VAEGA 133

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 134.

*********************************************

Ua mae’a le ti o le taeao a le aiga o le tamaloa o Alesana ma lona to’alua o Eseta faapea le la fanau o Ruta, Iakopo ma Naomi ma le alii fomai o Taki.

Ua ta’ape uma le tamaloa o Alesana ma lana fanau male alii fomai e sauni mo fuafuaga o le aso, ae ua savali atu le fafine o Eseta ma amata ona tapena ipu o le tatou malu taeao ma faamama le latou umukuka.

Ina o savali atu le teine o Naomi i lona potu, na fa’ate’ia i le tosoina mai o loa lima e si ona tuagane o Iakopo ma faapea atu, “Sis, ua uma ma’ua ma Salome.”

Na fai sina umi o pupula to’a atu Naomi i foliga o si ona tuagane ma amata ona maligi ona loimata.

Ua a’apa atu si teine o Naomi ma opo mai lona tuagane ma faapea atu iai, “Fai le mea o lo’o i totonu o lou loto, ae aua e te popole mai fua ia te a’u.  O na mea, ua leva ona pasi.  E le o toe a’afia ai a’u.”

Sa na’o le lulu o le ulu o le tama o Iakopo ma ia fusi mau atu si ona tuafafine.

“Ou te le toe tu’ua lava e tago seisi e toe faatiga ia te oe,” o le folafolaga lea a Iakopo i si ona tuafafine.

Ua savali atu loa Naomi ma sauni mo le galuega ae ua sauni Iakopo e o ma lona tuafafine o Ruta e su’e le molimau lea e manaomia i le mataupu a lona tama.

“Naomi, a ua mae’a ona e sauni ona e sau lea ta te o e momoli muamua oe ona ou sau ai lea matou o atu ma Ruta ma Iakopo,” o le valaau mai lea a le alii fomai o Taki.

“Alu oe e avea Naomi ae lea la’a ma o atu ma Iakopo,” o le valaau mai a Ruta.  

“Ia ua lelei, ae afai e iai se mea e manaomia, ona vave logo atu lea o a’u,” o le toe faapea mai lea o le alii fomai.

Ua feosofi Taki ma Naomi i le ta’avale ae faapea atu Naomi ia Taki, “Aisea ua e le toe sau ai e te toe galue i le falemai? O lo’o manaomia oe i le falemai.”

[E FAIA PEA]