O OE O LO’U TAMA?
VAEGA 75
E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa. E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.
Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?
************************************
Sa faagataina mai le tatou Fagogo i le vaiaso ua mavae, ina ua telefoni atu se tuaoi a le ulugalii o Tanielu, ia po o Alesana fo’i, ma Eseta, e uiga i se fafine o lo’o tu i luma o le fale. Ae o le taimi lea o lo’o taumafai le tamaloa o Alesana e fa’ato’ato’a ia le fafine o Eseta, ona o lea ua ta’u iai e Alesana i lona aiga, o ia ua toe fia sui lona igoa, i lona igoa moni, o Alesana Penaia.
Manatua, o le igoa lea o Tanielu, o le igoa lea o le uo mamae a Alesana, lea na maliu i se afi tele i Egelani. Ae e le’i maliu o ia, sa ia augani atu ia Alesana, e tago e fesuia’i o la igoa, ona ua ia iloa, e le toe i’u i se lelei lona gasegase. Ma o le alofa tele o le uo mamae lenei a Alesana ia Alesana, ona o lona fa’asaoina mai o ia mai i le falepuipui, a’o o la talavou, o le mafuaaga lea sa ia fai atu ai ia Alesana e tago e fa’aaoga lona igoa, ina ia aua ai ne’i lokaina o ia i le falepuipui.
Ma o le uo mamae lenei a Alesana, o le tama moni lea a le alii fomai o Taki.
Sa fa’ate’ia le tamaloa o Alesana, e tatala mai le faitoto’a, o lo’o tu atu ai le tina a Taki, le fafine o Elena.
Ua savali mai le fafine o Elena i totonu o le fale ma sa ta’ita’i atu e le tamaloa o Alesana i le potu malolo ma fa’anofo ai, ae ona ia vala’au atu i lona to’alua, le fafine o Eseta, e sau i fafo.
Ua fesili atu Alesana ia Elena, “E aumai sau vai taumafa?”
Ua tali Elena, “E leai, a gasea lava. Ae susu mai e alala mai lalo, se’i fai se tatou tala.”
Ua saofafa’i ane nei le ulugalii o Alesana ma Eseta, ma le popolevale i o la foliga. Ua o la taumafai e mate mai po o le a le mafuaaga o le asiasi atu a Elena.
“Ou te faamalie atu i le solivale mai o lo oulua maota,” o le faapea atu lea a Elena.
“E le afaina. O lea foi e ma te nonofo ma taumate se aso e mafai ona o ma asiasi atu ai foi ia te oe,” o le tali mai lea a Alesana. “Ae o le a se agasala a lenei aiga, ua e sau mamao ai lava?”
Ua tali atu Elena, “Ia ou te iloa, e le toe nanaina le mea ua tupu. O lea ua o’o atu si a’u tama ma fa’ailoa atu le tou talanoaga.”
Ua punou i lalo le ulu o le tamaloa o Alesana ma ia faapea atu, “Elena, faamolemole faamagalo mai lo matou aiga. Faamagalo mai lo’u tagata vaivai.”
Ae faasalavei mai le fafine o Elena, “Alesana, e le o le mea lena na ou sau ai, ina ia e faato’ese mai ia te a’u. O a’u, ua matua’i o’u malamalama lelei i le mafuaaga na fai atu ai faapena Alesana ia te oe. Ae ia e alofa ma faamagalo i si a’u tama vaivai, o Taki. Ona o lona ita ma lona loto tiga o iai i le taimi nei.”
Sa matua’i fa’ate’ia Alesana ma Eseta, i le faamatalaga a le fafine o Elena.
[E FAIA PEA]