Pago Pago - AMERIKA SAMOA

O le aoauli o le aso 10 o Oketopa, na faafesootai ai e se tina matua ia le Ofisa a Leoleo i Fagatogo, mo se fesoasoani ona o sona tuagane faaletulafono, ua ia nofo ma faafefe o ia i se su o.

E tusa ai ma faamaumauga a le malo, na tu’ua’ia e le tina matua ia le susuga ia Siafolau Leiato ia le faafefeina o ia i le fasi i se su o.

Ina ua taunuu leoleo i le nofoaga na tupu ai le faalavelave, sa feiloai ai ma le tina matua lea na valaau mai i le Ofisa a Leoleo.

Ma sa ia faasinoina i leoleo ia lona togalaau sa faaleagaina e le ua molia ma sa ia faailoa atu foi i leoleo, le molimauina o le mea sa tupu, e sona alo (grandson).

Sa faapea loa ona aveina e leoleo ia le tina matua ma lona all i le Ofisa a leoleo i Fagatogo mo le faaauauina o a latou suesuega.

E tusa ai ma le molimau tusia a le tina matua, a’o ia fesoasoani i nai ona alo laiti e fai a latou meaaoga, sa ia faalogoina se pa’o mai fafo, ma ia vaaia ai le ua molia.

Na ta’ua e le tina matua lona savali mai fafo ma fesiligia le ua molia, pe aisea ua iai se pu i luma o le fale, ae tago le ua molia, i le toe faatumu i palapala.

Sa faamatala atili e le tina matua, lona toe fo’i i totonu o le fale ma loka faitotoa o le fale ma fa’aaauau ona fai meaaoga ma sona alo.

Ae ona vaai mai ua faaleagaina e leoleo ua molia, o lana toga laau ma sa savali atu ia te ia ma se su o ma faafefeina ai o ia.

Na ta’ua e le tina matua lona tagi i lona fefe ona e le gata i upu taufaamata’u a le ua molia, ae faapea ma ana gaioiga.

I le molimau tusia ale alo o le tina matua (grandson), sa ia lagonaina le taugaupu a lona tina matua ma le ua molia, ae o lona fefe, sa ia nofo ai i totonu o le potu.

Ma na ia ta’ua foi le tase’iina e leoleo ua molia, o la’au a lona tina matua.  Ma le faafefeina e le ua molia ia lona tina matua i le faaoolima iai i se su o.

Ina ua aveina e leoleo ia le ua molia, sa tete’e e faia se faamatalaga ma na ia tapa foi mo sana loia.

O moliaga ua tuuaia ai le ua molia, e aofia ai;

Faitauga 1:  Faaoolima i lona tulaga e lua, o se vaega ‘D’ o solitulafono mamafa, e mafai ona loka ai i le Lima tausaga, po o se sala tupe e o’o atu i le $5,000; po o faasalaga uma e lua.

Faitauga 2:  Faatupu vevesi i totonu o aiga (sauaga i totonu o aiga), o se vaega ‘C’ o solitulafono mama, e mafai ona nofosala ai i aso e sefululima, po o se sala tupe i le Va o le $150 ma le $300; po o faasalaga Uma e lua.

E $5000 le vaega tupe sa faatulagaina e mafai ai ona tatalaina le ua molia, e faatalitali ai lona faamasinoga.