Pago Pago - AMERIKA SAMOA

E to’afa ni tagata ua molia ona o se fa’alavelave sa tula’i mai i le po o le aso 11 o Setema, e tusa ai ma fa’amaumauga a le malo, lea e aofia ai Noah Ah Far, e 36 tausaga le matua, o Atafa Auau e 21 tausaga le matua, o Onomei Siaki, e 18 tausaga le matua ma le tina ia Kauni Siaki e 45 tausaga le matua.

O lo’o ua ta’ua foi i fa’amaumauga a le malo e faapea, na valaau atu ai se tina i le Ofisa a Leoleo i Tafuna, ina ua fa’ao’olima ia Ah Far, i sona ‘nephew’ e 13 tausaga le matua.

Ma o le mafua’aga lea na alu ai Auau (o le uso a le tamaititi 13 tausaga na a’afia), i le fale a Ah Far ma lu’iina i se fusuaga.

Na fa’ate’ia ia tagata o le aiga a Ah Far i le alu atu o Auau ma sa o latou taumafai, faatasi ai ma o latou tuaoi, e fa’ato’ato’a ia Auau.

Ae peitai, ina ua le mafai ona fa’ato’ato’a ia Auau, na i’u ina u’una’i o ia e  Onomei ma amata ai loa le la fusuaga.

Ma ina ua mafai ona toe taofiofi e aiga ma tuaoi ia le fusuaga a Auau ma Onomei, sa oso atu le tina ia Kauni ma amata se la taugaupu ma Kristen Isaako, lea na valaau i le ofisa a leoleo, ona ua fiu Kauni e tuli ese mai i le fanua a Ah Far.

O lo’o ua ta’ua i totonu o faamaumauga a leoleo, le to’atama’i o Kauni ma ia lafoina ai ni faamatalaga ia Kristen, e aofia ai le po ma le titina o ia (Kristen).  Ma sa faapea foi ona lafoina e Kauni ma lona alo o Onomei ia ni faamatalaga tau fa’amatau i seisi alii.  

Ina ua taunu’u leoleo i le nofoaga na tupu ai le faalavelave, sa molimauina le tu’ua e le toatele o tagata ia le misa sa tupu.  Ae na faasino ifo e le tina ia Kristen ia i latou e to’atolu sa masalomia i lenei faalavelave, ma ave faapagotina ai i latou e leoleo.

O le po lava lea na fa’atalanoaina ai e leoleo i le latou ofisa i Tafuna, ia le tina o le tamaititi 13 tausaga lea na amata uma mai ai lenei faalavelave.  Ma sa ta’ua e le tina le fa’ailoaina atu e lana tamaititi 13 tausaga, le po ina o ia, e lona ‘uncle’, o Marcus ia po o Noah Ah-Far.

Sa ta’ua foi e le tina lona faamatalaina o le mea sa tupu i lona alo, o Atafa Auau, ona o latou o ai loa lea i le fale o Ah Far, lea na lu’i ai e Auau ia Ah-Far, i se fusuaga.

Ina ua fesiligia e leoleo ia le tamaititi e 13 tausaga, sa ia ta’ua le po ina ma le palauvale atu o Ah-Far, ia te ia, i luma o se fale faatali pasi i tafatafa o le latou fale.

I le faatalanoaga o Ah-Far, sa ia ta’ua ai le lafoina atu e Onomei ma lona tina ni upu taufa’atama’u ia te ia, ae peitai, e na te le i va’ai i le faalavelave na tupu.

Sa faamatalaina foi e Kristen ma seisi molimau ia le alu atu o Auau ia Ah-Far ma fesiligia o ia pe fia fusu, ae tali mai Ah-Far, e leai.  Ma sa ta’ua foi e Kristen le oso mai o Onomei ia Auau ma o la fufusu ai loa.  Ae sa faamatalaina e le molimau, lo la taumafai ma lona to’alua e vaovao le fusuaga a Onomei ma Auau, ae o le taimi lena, o lo’o ‘e’e atu ai le to’alua a Onomei ia te ia, ma taumafai e fa’afefe o ia.

I se faamatalaga a seisi foi molimau, sa ia ta’ua ai le fesiligia o lana tama pe na vaai o po e Ah-Far ia le tamaititi 13 tausaga, ae na fai mai lona alo, e leai.  Ae peitai, na alu atu ia Auau ma lu’i Ah-Far e la te fufusu.  Ae peitai, na oso mai Onomei ma fufusu ma Auau.

Na faamatalaina foi e le molimau lona va’aia o le ‘e’e ma le lafoina e Kauni o ni upu taufa’amata’u ia Kristen, ina ua faatonu e se alii ia Onomei e alu ese loa.  O iina na liliu mai ai Onomei i le lu’i le alii lea sa faatonuina o ia.

Sa iai foi seisi molimau na faamatalaina ia le o atu o atu o Auau, lona uso ma lona tina i le fale o Ah-Far ma suesueina o ia (Ah-Far), pe sa o’o lona lima i le alii 13 tausaga.  

Ae peitai, sa to’atama’i ia Ah-Far ma ‘e’e mai i le auuso.  Ma sa taumafai ia le uso a Atafa e faato’ato’a ia Atafa, ae peitai, na i’u lava ina fufusu ma Onomei.

Sa ta’ua foi e le molimau lona fa’alogoina o lafoina e Kauni ia ni upu taufa’amata’u ia Kristen.

O le po lava lea na su’esu’eina ai e leoleo ia Ah-Far, ae peitai, na fa’ailoa mai e Ah-Far i leoleo, e le’i o’o lona lima i le alii 13 tausaga, sa na’o ona ia palauvale iai.

Ae i le molimau a Auau ina ua su’esu’eina o ia e leoleo, sa ia faamatalaina ai lona manava atu mai galuega i lea afiafi ae ona fa’alogo i faamatalaga i le po ina e Ah-Far o lona uso laititi.

O le mafua’aga lea na le fiafia ai ma alu ai i le fale a Ah-Far, ae oso mai Onomei ma tulei o ia ma amata ai lona ona o la fufusu.

Ina ua taumafai leoleo e su’esu’eina ia Onomei, sa ia tete’e i le taliina o ni fesili e tusa ai ma lenei mataupu.

Ae i le molimau a Kauni, sa ia faamatalaina ai lona taumafai e vaovao le fusuaga a Auau ma Onomei ae na le fiafia ia Kristen ona o lona ‘e’e atu ia te ia (Kauni) ma lana fanau.  O le mafua’aga lea na ia ‘e’e mai ai ia Kristen ma lafo mai iai ni faamatalaga taufa’amata’u.

Sa molia ai loa Noah Ah-Far i le Fa’ao’olima i lona tulaga e tolu, o se vaega ‘C’ o soligatulafono mama, e mafai ona nofosala ai i le falepuipui i le o’o atu i aso e 15, po o se sala tupe e $300; po o faasalaga uma e lua.

E $300 na fa’atulagaina e mafai ona tatalaina ai Ah-Far mai i le falepuipui, e faatali ai lona faamasinoga.

O Atafa Auau, Onomei Siaki ma Kauni Siaki, sa molia uma i le Faitauga e tasi, o le Faatupu Vevesi i nofoaga faitele, o se vaega ‘B’ o soligatulafono mama, e mafai ona nofosala ai i le falepuipui, i le o’o atu i masina e ono, po o se sala tupe e $500; po o faasalaga uma e lua.

Ae e le o aofia i totonu o fa’amaumauga ia se vaegatupe faatulagaina e mafai ona tatalaina ai i latou, e faatalitali ai o latou faamasinoga.