Pago Pago - AMERIKA SAMOA

E tusa ai ma faamaumauga a le malo, e to’alua ni alii e 20 ma le 22 tausaga le matutua ua molia nei, ina ua fa’atuina e leoleo le la ta’avale i luga o le auala i le aso 18 o Iulai 2024, ae solomuli mai le la ta’avale ma so’a le ta’avale a leoleo.

O lenei fa’alavelave sa tupu i le po o le aso 18 o Iulai, i Iliili, ina ua va’aia e leoleo ia se ta’avale o sosolo atu ma tu i tafatafa o le fale’aiga a Ma.

Ina ua fa’atuina le ta’avale e leoleo, na fa’asolomuli mai e le aveta’avale ia le taavale ma taia ai le ta’avale a leoleo.

Ina ua o su’esu’eina e leoleo ia le aveta’avale mo lana laisene aveta’avale, sa va’aia se apa pia i lalo o le nofoa o le itu a le pasese. Sa faamaonia e alii e to’alua ia ua molia, o Pea Taimasa ma Ropati Simiti, o apa ia a la’ua.

Na faapea loa ona lokaina mai nei alii ma aveina atu i le ofisa a leoleo i Tafuna mo le fa’aauauina o su’esu’ega.

O iina i le ofisa a leoleo na fa’amaonia ai tausaga o le soifua a Ropati Simiti, e i lalo ifo ma le 21, o le tausaga lea e mafai ai i le tulafono, ona tagofia e fanau talavou ia ‘ava malolosi.

O moliaga a Ropati Simati, e aofia ai;

Faitauga 1:  Tagofia o se ‘ava malosi – o se vaega ‘B’ o solitulafono mama, e mafai ona nofosala ai i masina e ono, po o se sala tupe e $500; po o faasalaga uma e lua.

Faitauga 2:  Taumafaina o ‘ava malosi i nofoaga fa’asa (totonu o le taavale i luga o le alatele) – o se vaega ‘B’ i solitulafono mama, e mafai ona nofosala ai i le ono masina po o se sala tupe e $500; po o faasalaga uma e lua.

E $300 le vaegatupe sa fa’atulagaina e mafai ona tatalaina ai o ia i tua, e faatali ai lona faamasinoga.

E tasi le moliaga a Pea Timasa, o le taumafaina o se ‘ava malosi i nofoaga faasa (totonu o le taavale i luga o le alatele) – o se vaega ‘B’ i solitulafono mama, e mafai ona nofosala ai i le falepuipui, i le ono masina po o se sala tupe e $500; po o faasalaga uma e lua.

E $200 le vaegatupe sa faatulagaina e mafai ona tatalaina ai o ia i tua, e faatali ai lona faamasinoga.