Ads by Google Ads by Google

O OE O LO’U TAMA?


[ata: SN]

VAEGA 25

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i totonu o Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*********************************

Na gata mai le tatou tala ina ua manava mai le tamaitai tausima’i o Naomi ae ua fiu e su’e lona tuagane o Iakopo lea na alu atu e la te o faatasi i le fale.  Sa faatonu a Naomi ia Iakppo e nofo faatali atu i nofoa lea e i le potu pito i luma o le falemai seia mae’a ana galuega ona sau lea la te o faatasi i le fale, ae peitai, na fiu si teine o Naomi e su’e lona tuagane, ua leai seisi.

Ae o le taimi lea, o lo o faia ai taliega ma a’ai ia Iakopo ma le supavaisa a Naomi, le tamaitai o Salome, i le fale’aiga lea o lo o i leisi itu auala o le falemai.  O Salome, sa masani ona fia fa’auo ia Iakopo a’o latou a’o’oga faatasi, ae ona e lua tausaga e matua ai Iakppo ma maualuga ai ana vasega, sa le i amanaia lava e Iakopo ia Salome a’o latou a’o’oga.  Taimi na la e siou solo Iakopo i teine o le a’oga, e le taitai ano i teineiti laiti o le vasega a lona tuafafine o Naomi.

Ae o le mea e malie ai, o lo o iloa lelei e Salome, o le tuagane o si teine o Naomi lea sa fai ma ana mea ula a’o latou laiti.  Ae lilo ia te ia, o Naomi lea o lo o la faigaluega faatasi i le falemai.

Ma ona o le leaga o le faiga e Salome o Naomi i na vaitaimi, sa musu ai lava Salome e fesili ia Iakopo po o fea o iai Naomi.  Ma sa le i fia talanoa foi Iakopo e uiga i lona tuafafine laititi.

Ua malie lava le talanoaga a Iakopo ma Salome na matuai galo nimo ai lava ia Iakopo le taimi.  E toe te’i ifo Iakopo, ua amata ona pogisa le lalolagi ma sa oso i luga ma faapea, “Auoi, ua galo ia te a’u o la sa ou faatai i se tagata i le falemai.”

“Oi, o ai?” o le fesili atu lea a Salome.

“Oi, e leai seisi,” O le tatope mai lea a Iakopo.  “Ae ua tatau na ta o, ua pogisa foi le mea, ua toeititi le toe feoai ni pasi>”

“Sau ta o e momoli oe i le tou fale i la’u ta’avale,” o le augani atu lea a Salome.  “Aua e te vave sola ma a’u.”

Ua a’apa atu Salome ma toso mai le lima o Iakopo ma tata’i atu i le mea o iai lana ta’avale.  Ma la feosofi loa i totonu.

Ina ua o la taunu’u i le mea o iai le fale o le aiga a Iakopo, na faapea atu nei lenei alii ia Salome, “Vaai, tu’u a’u i le fale faatali pasi ou te savali mai ai.  Ta te le lava foi lava ae iloa mai a’u e la’u loomiti, ma lau ta’avale, fia foi lea o ni fesili e su’esu’e ai a’u.”

Ua ata Salome aua o le mea foi lea sa i lona mafaufau, ona o lona musu ina ne’i iloa mai o ia e Naomi.  “Manaia lena.  Ae e te avanoa a taeao?”

“O le a le mea o i lou mafaufau?” o le fesili atu lea a Iakopo.

“A e avanoa, fai se ta lunch.  Ou te mafai na ou alu atu e piki mai oe,” o le tala lea a Salome.

“Oi, manaia foi sin a tonu.  Ae lelei pe a ta fetaui i le faleaiga, ona toe fai ai lea o seisi tonu,” o a Iakopo lea.

Ua faamautu nei le tonu a le to’alua lea, o le a toe fetaui i le aso e soso’o ai, i le faleaiga e fai ai se la lunch.

Ua oso i fafo Iakopo mai le taavale a Salome, ona tu lea ma talotalo atu i le alu ese atu o le ta’avale a le tamaitai tausimai, ae e le i liliu ma savali atu i le latou fale.

E le i taunuu lelei Iakopo i totonu o le faitotoa o le latou fale, ae sasa ai le po a Naomi i lona ulu.

[E FAIA PEA]