Pago Pago - AMERIKA SAMOA

O le po o Setema 27, 2024, na taunu’u ai se valaau i le Ofisa a Leoleo i Tafuna, ona o se alii ua nofo ma fa’afefe se tamaititi e 12 tausaga i se aga’ese.

(O le a le lomia suafa o i latou na a’afia po o le ua molia, ona o le puipuiga o le alii talavou sa a’afia.)

E tusa ai ma faamaumauga a le malo, sa ta’ua e le na valaau mai i le ofisa a leoleo, le sasaina i lalo e le ua molia, o ni fa’i i autafa o le auala.

Ma ina ua agai atu leoleo i le nofoaga na tupu ai le faalavelave i lea afiafi, sa o latou fetaui ma ni alii talavou se to’atolu ma o latou faasino iai se fale na tamo’e agai iai le ua molia, i tafatafa o se malumalu EFKAS.

Na taunu’u leoleo i le fale ma va’aia ai le ua molia o tu mai luma, ae ina ua latalata atu leoleo, na sola ese ai le ua molia agai i tua o nu’u.  O lea sa ta’amilo solo ai taavale a leoleo e saili le ua molia, ae valaau mai se tasi o aiga i leoleo mo se fesoasoani.

Ina ua taunuu atu leoleo, o lo’o taofiofi mai e se alii ia le ua molia.  Na avefaapagotaina ai loa e leoleo ia le ua molia.  Ma sa fa’alogoina e leoleo le manogi fa’asuaava o le ua molia.  Na ripotia foi e leoleo le palauvale solo o le ua molia, ina o tu’uina atu o ia i totonu o le taavale.

Na faatalanoaina e leoleo ia le alii 12 tausaga ma sa ia faamatalaina lona savali mai i le auala galue e agai atu i le latou fale, ae oso atu le ua molia ma lana agaese, ma taumafai e sasa ai o ia.  Ae na ta’ua e le alii talavou lona tamo’e agai i le latou fale ae o lo’o tuliloa atu o ia e le ua molia.  Ma na ia (alii 12 tausaga) valaau atu i le latou aiga mo se fesoasoani, ma na oso mai i fafo sona tuafafine ma toso atu o ia i totonu o le fale.

Sa ta’ua foi e le alii talavou ia le tu tu o le ua molia, i fafo o le latou faamalama ma faasino atu le agaese ia latou ma fesiligia i latou po o le a le mea latou te mananao ai.  

I le faamatalaga a le tuafafine a le alii talavou, sa ia faalogoina se tagata o tamo’e atu agai i le latou fale ma ia va’aia le tuliloaina atu o lona tuagane laititi e le ua molia, ma se agaese.  O le mea lea na sau ai i fafo e faatonu le ua molia, e alu ese ae avatu i totonu o le fale ia le alii 12 tausaga.

Ae peitai, sa tu i fafo le ua molia ma fa’alala atu le agaese ia i latou ma fesiligia i latou po o le a le mea e mananao ai.  Ae ina ua o latou va’aia ia le pasi atu o le taavale a leoleo, na o latou valaau atu iai mo se fesoasoani.

I le faamatalaga a le alii lea na taofiofia le ua molia, a’o savali mai i totonu o le togavao, na fa’ate’ia o ia ina ua sasau atu e le ua molia ia le agaese ma mau i le la’au sa i ona autafa.  Ona toe tamo’e ese atu lea o le ua molia ae ua tago i le togi ese le agaese.

Ma o lea na ia tuliloaina ai le ua molia ma taofiofi o ia, e faatali ai le taunu’u atu a leoleo.

O moliaga ua tu’ua’ia ai le ua molia, e aofia ai;

Faitauga 1:  Faatupu Vevesi i nofoaga faitele, o se vaega ‘C’ o solitulafono mama, e mafai ona lokaina ai le ua molia, i le o’o atu i aso e sefululima, po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu; o se vaega ‘A’ o solitulafono mama, e mafai ona nofosala ai i le tausaga atoa, po o se sala tupe e $1,000; po o faasalaga uma e lua;

Faitauga 3:  Fa’ao’olima i lona tulaga e tolu, o se vaega ‘C’ o soligatulafono mama, e mafai ona nofosala ai i le falepuipui i le o’o atu i aso e sefululima, po o se sala tupe e $300; po o faasalaga uma e lua.

E $50,000 se vaega tupe na faatulagaina e mafai ona tatalaina ai le ua molia mai i le falepuipui, e faatalitali ai lona faamasinoga.