VAEGA 107

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

*********************************************************

Na gata mai le tatou Fagogo i le vaiaso ua tuanai ina ua maua e le teine o Ruta le tala fiafia e tusa ai ma le mataupu lea na tu’ua’ia ai lona tama, le tamaloa o Alesana, a’o la talavou ma le tua’a o le alii fomai o Taki, lea na maliu ai seisi alii talavou.

Sa matua’i le iloa se mea e gata mai ai le fiafia o Ruta, ona o lea ua talia e le faamasinoga ia le latou talosaga ina ia toe tatalaina le mataupu a lona tama, ae toe su’esu’e auiliili, ona o lo’o iai se faamaoniga, e le o lona tama na mafua ai ona maliu le alii talavou mau’oa.  E le gata i lea, o lo’o ua iai fa’amaoniga sa totogi tupe e le ulugalii mau’oa lea na maliu lo la alo, ia le molimau lea na faasino lima i le tamaloa o Alesana.

Ae peitai, sa fa’ailoa atu e le pule a le ofisa loia lea o lo’o ai Ruta, e tatau ona o loa ma lona tama i le Ofisa a Leoleo e ta’u iai le mea moni e uiga i le igoa o lona tama.

Manatua foi, na soifua mai lava le teine o Ruta ma nai ona tei o Naomi ma Iakopo, o igoa le latou tama ia Tanielu ae o lea ua manino ifo le mata o le vai, o le igoa moni lea o le tua’a a le alii fomai o Taki, lea ua maliu.  Ae ona o le mana’o o tama o Taki ina ia le faafalepuipui ia si ana uo mamae, i le faalavelave lea na tupu lea na maliu ai le atalii o le ulugalii mau’oa, o lea na u’una’i malosi ai lava e le tua’a o Taki ia le tama o Ruta, ina ia tago e fa’aaoga lona igoa e lafi mai ai mai i leoleo.

Ae o lea ua mana’o le tama o Ruta ia toe fa’asa’o lona igoa mai ia Tanielu, i lona igoa sa’o o Alesana.  Ma afai ae manuia uma a latou taumafaiga, o le a mafai ona solofua uma tu’uaiga fa’asaga ia Alesana.

Ua tu’uina atu nei e le pule a Ruta ia le masina atoa e alu ai e malolo ma taumafai e fa’asa’osa’o ia le mataupu a lona tama.

Ua alu ma le fiafia le teine o Ruta i lo latou aiga ina ia talatalanoa i lona tama, e la te o loa i le Ofisa a Leoleo e fa’ailoa iai le la mea lea sa fai ma le tua’a a Taki.

Na matua’i fa’ate’ia le teine o Ruta, ina ua taunu’u atu i luma o le faitoto’a o le latou fale, ae sosolo atu loa ma se taavale.  Ma va’ai mai Ruta, ae oso atu i fafo le tagata, o le alii fomai o Taki.

[E FAIA PEA]