Ads by Google Ads by Google

Molia fasioti tagata faamoemoeina le alii na ia faaoo maliu lona to’alua

Ua molia nei e le malo o Amerika Samoa le alii lea na ia fasi faamo’amo’a lona faletua seia oo ina maliu i le moliaga mamafa o le fasioti tagata faamoemoeina, atoa ai ma isi solitulafono e pei o le moliaga mamafa o le susunu fale i le tulaga muamua; atoa ai ma moliaga mama e 3 e aofia ai le moliaga e tasi o le faaoolima i le tulaga tolu, ma moliaga e 2 o lona faia o gaioiga e ono lamatia ai le saogalemu o fanau laiti.

 

Na faailoa e le susuga a Amosa Lautaimi i Leoleo Suesue, na ia fuafuaina lava le fasiotiina o lona to’alua, ona e le fa’amoni lona to’alua i le la ulugali’i.

 

O le taeao o le aso Gafua na te’a nei na tula’i ai Lautaimi i luma o le afioga i le ali’i Fa’amasino ia Elvis P. Patea mo lana ulua’i iloiloga, ma poloaina ai loa le toe taofia o ia i le Toese i Tafuna e aunoa ma se tupe e tatala ai i tua.

 

I se toe tula’i le ua molia i le fa’amasinoga ia Aperila 1.

 

TAGI A LE MALO

 

E to’atele Leoleo na tali atu i le valaau mai Nu’uuli mo se fesoasoani, ona o se Tina talavou na taua le manu’a tigaina ina ua faaoolima i ai lona to’alua i le taeao o le aso Tofi,  Mati 19, 2020.

 

Na taunu’u Leoleo ma latou taumafai loa e aveese mai le fale nisi o le fanau a le ulugali’i sa i totonu o le fale i le taimi na tula’i mai ai le fa’alavelave, atoa ai ma le auina atu o le tino o le Tina i le ta’avale Falema’i mo nisi o togafitiga, ae pu’e faapagota le Tama o le aiga na auina atu i le Ofisa o Leoleo i Tafuna mo isi suesuega.

 

O le tuga o manu’a na aafia ai le ulu ma le tino o le Tina na a’afia, na mafua ai ona faanatinati atu ma taofia ai loa i le potu tigaina i le Falema’i o le LBJ i Faga’alu. O le taeao o le aso na sosoo ai, aso Faraile, Mati 20 i le itula e 10:30 i le taeao na tuuina mai ai le ripoti a le Foma’i, ua maliu le Tina na a’afia e mafua mai i le matuia o manu’a sa aafia ai lona tino.

 

O le aso lava fo’i lea na maua ai le avanoa e fesiligia ai e Leoleo le ua molia e tusa ai o le faalavelave sa tula’i. Ina ua mae’a ona fa’ailoa i le alii ua molia ona aia tatau faaletulafono, sa ia taua ai lona malamalama i ona aia faaletulafono, ma ua ia mana’o fo’i e faia sana faamatalaga tusitusia i Leoleo e tusa ai o lea faalavelave sa tupu.

 

Na faailoa e le ua molia i Leoleo lona alofa faamaoni i lona to’alua, ma ua ia salamo fo’i i le mea ua tula’i mai i lo la aiga. O le tausaga e 2011 e pei ona taua e le ua molia i lana fa’amatalaga i Leoleo na tuu faatasia ai le la aiga i le Faaipoipoga, ma ua to’alima o la alo.

 

I le 5 tausaga talu ai, e tele faafitauli na lu’itauina ai lo la aiga, aemaise lava i lo la va faaleulugali’i ma lona to’alua, ona o le tele o taimi sa ia masalomia ai lona to’alua, e le o faamaoni i lo la va. Sa ia masalosalo o lo o faia se faanunumi a lona to’alua ma lona uncle, o lona Pule i le Fale Faigaluega, atoa ai ma nisi o tamaloloa.

 

Na taua e le ua molia e fa’apea, e i ai taimi na te siakiina ai le itutinosa o lona to’alua ma ia faamaonia ai ona masalosaloga. E i ai taimi na te taumafai ai e faaosofia lagona o lona to’alua ia te ia, ma ia vaaia ai le naunau atu o lona to’alua, ona ia iloa lea, e le aafia lona to’alua i nisi tamaloloa. Ae o isi taimi e fiu e taumafai e faaosofia lagona o lona to’alua ae ua le naunau atu ia te ia, ona ia mautinoa lea, sa i ai se tamaloa na momoe ma lona to’alua.

 

Na taua fo’i e le ua molia i leoleo suesue lona faanoanoa i le aiga o lona to’alua, i lo latou sapaia lea o le itu a lona to’alua i soo se taimi e tula’i mai ai se vevesi i lo la va, aemaise lava i le Tina o lona to’alua.

 

Mo se faata’ita’iga e pei ona taua e le ua molia, sa i ai le isi aso na la tauupu ai ma lona to’alua ao i ai le Tina o lona to’alua. Sa faasaga ane le Tina o lona to’alua ma tu’i lona gutu toe po ona foliga. Na faaali fo’i e le ua molia i Leoleo Suesue ata o lana fanau ma ia faailoa i ai, e i ai lona masalosaloga e le o sana fanau moni lea, ona e eseese uma lava foliga o tamaiti, e leai fo’i se isi e soo ia te ia.

 

E tusa ma le 4 vaiaso talu ona nonofo valavala le ulugali’i a le ua molia ma lona to’alua. Na alu le ua molia ua nofo i ona matua i Tafuna, ae nonofo ai pea lona to’alua ma le la fanau i lo latou aiga i Nu’uuli.

 

I le aso Lulu, Mati 28 i le 6:00 i le afiafi, na alu ai i Nu’uuli na valaaulia lona to’alua ma lana fanau latou te fai’aiga i le Carl’s Jr. Pe tusa o le itula e 9:00 i le po, na toe momoli ai loa e lona to’alua o ia i lo latou fale i Tafuna. O le po lava fo’i lea sa la fesoota’i ai ma lona to’alua i le telefoni, peita’i e fai lava ma tape atu e lona to’alua le telefoni, o iina na oso ai loa ona masalosaloga, e i ai le tamaloa o loo i ai ma lona to’alua i le fale.

 

E le i lelei sana moe i lea po, na oo lava i le itula e 3:00 i le vaveao o lo o mamafa pea lava i lona mafaufau lona to’alua, ma tonu ai loa i lona mafaufau, o le a alu e fasioti lona to’alua ona pule ai loa lea i lona ola. Sa ia tapena lana samala ma se afi tusi ma tuu i totonu o lana ato, ona vili lea o le Taxi ma alu ai loa i Nuuuli i le aso o le aso Tofi, Mati 19 pe tusa o le itula e 6:00.

 

Na ia taunuu i le fale ma ia vaaia ai lona to’alua o loo moe mai i le nofoa i le potu malolo, ma ona lavalava e folig mai ua alu le po o feusua’i ma se isi tamaloa. Sa ia lagonaina fo’i le manogi i totonu o le potu e atagia mai ai ua alu le po o faia feusuaiga.

 

Ina ua iloa mai o ia e lona to’alua, sa lei talanoa mai ia te ia, ae sa tu i luga ma savali i totonu o le potu. Sa ia mulimuli atu i tua o lona to’alua i totonu o le potu, ma ia tootuli ai loa ma faatoese i ai, ma talosaga i ai mo se isi avanoa mo ia e toe fo’i atu ai i lo la aiga. Peita’i na tu’i e lona to’alua lona gutu ma po ona foliga.

 

E le i toe faatali loa le ua molia i le taimi lea, ae na ia tago atu loa i le samala o loo i totonu o lana ato na alu atu maia sa ta ai loa le ulu o lona to’alua ma palasi ai i lalo. Sa ia toe ta ma toe ta le ulu o lona to’alua ao taatia i luga o le foloa o le fale.

 

O le taimi fo’i lea na tatala atu ai e le tuagane laititi a lona to’alua le faitoto’a, o lea na ia togiina ai loa le alii lea i le samala.

 

Na ia savali i tua i le umukuka ma aumai le tane kesi ma le faamoemoe o le a susunu ai le fale. A o lei susunuina le fale, na ia sii i luga le tane kesi ma toe sasa ai le ulu o lona to’alua, faatoa ia tatala ai le tane kesi ae tutu loa le afi ina ia mu ai le fale. A o amata ona mu le potu, na tago le ua molia ua sii ai le ulu o lona to’alua ma faalagolago i lona vae ma tagi ai i luga, ona e le i manatu o se mea lea e tupu i lo la aiga.