Ads by Google Ads by Google

Malaga le Kovana o Amerika Samoa, Lemanu Peleti Mauga, i Hawaii


[ata: foa'i]

Pago Pago, AMERIKA SAMOA

I le malaga togipau a le Medicaid i le aso Tofi ua te’a mo Hawai’i, o lo’o malaga fa’atasi ai ma le afioga i le Kovana Sili, Lemanu Peleti Palepoi Sialega Mauga, ae ua ia tofia le afioga i le Lutena Kovana, Talauega Eleasalo V. Ale, e avea ma kovana le-tumau i lenei vaitaimi. 

O le tofia o Talauega sa faia i se fa’aliga fa’alauaitele a le kovana i lana kapineta ia Iuli 29, 2022 ae le’i fa’ailoa i lea tusitusiga le aso e toe taliu mai ai lana malaga i le teritori. 

Ma e le’i fa’ailoa foi e le Ofisa o le Kovana - e pei ona fesiligia e le Samoa News i le vaiaso ua te’a - le mafuaaga o le tuua e le kovana sili o Amerika Samoa ma le aso e toe fo’i mai ai.

Ae sa fa’ailoa mai i le Samoa News e se tasi o tagatanu’u o le teritori, e le’i leva atu nei ona toe taliu mai i le teritori, e fa’apea o le malaga a le kovana i Hawaii ina ia auai i se tasi o fa’atasiga o lo’o tuufaatasia  i Honolulu mo le Ofisa o Amerika Samoa i Hawaii. 

Sa fa’ailoa e lea tagatanuu, o lea fa’atasiga sa mua’i fuafua i le masina o Iuni o le tausaga lenei ma le fa’amoemoe e auai Lemanu po’o Talauega. Ae peitai e le’i mafai ona malaga atu i ai ta’ita’i o le atunu’u. 

O lea fa’atasiga ua fuafua i le taimi nei mo le aso 6 o Aukuso. 

O le malaga togipau a le Medicaid i le vaiaso ua te’a sa malaga ai fo’i ma le Teutupe a le malo, ia Malemo Tausaga. 

I le taimi o le iloiloga o le paketi a le malo i le vaiaso ua te’a mo le tala o le tupe fa’asoasoa o le tausaga tupe 2022, sa fa’ailoa ai e Malemo i le Komiti Soofaatasi a le Fono, lona fa’amoemoe e malaga i Hawaii mo talavai i le aso 29 o Iulai. 

E le’i fa’ailoa e Malemo le aso e toe fo’i mai ai i le atunu’u.