VAEGA 104

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 104.

************************************************

Na fai sina umi o nofo le teine o Ruta ma faataupupula atu ia Salome a’o fa’aauau pea ona tootuli ma tagi, ma mafaufau pe talitonu i le fa’ato’esega a Salome pe leai.

Ua soso atu nei ia Ruta ma faapea atu ia Salome, “E pei ona ou fai atu, e le o a’u e tatau ona e faato’ese iai.  Ma ou te le talitonu foi i lau fa’ato’esega lea ua fai mai, ona ana e le iloa lava o le tuagane a Naomi ia Iakopo, e te le lagona se agaga salamo.  E le o se salamo faamaoni la lena mea.”

“E leai  Ruta, ua matua’i o’u lagona lava lo’u salamo faamaoni i la’u mea sa fai.  Na ou iloa lava le leaga ma le sese o la’u mea sa fai ina ua matou fa’au’u ae ona o lo’u pala’ai lava sa le mafai ai ona fai atu sa’u tala ia Naomi,”

Ua tu i luga ia Ruta ma faapea atu ia Salome, “Ia e mafaufau atili i lau mea na sa fai.  Ma ou te le ta’uina lau mea sa fai ia Iakopo po o o’u matua, ona ou te puipui i lo’u aiga.  Ae afai e moni lou agaga salamo, ia gata i le po lea na e alu atu ai i le matou fale, ona ou toe va’ai ia te oe.”

Na toeititi mamulu ese le ulu a Salome i lona ea a’e i luga ma tilotilo atu ia Ruta.

“Ioe, se’iloga lava e mafai ona faamagalo oe e Naomi, ou te le toe mana’o lava e te toe alu atu i le matou fale pe e te toe tu i luma o o’u matua.  E te malamalama o Naomi, o le ui’i lena a o’u matua, ma o le pele lena nai o’u matua?” o le tala lea a le teine o Ruta.

“Pule lea po o le a lau mea e fai i le lua faiga uo ma Iakopo, ae o la’u tala mulimuli lena ia te oe.”

Na’o na uma atu lava o le tala a Ruta ma savali loa i fafo mai i le ofisa a Salome.  Ae ua toe tu lemu a’e nei i luga le teine o Salome ma lona loto mafatia, i le faamatalaga a Ruta.

[E FAIA PEA]