VAEGA 106

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 106.

***********************************************

Ua faatopetope atu nei le teine o Ruta i lona ofisa, ina ua valaau mai le latou ofisa o la e faatalitali mai lona pule, ona o lea ua maua mai se tali fiafia mai i le faamasinoga, e faataga ai le toe tatalaina o su’esu’ega a leoleo, e fa’atatau I le mataupu lea na a’afia ai lona tua’a ma le tua’a o le alii fomai o Taki, a’o talavou i la’ua.

Na ata le pule o le ofisa loia a Ruta, ina ua saofa’i atu le teine o Ruta ma taumafai e to lona sela, e pei o se tagata sa tamo’e i se melefoni.

“Ia o lea ua tali mai le faamasinoga, ma o le la ua o’o atu foi le tusi i le ofisa a leoleo mo le toe tatalaina o su’esu’ega i le mataupu a lou tama,” o le tala lea a le alii pule a Ruta.

“Ae e pau lava le mataupu lea ou te fia talanoa atu ia te oe, o le tulaga lea i le aso e malaga atu ai lou tama i le ofisa a leoleo, mo le toe fa’asa’oina o lona suafa.”

Ua tepa ese Ruta ma ona foliga faanoanoa, i le faamatalaga mulimuli a lana pule.

O lo’o silafia lelei lava e le teine o Ruta, ua mae’a ona ioe lona tama e toe fa’asa’o lona igoa, aua manatua foi, o le igoa o le tua’a a si alii fomai o Taki, lea o lo’o igoa ai nei le tua’a a Ruta.

“Ou te iloa o se tulaga faigata lea, ma e ono loka ai lou tama, ae peitai, e leai seisi auala e mafai ona faia ma o si ou tama lava na mana’o e toe fa’asa’o lona igoa,” o le tala mai lea a le pule a Ruta.

Ua lulu le ulu o le teine o Ruta ma faapea mai, “E moni lava lau saunoaga.  O si o’u tama lava na fai mai e mana’o e toe sui lona igoa, i lona igoa sa’o o Alesana Porotesano.”

“Ou te talitonu, o le a okay mea uma, aua o lena ua e lava saunia e fesoasoani i lou tama, i le avea o oe ma ana loia,” o le faamatalaga lea a le pule a Rita.  “Ma o le mafuaaga lea ua ou ioe ai e tu’uina atu le masina atoa e te le faigaluega ai, ae o le a fa’aalu lou taimi e te tapenapena ai mo le faamasinoga a lou tama.”

Ua tilotilo atu nei Rita i lona pule ua na leiloa po o le a lana tala a fai atu.

“Fa’afetai lava mo lou loto malamalama,” o le tala lea a Rita ma le maligi o ona loimata.

“O oe o seisi o loia taua i totonu o lenei Ofisa, ma e le mafai ona matou tu’uina atu oe e te faamavae pe afai o le mea lea na e fuafua iai,” o le faamatalaga lea a le pule ma ‘ata.

Ua tula’i Rita ma savali atu i fafo ma ia aga’i atu loa i lo latou fale ina ia mafai ona talanoa ma ona matua, e tusa ai ma le fa’agasologa o le latou lumana’i.

[E FAIA PEA]