Pago Pago - AMERIKA SAMOA

E tusa ai ma faamaumauga a le malo, o le afiafi o le aso 8 o Iulai, 2024, na maua ai e le Ofisa o Leoleo i Tafuna se valaau mo se fesoasoani, ona o se fa’alavelave tau taavale i Pavaiai, lea na manu’a ai se tama matua e 72 tausaga.

Ina ua taunu’u leoleo i Pavaiai, sa vaaia ai se taavale e leai se aveta’avale ae o lo’o emoemo ana moli, i luma o le fale a Haleck’s.  Na fa’ailoa ifo e se alii i leoleo, ua malaga le aveta’avale ma le tama matua na lavea, i le falemai, i seisi taavale.

I su’esu’ega a leoleo, sa ta’ua ai le agai atu o le taavale a le ua molia, le susuga ia Tuiai Leota, i le itu i Sasa’e o le motu, ae ona so’aina ai se tama matua e 72 tausaga, na taumafai e kolosi le alatele, i Pavaiai.  Na ta’ua foi le timu o le afiafi na tupu ai le faalavelave.

Na ta’ua e le ua molia, o ia e leaga lana va’ai i se tasi o ona mata ma sa le’i manino lana va’aai i lea afiafi.  Ae ina ua taunu’u atu lana ta’avale i le pi’oga i luma o le pamu kesi i Pavaiai, sa amata ona fa’alemu le alu o lana taavale, ae peitai, sa tuai ona taofi lana taavale ma so’aina ai loa le tama matua.

Sa ta’ua foi e Leota, na fa’atafa i tua lana taavale ma ia alu atu e fesoasoani i le tama matua na lavea i lana taavale ma sa ia valaau atu i lona tausoga e sau e la te sa’esa’eina le tama matua i le taavale a lona tausoga.

Ona o la o lea ma lona tausoga e fa’afetaui le taavale a le EMS, lea sa o latou fetaui i Nu’uuli.  Ina ua ave e le EMS ia le tama matua ma fa’aauauina atu i le falemai i Faga’alu, sa ta’ua e le ua molia, na ia toe fo’i mai i Pavaiai i le nofoaga na tupu ai le faalavelave.

Ua molia nei Leota i le moliaga e tasi o le Aveta’avale le Fa’aeteete – o se vaega ‘B’ I solitulafono mama ma e mafai ona nofosala ai i le o’o atu i masina e ono (6), po o se sala tupe e $500; po o fa’asalaga uma e lua.

O lo’o ta’ua foi i faamaumauga a le malo, e ui ina sa tulaga lelei mea uma i le siakiina o le tama matua i le falemai, ae peitai, sa ia ta’ua le tiga o lona tino mai i le taimi na taia ai i le ta’avale.