O OE O LO’U TAMA?
VAEGA 138
Taeao Manuia, Taeao Toto’a i le mamalu o le tatou aufaitau nusipepa i lenei taeao fou. Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.
Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 138.
************************************************************
Ua mae’a le taumafataga a Ruta ma Iona tuagane o Iakopo, ona fa’atopetope atu loa lea i le fale lea na fa’asino ifo iai e le teine faigaluega a le fale aiga, e saili ai le tamaloa o Semi Tagaloa.
Na umi se taimi o tu tu ia Ruta ma Iakopo i totonu o le ofisa o le fale fai taavale lea na faasino ifo iai la’ua, ae savali atu loa se tamaloa, e tali tutusa lava lo la matutua ma le tamaloa o Alesana.
Sa tasi lava le mate a Ruta ma Iakopo, o le tagata lea e suafa ia Semi Tagaloa.
Ua savali mai le tamaloa ma fa’afeiloa’i i la’ua ma fesili mai i le la savali ua mafua ona o’o atu ai i lana pisinisi.
Na faapea atu ia Ruta, “E iai se mea e mafai ona tatou talatalanoa ai?”
Ae tali mai le tamaloa, “O lo’o fai lava sina pisi i lenei aso. Ae lelei lava na fa’ailoa mai le autu o le lua savali.”
Ua toe faapea atu Ruta, “O lo’o ma salia lau susuga. O lau susuga lea o Semi Tagaloa?”
Na fai sina umi o se taimi o tu le tamaloa ua le tali mai. Ona ia faapea mai lea, “O ai oulua ma aisea le mea o lo’o lua saili ai Semi.”
“Oi, e faamalia atu i lau susuga, ae o lo’o iai sina ma mataupu o lo’o ma fia talanoa ai ia Semi, e uiga i si o ma tama,” o le tali mai lea o Iakopo.
“Ia e faamalie atu, e le o iai iinei ia Semi ae afai e leai seisi mea, e lelei ona oulua tu’umuli atu, ona o lo’o fai lava sina pisi i lenei taeao,” o le faamatalaga lea a le tamaloa ma ia savali atu lava agai i le faitotoao ma tu mai ai.
Ua tago atu nei le teine o Ruta ma se’i mai lana fasi pepa lea e lolomi ai lona igoa ma le numera o lana telefoni ma ia faapea atu i le tamaloa. “Faamolemole, ae se’i e taua’aoina atu lava le pepa lea ia Semi, pe ono maua se avanoa e matou te talatalanoa ai.”
Ona savali atu loa lea o Ruta ma Iakopo i le la taavale. Ae ua le gata ina tapuni vave mai e le tamaloa ia le faitoto’a o le ofisa, ae na fai sina umi ona ia tu i le faitoto’a ma tilotilo atu ia Ruta ma lona tuagane o Iakopo.
E oso lelei ia Iakopo i totonu o le taavale ae ia faapea atu ia Ruta, “O Semi le la.”
“Ioe, o Semi le la, ae e le mafai ona o ta fa’amalosia le tamaloa e talanoa mai ia ta’’ua. Se’i o ta faatalitali pe ono alu i se mea,” o le tali mai lea a Ruta.
[E FAIA PEA]