Pago Pago - AMERIKA SAMOA

O le po o Setema 29, 2024, na fa’afeso’ota’i ai e se tina ia le Ofisa a Leoleo i Tafuna ma ripotia ai le sauaina o ia ma si ana tama teine e fitu tausaga le matua.

(O le a le lomia e Le Lali ia suafa o i latou ua a’afia i lenei mataupu po o le ua molia, aua le puipuiga o fanau iti.)

E taunu’u atu leoleo i le nofoaga na tupu ai le faalavelave, ua leai se tamaloa ua sola.  Ma o lea na aumaia ai e leoleo ia le tina ma nai ona alo i le ofisa a leoleo, mo le fa’aauauina o a latou suesuega.

Sa faapea foi ona valaauina e leoleo ia le vaega a le EMS aua le togafitia o manu’a o le tina na a’afia.

I sana faamatalaga tusia ma faaleoina, sa ta’ua ai e le tina le amata mai o le la misa ma lona to’alua i le po o Setema 28, ina ua manava mai le tina mai i lana galuega, i le 3:00 i le vaveao, ae o la lava e le’i fo’i atu lona to’alua na alu e fesoasoani i lona tuafafine.

O le taeao na soso’o ai na fesiligia ai e le tamaloa ia le fafine e uiga i meaai sa i totonu o le fale ma tu’ua’ia o ia (tina) i lona le faamaoni i le la ulugalii.  Ona tu’i lea e le ua molia ia le tina i lona mata taumatau ma tua o lona ulu, ina ua tali atu le tina, e le moni tu’ua’iga a lona toalua.

Ae o le oso atu o le tuafafine a lona toalua, na mafai ai ona sola ‘ese le tina na a’afia ma valaau ai loa i leoleo.

Sa taumafai leoleo e saili le ua molia, ae peitai, e le’i mauaina o ia.  Ae na maua e leoleo se faamatalaga e faapea, na fa’aaoga e le ua molia ia se telefoni a se tagata, e valaau ai le tina na a’afia ma fa’afefeina o ia, e na te fasiotia lona atalii ona pule lea i lona ola.  O le telefoni lava lea e tasi, na ia valaauina ai se taxi, lea na aveina ai i la’ua ma lona atalii i le fale o lona tuafafine.

Na faapea ona agai atu ai loa leoleo i le fale o le tuafafine a le ua molia ma maua ai o ia i totonu o le potumoe a lona tuafafine.

Sa faapea ona ave faapagotaina le ua molia e leoleo, ae toe fa’afo’i le atalii e 2 tausaga, i lona tina.

I le faamatalaga a le ua molia, sa ia fa’amaonia lona tu’ua’ia o le le faamaoni o le tina na a’afia, i lo la va fa’aleulugalii.  Ae o le tali leotele atu o le tina i le matitiva o lona aiga na mafua ai ona ia fa’ao’olima i le tina, ma afaina ai ona fofoga.

O tu’uaiga o le ua molia, e aofia ai le Fa’ao’olima i lona tulaga e tolu (sauaga i totonu o le aiga), o se vaega ‘A’ o solitulafono mama, e mafai ona faasala ai i le falepuipui i le tausaga atoa, po o se sala tupe e $1,000 po o faasalaga uma e lua.

E $20,000 na faatulagaina e mafai ona tatalaina ai le ua molia mai i le falepuipui, e faatalitali ai lona faamasinoga.