Pago Pago - AMERIKA SAMOA

O le aso 10 o Oketopa, na valaau mai ai se alii i le Ofisa a Leoleo I Tafuna, e ripotia mai ai le faatupu vevesi o le atalii a le latou tuaoi i lo latou vai’a’ai.

E ui ina sa sola le ua molia ae peitai na mafai ona toe pu’eina o ia ma molia ai i moliaga, na aofia ai;

Faitauga 1:  Faatupu Vevesi i nofoaga faitele, o se vaega ‘B’ o solitulafono mama, po o se sala tupe e $500; po o faasalaga uma e lua.

Faitauga 2:  Solivale o fanua e aunoa ma se faatagana, o se vaega ‘B’ o solitulafono mama, e mafai ona nofosala ai I masina e ono po o se sala tupe e $500; po o faasalaga uma e lua.

Faitauga 3:  Faao’olima I lona tulaga e tolu.  O se vaega ‘C’ I solitulafono mama, e ono faafalepuipui ai i aso e sefululima, po o le sala tupe e $300, po o faasalaga uma e lua.

E $3000 sa faatulagaina e mafai ona tatalaina ai le ua molia, e faatalitali ai lona faamasinoga.

E tusa ai ma faamaumauga a le malo, o le taeao o le aso 10 o Oketopa, na faafesootai atu ai e se alii ia le Ofisa a Leoleo, ona ua manaomia se fesoasoani, ona o le atalii a lo latou tuaoi, e 23 tausaga le matua, o lo’o faatupu vevesi ma palauvale solo.

Na ripotia ai foi le fealuai o le ua molia, ma se agaese.

Ma sa ta’ua foi e faapea, e le o se taimi muamua lea ua faia ai e le ua molia ia lea tulaga.

Ina ua taunuu leoleo I lea taeao, na faasino ifo iai e le alii na valaau mai i le Ofisa a Leoleo, ia le fale o le ua molia.

Ae peitai, na faailoa ifo iai i leoleo, ua sola ese le ua molia, mai lo latou fale.

Sa faamatalaina e le alii na valaau mai i le Ofisa a Leoleo, i sui malu o le malo, e faapea, sa iai o ia i lo latou fale, ina ua faalogo mai i le sauniga a le susuga ia Raymond Puni, lea ua molia.

Sa ia ta’ua le savali o le ua molia, agai i lo latou fale, ma laulauvavale solo.  Ae le’i umi, ae ona ia vaaia se tamaloa ma se tamaititi o taumulimuli mai I tua o Puni.

Sa ia ta’ua le valaau mai o le tamaloa I le ua molia, pe aisea e le mafaufau ai I luma o le latou  fale.

Ae tali mai le ua molia ma tau’ai mai le tamaloa, i ma’a.

Sa ta’ua e le alii na valaau i leoleo, lona agai atu i le fale a le ua molia, ma ia molimauina o le tau vaovao mai e le tua’a o le ua molia, ia le tamaloa ma lona atalii.

Ina ua faatalanoaina e leoleo ia le tua’a o le ua molia, sa ia faamatalaina lona iloa mai o le misa a lona atalii ma se tamaloa, I fafo o le latou fale, ma e o’o mai iai, ua amata ona fai le tau’aiga ma’a a le toalua lea.

I le molimau a le tina a le ua molia, sa ia molimauina se tauga pelu a lona atalii (le ua molia) ma se tamaloa faapea ma le la tau’aiga ma’a.

Na talosagaina e leoleo ia matua o le ua molia ina faafesootai atu le latou Ofisa pe a toe fo’i atu le ua molia.

I se taimi mulimuli ane o lea lava aso, na faatu ai e le tamaloa na pisa ma le ua molia, ia le taavale a leoleo, I luma o se faleoloa.

Ma ia faamatalaina i leoleo lona lagonaina mai o le palauvale solo o Puni i luga o lona fanua, a’o momoe lona aiga.

Na ta’ua e lenei alii le lu’iina o ia e Puni e la te fufusu ae sa musu ma ia faatonuina Puni e alu i le latou fale.

Sa ia ta’ua foi le u’uina e le ua molia o se agaese lea na ia tago togi i lalo ma savali ese ma palauvale.

Ma o lea na ia pikiina ai o le agaese ma ia mulimuli atu i le ua molia, faatasi ma so a atalii 13 tausaga, se’ia o latou taunuu i le fale o le ua molia, ona ia tago lea, i le tuu le naifi i lalo ae tau’ai mai o ia e le ua molia, i ma’a.

O le aoauli o le aso na tupu ai le faalavelave, sa toe logo mai ai e le tua’a o le ua molia, ia le Ofisa a Leoleo i Tafuna, o la ua i le fale lona atalii.

Sa agai atu loa iai leoleo ma lokaina mai o ia.