Pago Pago - AMERIKA SAMOA

O se taulealea e 20 ma ona tupu tausaga, ia Sone Wilson, sa avea ma autu o se ata-video na faasalalauina i luga o upega tafailagi e uiga i se faʻalavelave ma leoleo, ua molia nei e le malo. 

O Wilson na muamua tula’i i luma o le Fa’amasinoga Fa’aitumalo i le amataga o le vaiaso ua te’a, ma o lo o tu’uaia o ia i le fa’alavelave o le fa’atupu vevesi i nofoaga faitele; tetee atu i le pueina faapagota ma le faaleagaina o meatotino i le tulaga lua.

E tusa ai ma le tagi a le malo i le fa’amasinoga, o le aso 4 o Fepuari, 2023 na faafesootai ai e le Ofisa o Leoleo i Fagatogo le Ofisa o Leoleo i Leone e tusa ai o se pasi na mu i luma o le Western Union i Puapua, Leone.

“Na faatonuina i matou e Lutena F. Moafanua e auai i lea mataupu. Ina ua taunuu i le nofoaga, na matou maitauina le feoai solo o taavale, o nisi o taavale na afe i tua ae o isi taavale na o ese mai le pito i luma o le paka a le Jeli Mart.”

Fa’ailoa i le tagi a le malo e fa’apea sa matauina foi e leoleo isi tagata pueina ata ma video i lea nofoaga. O lea na  faataapeapeina ai e leoleo i latou ma poloka auala uma i sasae ma sisifo. Ae ui i lea, o nisi o taavale na mumusu e usitaʻi ae o loʻo agaʻi latalata i le mea na mu.

Sa maitauina foi e leoleo se pasi o lo’o mu ai le afi i lalo o le pa’u agavale pito i tua ma tumu i le asu i totonu o le pasi.

O lo o taua i le tagi a le malo e fa’apea, ina ua mae’a ona puipuia le pasi o lo o mu, na fa’apotopoto ai loa leoleo i luma o le Falemeli i Leone e fa’amautu le auala tele ma ta’ita’i atu ta’avale i le itu agavale o le vaega e paka ai ta’avale a le Jeli Mart ina ia fa’aauau pea le feoa’i o taavale.

Mulimuli ane, na taunu’u le vaega Tineimu ma tineia le afi. A o taumafai le au fuimu e tineia le afi, na tu ai se alii e le mailoa lona suafa, o  tietie i lana uila vilivae, i tua o le pasi i le isi itu o le Jeli Mart ma talanoa ma se tagata na tu latalata ane i le fale faatali pasi.

Ina ua uma le la talanoaga, sa faaauau pea ona tietie atu le a taulealea i tafatafa o le pasi mu ma taofi e leoleo le uila vilivae.

A’o savali atu i lea itu, na vaaia ai e le alii leoleo ia Leifi Masoli Matai’a le sasau atu e lea taulealea o lona tulilima agavale ma tau i luga o le fatafata agavale o le alii leoleo o Leifi, o lea na ave ifo ai loa o ia e le alii leoleo o Leifi faatasi ai ma le fesoasoani a le alii leoleo o Felise, ae sa tetee lava lea taulealea.

E tusa ai ma le tagi e faapea, i le taimi na taofia ai, na taumafai ai alii Leoleo ia Leifi ma Matai’a e tuu lima i luga o le ua molia, ae sa faaauau pea ona ia tete’e ma ee atu ma fesiligia pe aisea ua latou pu’e faapagota ai o ia ae sa musu lava e tuu ona lima i lona tua.

O lea na tago atu ai Matai’a] i le vae agavale o le ua molia ma punou i luga, ona ia usitaia lea o le faatonuga a leoleo.

Na fa’aaoga e le ali’i Leoleo o Leifi ni lima e lua ma tu’u i luga o le ua molia ina ia aua ne’i manu’a ona o lo’o tete’e pea o ia ma tu’u i totonu o le itu taumatau pito i tua o le taavale leoleo.

O lo o ta’ua e faapea na matala le faitoto’a o le ta’avale leoleo ma sola eseese ai le ua molia, ‘ao loka on lima. Na tuliloa e leoleo ma tago atu i lona ofutino ma pauu uma ai i lalo.

Sa faaauau pea ona faia e le ua molia ni leo le talafeagai, ona toe tuu lea o ia i totonu o le taavale leoleo ma momoli atu i le Ofisa o Leoleo i Leone. 

I lea nofoaga, o loʻo faia pea ni leo le talafeagai e le ua molia ma ia taua o leoleo e "valea" ma latou te le iloa pe faʻafefea ona fai a latou galuega.

Na tu’u e le ali’i Leoleo ia Matai’a le pepa lapata’i o aia tatau i ona luma ma taumafai e fa’amatala le mea o le a tupu.

“Ae ui i lea, na tu i luga le ua molia mai lona nofoa ma alaga” e ave ese ia mea “ou te le faia se faamatalaga pe faia soo se mea e te fai mai ai. Ou te le fia talanoa i se tasi o outou alii ofisa valea!”

“O le a ou aumaia ‘au tama ma o le a outou mauaina uma mai ia i matou! Ua ou fasiotia tagata aua le tofotofoina aʻu."

Na taua e le malo le tele o faiga tau fa’amata’u na faia e le ua molia i le Ofisa o Leoleo i Leone a’o taumafai leoleo e fa’amae’a le fa’atonuina o le resitalaina o le ua molia. 

Na taumafai lutena Fiailoa Moafanua i le tele o taimi e faafilemu le ua molia, ae sa faaauau pea ona ia alaga ma faia tala taufaamata’u. 

O lo o tu’uaia e fa’apea, o le taimi lava na faliu ai le ali’i Leoleo ia Matai’a, na tago atu le ua molia i lana telefoni feavea’i ma togi i lalo ma faaleagaina ai le telefoni.

O lo’o faaauau pea lenei mataupu i luma o le fa’amasinoga.