VAEGA 105

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

********************************************

Sa faagata mai le tatou Fagogo i le vaiaso ua mavae ina ua fa’amutaina e le teine o Ruta ia le la talanoaga ma Salome, e uiga i le uso laititi a Ruta, si teine o Naomi.

O le upu mulimuli a le teine o Ruta ia Salome ae e le’i savali ese atu ma le ofisa a Saloma, sa ia faapea atu ai, “E se’iloga lava e mafai ona faamagalo oe e Naomi, ou te le toe mana’o lava e te toe alu atu i le matou fale pe e te toe tu i luma o o’u matua.  E te malamalama o Naomi, o le ui’i lena a o’u matua, ma o le pele lena nai o’u matua?”

“E te silafia le mea e tupu pe a o la malamalama, pe iloa foi e lo’u tuagane, o oe le mafuaaga na mafatia ai le la tama a’o aoga o ia?  Mata o le a sou manatu i se lagona e o’o ia i la’ua pe a o la malamalama, o oe le mafuaaga na toeititi pule ai Naomi i lona ola, a’o talavou?”

“Pule oe po o le a lau mea e fai i le lua faiga uo ma Iakopo, ae o la’u tala mulimuli lena ia te oe.”

O upu mulimuli ia a Ruta, ma savali atu loa i fafo ma le ofisa a Salome.

Ae o le taimi lea ua matua’i taoto ifo i lalo o le foloa o lona ofisa ia le teine o Salome ma ua tagi lotulotu ai.

Ina o savali atu Ruta i le ‘elevator’ e alu ai i lalo, ae tatagi lana telefoni.  E fa’a ‘hello’ atu, o lona ofisa lea e valaau mai.

“Ruta, o Elena.  E manatua le mataupu e uiga i si ou tama?  O lea ua tali mai le faamasinoga, e mafai ona toe tatala su’esu’ega i le mataupu lea.”  O le tala lea a le tagata mai i lona ofisa.

Na tu faafuase’i Ruta ma faapea, “E moni?”

“Ioe, lea ua maua mai le tali a le faamasinoga. Ae sau o lea e faatali atu le alii pule e te lua talanoa,” o le tala mai lea a le teine o Elena.

Ua va’aia le tapuni lemu ifo o mata a le teine o Ruta i totonu o le ‘elevator’ ma memumemu ona laugutu, i sana tatalo leleoa e faafetaia ai le Atua i lana fesoasoani mai i le mataupu a lona tama.

Ua le toe iai se faatali a Ruta, ae ua fa’asasa’o atu loa i le latou ofisa e la te talanoa ma lona pule.

[E FAIA PEA]