafai e toso mai i fafo le tamaitai na a’afia, ae o loo toso atu fo’i e Ualesi le lima o le tamaitai ma taumafai e taofi i totonu o le ta’avale. 

 

E le i se taimi na faia ai finauga a le vaega lenei ae mafai ona loa toso i fafo mai le ta’avale le tamaitai na aafia ma latou tamomo’e ai loa i le fale, ae o le taimi fo’i lea na faaola ai le ta’avale a Ualesi ma alu ese loa. 

 

Na fesiligia e Leoleo tausoga e to’alua a le tamaitai na aafia, ma la faamaonia ai faamatalaga uma na tuuina atu e le na aafia i Leoleo.

 

Na taua e le tausoga alii a le tamaitai na aafia e faapea, ana leai le ma’a na ia fa’aaoga e tu’i ai le tioata o le ta’avale ma mafai ai loa ona tatala ae aumai i fafo le tamaitai na aafia ma latou tamomo’e loa i totonu o le lotoa ma loka le pa o le fanua. 

 

E atoa le vaiaso talu ona mae’a le fa’alavelave o taumafai Leoleo e saili ia Ualesi ua le mafai ona maua o ia. Na asia le fale a lona uso matua ma lona to’alua sa nofo ai o ia, peita’i na fa’aalia e lona aiga, na pau lava le faamatalaga na latou maua, o Ualesi o loo nofo i le fale o lana uo tamaitai i Iliili.

 

Ua aga’i atu i le 2 masina talu ona saili e Leoleo ia Ualesi ae ua le mafai lava ona maua. E ui ua mae’a ona sainia e le Faamasinoga lana poloaiga e pu’e faapagota ai Ualesi, ae ua le mafai lava e Leoleo ona maua o ia.

 

Ae i le masina na te’a nei, na pu’e faapagota ai e Leoleo ni ali’i se to’alua mai Ottoville ona o tu’uaiga i le faatupu vevesi i nofoaga faitele atoa ai ma le onana le mafaufau i luga o le alatele. O se tasi o i laua na pu’e faapagota e Leoleo, o le susuga lea a Faamanu Ualesi, le ali’i o loo tau sailia i lenei mataupu.

 

Ina ua mae’a ona fesiligia e Leoleo ia Ualesi e tusa ai o le mataupu na tulai mai i Ottoville, na faailoa atu loa e Leoleo ia Ualesi le tusi saisai mai le Faamasinoga e pu’e faapagota ai o ia, e mafua mai i le fa’alavelave lea na tula’i mai i le masina o Iulai o le tausaga na te’a nei, lea na ia faaoolima ai i lana uo tamaitai.

 

Ao le auina atu Ualesi i le Ofisa o Leoleo i Tafuna mo suesuega, na saili e Leoleo lona tino mo ni aupega, ae maua ai fualaau faasaina ia te ia. I totonu o le taga o le ofu a Ualesi sa laei i le po lea na maua ai e Leoleo se paipa tioata o loo i ai vaega o le pauta faasaina, atoa ai ma se tama’i taga pepa iila e tumu i lau mamago o le mariuana.

 

Na malie Ualesi e tuuina atu sana faamatalaga i Leoleo e tusa ai o le mataupu na tula’i mai i le va o ia ma lana uo tamaitai. I lana faamatalaga i Leoleo, na te lei fasia lana uo tamaitai e pei ona tu’uaia ai o ia, ae sa la tau upu ma misa e pei ona la masani ai. Sa ia teena tu’uaiga i lona toso faamalosi o ia i totonu o le ta’avale ma fasi ia te ia.

 

I tulaga o fualaau fa’asaina, na ioe Ualesi i Leoleo, o mea na maua i lana taga, o fualaau fa’asaina a ia.

 

O le masina na te’a nei na tula’i ai Ualesi i luma o le Fa’amasinoga Faaitumalo. E 2 tagi a le malo ua faila faasaga ia te ia. 

 

I le tagi muamua, ua tu’uaia ai o ia i le moliaga o le taofia faapagota o se tagata atoa ai ma lona taumafai e ave faamalosi se tagata i ni gaioiga e aofia ai sauaga i totonu o aiga, o le vaega C lea o solitulafono mamafa, lea e faasala ai se tasi i le Toese mo le umi e oo atu i le 7 tausaga, pe faasala i le salatupe e $5,000.

 

I le tali lona lua a le malo, o lo o tu’uaia ai Ualesi i lona umia faasolitulafono o mariuana atoa ai ma le moliaga o lona umia faasolitulafono o vaega o le pauta faasaina o le aisa, o solitulafono mamafa uma. O loo tu’uaia fo’i o ia i le moliaga mama o le faatupu vevesi i nofoaga faitele.

 

E $20,000 le vaega tupe lea ua faatulaga e tatala ai Ualesi i tua mai le Toese i Tafuna.