Pago Pago - AMERIKA SAMOA

O le aso 9 o Oketopa na valaau ai se tina i le Ofisa a Leoleo ona o se faafitauli na tulai mai i lo la va ma lona toalua.

E tusa ai ma faamaumauga a le malo, o le afiafi o le aso 9 o Oketopa, na valaau ai se tina i le Ofisa a Leoleo e ripotia ai le taumafai o lona toalua, e fasi o ia ma faaleagaina a latou meafale.

Ina ua taunuu leoleo i le nofoaga na tupu ai le faalavelave, sa molimauina e leoleo se alii o savali mai totonu o le fale ma lona lavalava.

Na fesiligia e leoleo le alii, o Noa Fifita po o fea a faatopetope ai, ae tali le alii, o ia lea o le a tia’i lona toalua ona o le paie.  Sa faamatalaina e Fifita o ia faato’a manava mai galuega ae e leai se meaai na kukaina.

Sa faamatalaina foi e le ua molia, ua lelava i pepelo a lona toalua ma o lo’o ia iloa, e le o faamaoni lona toalua i lo la va faaleulugalii.

A’o faatalatalanoa e leoleo ia le ua molia, na savali atu le tina o le fafine ma talosagaina leoleo e aveese atu le ua molia, ona o le faatupu misa so’o i le latou aiga.

Sa tu’ueseeseina e leoleo ia Fifita ma le tina a lona toalua.

Ma Ina ua fesiligia e leoleo ia le tina o le toalua a Fifita po o fea lona all, sa faasino ifo iai le fale o lo’o i leisi itu auala.

Sa ta’ua e le tina a le to’alua a Fifita, o taimi una e manava mai ai le ua molia, e sau lava pisa ma palauvale atu ia te ia ma lana tama (to’alua a le ua molia).

Ma na ta’ua e le loomatua, e na te le iloa pe aisea e ita able ua molia, i aso uma ma faaleaga meafale.

Na faamatala e le tina o le toalua a le ua molia, le tupu o se faafitauli i le va a le ua molia ma lana tama i lena taeao, ma ua fai so’o.

Ua masalosalo le tina a le toalua o le ua molia, atonu ua tagofia e leoleo ua molia ia fualaau faasaina, fua i le faapea.

Ina ua faatalanoaina e leoleo le toalua a le ua molia, sa ia ta’ua foi le tulaga e tasi e uiga i lona toalua, o le faamosa i aso uma, ona o le leai o se meaai, po o le tu’ua’ia o ia i le le faamaoni i lo la va.

Sa ta’ua e le toalua a Fifita, e manava mai lava le tamaloa i le ‘e’e ma le palauvale atu i tagata o le latou aiga, e aofia ai ma si ona tina.

Sa faamatalaina e le toalua a le ua molia, ia lona fefe tele i uiga faaalia a le tamaloa. Ma o le mafuaaga lea na sulufai ai i le fale a lona tuaoi ma valaau ai leoleo.

A’o faatalanoaina e leoleo ia le toalua a le ua molia ma lona tina, na valaau mai le ua molia, e soia le pepelo ae le’i sau a po o la mata.

Sa lokaina e leoleo Fifita ma aveina atu o ia i le Ofisa a Leoleo ma o iina na ia faamatala ai i sui malu o le Malo, e na o ia e galue i totonu o le latou aiga.  Ae e manava mai lava, e leai se meaai.  Ae a fai atu i lona toalua i se mea e fai, e faaali mai uiga o lona toalua ia te ia.

Ma o taimi e pisa ai la’ua ma lona toalua, e oso atu le tina o lona toalua i le ‘au.

Ua molia nei Fifita i moliaga e aofia ai;

Faitauga 1:  Faatupu Vevesi i totonu o le aiga (sauaga i totonu o le aiga); o se vaega ‘C’ o solitulafono mama, e mafai ona nofosala ai i le falepuipui mo aso e sefululima, po o se sala tupe e $300; po o faasalaga uma e lua.

Faitauga 2:  Faaoolima i lona tulaga e tolu.

E $1,000 le tupe faatulagaina e mafai ona tatalaina ai le ua molia, e faatalitali ai lona faamasinoga.