Pago Pago - AMERIKA SAMOA

O le po o Tesema 27, 2024, na taofia ai e leoleo ia se taavale (rental), na masau atu agai i Laulii, i tafatafa o le falesa Metotisi.

Ma e pei ona ta’ua i fa’amaumauga a le faamasinoga, o le susuga ia Shawn Siamu sa faafoeina le taavale lea na taofia e leoleo.  Ae peitai, ina ua tapa e leoleo lana laisene avetaavale, e le’i iai sana laisene avetaavale.

O lea na aveina ai loa Siamu i le  ofisa a leoleo i Fagatogo ma sa taofia ai foi iina ma lana, a’o feagai leoleo ma su’esu’ega.

E lua ni tu’ua’iga sa faia faasaga ia Siamu, i lea afiafi, na aofia ai le aveta’avale saosoa ma le leai  o sana laisene aveta’avale.

Ina ua su’esu’eina e leoleo ia le taavale a Siamu, ae e le’i alu atu le pule o le fale ‘rental’,  e ave’ese mail ana taavale, sa maua ai e leoleo i totonu o le taavale ia se koneteina lanu meamata, sa iai i totonu se paipa mata’eta’e, lea e fa’aaoga e ula ai le Aisa.  

Na maua ai foi i totonu o le paipa ia ni vaega o fuala’au faasaina lea sa fa’aamaonia, o le Aisa.

Ae na fa’ailoa atu e Siamu i leoleo, e le o sana meatotino lea na maua i totonu o le taavale.

Sa maua foi i totonu o le taavale ia se ato lanu uliuli, lea sa fai mai Siamu o lana ato.  Ae na maua ai i totonu ni ‘straws’ ua mae’a ona tipitipi ma se tama’i taga pepa o iai ni pauta pa’epa’e i totonu.

E tusa ai ma se molimau a Siamu, o le pauta lea sa maua i totonu o lana ato, o se pauta ta lavelave na avatu e sana uo. 

Ae peitai, ina ua su’esu’eina e leoleo ia lea pauta pa’epa’e, sa faamaonia ai, o se vaega o fualaau faasaina, o le ‘cocaine’. 

O le afiafi lava lea na aveina ai loa Siamu ma lokaina i le to’ese i Tafuna mo le 48 itula.

Na molia Siamu i moliaga e lua, na aofia ai;

Faitauga 1:  Umia faasolitulafono ia se vaega o fualaau faasaina (Aisa); o se vaega o solitulafono mamafa, e mafai ona nofosala ai i le va o le lima ma le 10 tausaga, po o se sala tupe e i le va o le $5,000 ma le $20,000; po o faasalaga uma e lua.

Faitauga 2:  Umia faasolitulafono o se vaega o fualaau faasaina (cocaine), o se vaega o solitulafono mamafa; e mafai ona nofosala ai i le va o le lima ma le 10 tausaga, po o se sala tupe i le va o le $5,000 ma le $20,000; po o faasalaga uma e lua.

E $5,000 sa fa’atulagaina e mafai ona tatalaina ai i tua Siamu, e faatalitali ai lona faamasinoga.